«ەير استانا» اۋە كومپانياسىنىڭ ۇشقىشى الماتى اۋەجايىندا ەسىرتكىمەن ۇستالدى، - دەپ حابارلايدى «قامشى» پورتالى.

«ۆرەميا» گازەتىنىڭ جازۋىنشا، ماسكەۋدەن الماتىعا ۇشىپ كەلگەن «ەيرباس-320» ۇشاعى جولاۋشىلارىنىڭ جۇكتەرىن تەكسەرۋ كەزىندە پوليسيانىڭ قىزمەتتىك ءيتى ۇشقىش كيىمىندەگى ازاماتتان سەزىكتەنىپ، بەلگى بەرگەن. سول كۇنى اتالعان ۇشاقپەن بارلىعى 82 جولاۋشى كەلگەنى ايتىلادى.

پوليسەيلەر كەدەن ورگانلارىنىڭ قىزمەتكەرلەرىمەن بىرگە كۇدىكتىنىڭ زاتتارىن تەكسەرگەندە ونىڭ قالتاسىنان جاسىل ءتۇستى وسىمدىك تەكتەس زات سالىنعان پاكەت تابىلىپ، بىردەن ساراپتاماعا جونەلتىلگەن.

ال، قالتاسىنان كۇدىكتى پاكەت تابىلعان ازامات «ەير استانا» كومپانياسىنىڭ 39 جاستاعى ەكيپاج كومانديرى بولىپ شىققان. كۇدىكتىدەن تاركىلەنگەن زات ماريحۋانا ەكەنى انىقتالدى. ماريحۋانا ەكيپاج كومانديرىنىڭ قانىنان دا انىقتالعان. ۇستالعان ازامات ءوزىنىڭ سوڭعى ءۇش جىلدان بەرى ەسىرتكى تۇتىناتىنىن، ءتىپتى، ماسكەۋدەن بەرى قاراي ۇشار الدىندا دا ماريحۋانا شەگىپ العانىن جاسىرماعان.

قازىرگى تاڭدا اتالعان ءىس بويىنشا سوتقا دەيىنگى تەرگەۋ شارالارى جۇرگىزىلۋدە. «ەير استانا» كومپانياسى بۇل وقيعا بويىنشا رەسمي مالىمدەمە تاراتپادى.