قحر-نىڭ ءىرى اۋىلشارۋاشىلىق ترەيدەرىمەن جاسالعان كەلىسىمگە سايكەس، بيىل 2 مىڭ توننا وسىمدىك مايىن قىتايعا جەتكىزۋ كوزدەلىپ وتىر، - دەپ حابارلايدى «قامشى» پورتالى «اتامەكەن» ۇكپ باسپا ءسوز قىزمەتىنە سىلتەمە جاساپ.

قازاقستاندىق وسىمدىك مايىن وندىرۋشىلەر قىتايلىق كاسىپكەرلەرمەن ىسكەرلىك قارىم-قاتىناس ورناتا الادى. مۇنداي كەلىسىمگە ق ر «اتامەكەن» ۇكپ-نىڭ  وتاندىقاۋىلشارۋاشىلىعى ونىمدەرىن وڭدەۋ ءۇشىن،  جۇڭگو كومپانيالارىن ستراتەگيالىق ينۆەستور رەتىندە تارتۋ ماقساتىندا جۇرگىزگەن كەلىسسوزدەردىڭ بارىسىندا قول جەتتى. اتالمىش جوبا «100 ناقتى قادام» ۇلت جوسپارى اياسىندا جۇزەگە اسىرىلماق.

ەكى جاقتى سەرىكتەستىك ناتيجەسىندە وتاندىق تاۋار وندىرۋشىلەر مەن  «سيان» يندۋستريالدى كورپوراسياسىنىڭ بىرلەسكەن جۇمىسى باستالدى. بۇل كومپانيا قحر-داعى شەنسي ايماعىنىڭ اۋىلشارۋاشىلىعى يندۋسترياسىنداعى ۇزدىك كاسىپورىن بولىپ سانالادى جانە ءداندى-داقىلدار مەن ماي ءوندىرىسى سالاسىنا ارنايى مامانداندىرىلعان. كومپانيانىڭ جەكە ساۋدا-لوگيستيكالىق جەلىسى، قويما عيماراتى جانە 1،5 مىڭ ساۋدا نۇكتەسى بار. ەكى جاقتى سەرىكتەستىكتىڭ ناتيجەسىندە قازاقستاندىق ازىق-تۇلىك وندىرۋشىلەر ءوز ونىمدەرىن كورشى ەلدىڭ الىپ نارىعىنا شىعارۋعا مۇمكىندىك الدى. سەبەبى، قازاقستان ونىمدەرى تابيعي دامىمەن، جوعارى ساپالىلىعىمەن جانە قولجەتىمدى باعاسىمەن ەرەكشەلەنىپ، جۇڭگو نارىعىندا  سۇرانىسقا يە بولىپ وتىر.

ال «اتامەكەن» ۇكپ وتاندىق جانە قىتايلىق كاسىپكەرلەرگە ستراتەگيالىق سەرىكتەستەر ىزدەۋگە، قازاقستاندىق تاۋاردى ەكسپورتتاۋعا جانە تاسىمالداۋدا كەزدەسەتىن ماسەلەلەردى شەشۋگە كومەكتەسەدى. ۇلتتىق پالاتانىڭ اتالمىش جوباسى ەكىجاقتى كەلىسسوزدەر جۇرگىزۋ كەزەڭىنەن باستاپ، ونىمدەردى جەتكىزۋ جانە تاراتۋ  كەزەڭىنە دەيىن باقىلاپ، كەدەرگىلەردى ەڭسەرۋدى قاراستىرادى.

ناتيجەسىندە وتاندىق ماي زاۋىتتارىنان 2 000 توننا ءونىمبىرىڭعاي تەمىر جول كونتەينەرلەرىمەن تاسىمالدانادى. ايتا كەتۋ كەرەك، بۇرىن ماي قىتايعا تەك شيكىزات كۇيىندە جەتكىزىلەتىن. مايلى داقىلداردى وڭدەپ، وسىمدىك مايىن ءوندىرۋ كولەمىن ارتتىرۋ وتاندىق كاسىپورىندارعا قوسىمشا تابىس اكەلەدى، جاڭا جۇمىس ورىندارىن اشۋعا كومەكتەسەدى. اتالعان جوبا بويىنشا راپس مايىن وندىرەتىن  اقمولا وبلىسىنداعى «Agrimer-Astyk» ج ش س مەن كۇنباعىس مايىن شىعاراتىن  شقو-داعى «سەي-نار» ج ش س  ماي ونىمدەرىن ءوندىرۋ مەن وڭدەۋگە جانە الىنعان ونىمدەردى قىتايعا ەكسپورتتاۋعا مۇمكىندىك الدى.

ەسكەرەتىن جايت، ماي ونىمدەرىن جەتكىزۋ بارىسىندا ترانسپورتتىق تاسىمال  پروبلەمالارى  ءجيى ۇشىراسادى.  ناقتىراق ايتقاندا، زاۋىتتاردىڭ ءوندىرىس جانە تەحنولوگيالىق قۋاتى كونتەينەرلەرگە ماي جۇكتەۋگە جەتپەيدى. بۇرىن ماي جۇكتەۋ تەمىر جول سيستەرنالارى ارقىلى ىسكە اساتىن. الايدا قازاقستاندىق وندىرۋشىلەر بۇل پروبلەمانى ارنايى ماي تاسىمالىنا ارنالعان كونتەينەر-فلەكسيتانك ماي قۇيۋ بەكەتتەرىندەگى ورىنداردى قايتا جابدىقتاۋ ارقىلى شەشكەن بولاتىن.

قازىرگى تاڭدا الماتىدا 88 كونتەينەردەن تۇراتىن قۇرام جاساقتالىپ، قحر ساتىپ العان ماي ونىمدەرىن جەتكىزۋگە دايىن تۇر.

سونداي-اق، «ايسزيۋي» كومپانياسى «الماتى ءونىم» جشس-مەن كونديتەرلىك ونىمدەردى تاسىمالداۋ جونىندە كەلىسىمشارت جاسادى. ءونىمنىڭ العاشقى لەگى جەتكىزىلدى، جۇڭگو تۇتىنۋشىلارىنىڭ اراسىندا ۇلكەن سۇرانىسقا يە جانە ءساتتى تاسىمالدانۋدا.

قىتايدىڭ «ايسزيۋي» وندىرىستىك توبىمەن سەرىكتەستىكتى نىعايتۋ ماقساتىندا «اتامەكەن» ۇكپ سولتۇستىك قازاقستان وبلىسىنداعى  ماي ءوندىرىسى مەن ءداندى داقىلداردى وڭدەيتىن قۇنى 58 ملن دوللاردى قۇرايتىن  ەكى جاقتى ينۆەستيسيالىق جوبانىڭ ماقۇلدانۋىنا قول جەتكىزدى. قۇرىلىس جۇمىستارى وسى جىلى باستالادى. زاۋىتتىڭ قۋاتى جىل سايىن 36 مىڭ توننا وسىمدىك مايى مەن 25 مىڭ توننا كۇنجارا وندىرۋگە جەتەدى دەپ بولجانۋدا.

مۇنداي ءتيىمدى سەرىكتەستىك ەلىمىزدىڭ اۋىل شارۋاشىلىعى سالاسىن جانە وتاندىق وندىرۋشىلەردى جاڭا بيىكتەرگە كوتەرەتىنى ءسوزسىز.