قازاقستان بيلىگىندەگى كونستيتۋسيا بويىنشا ەكىنشى ادام، پارلامەنت سەناتىنىڭ ءتوراعاسى قاسىم-جومارت توقايەۆ «روسسييسكايا گازەتاعا» بەرگەن سۇحباتىندا ەلىمىزدە پارلامەنتتىڭ وكىلەتتىلىگى كەڭەيۋى مۇمكىن ەكەنىن ايتقان، - دەپ حابارلايدى «قامشى» پورتالى.
رەسەيلىك باسىلىم قاسىم-جومارت كەمەل ۇلىنىڭ ەلدەگى كەزەكتەن تىس وتكەلى وتىرعان پارلامەنتتىك سايلاۋ، ساياسي جۇيەنىڭ دامۋى مەن ەۋرازيالىق ەكونوميكالىق وداققا قاتىستى قوعامنىڭ كوڭىل كۇيى تۋرالى پىكىرلەرىن بىلگەن.
سۇحباتىندا قاسىم-جومارت توقايەۆ قازاقستاننىڭ بولاشاقتا پارلامەنتتىك-پرەزيدەنتتىك باسقارۋ جۇيەسىنە كوشەتىنىن ايتقان.
«پارلامەنتتىڭ ءرولىن كۇشەيتۋ پروسەسى كەشە باستالعان ءىس ەمەس. بۇگىندە پارلامەنت زاڭ شىعارۋشى قىزمەتتەن باسقا، ەلدەگى كادرلىق ساياساتقا تىكەلەي ارالاسادى. پرەزيدەنت پرەمەر-مينيستردى، ۇلتتىق بانك ءتوراعاسىن، باس پروكۋرور مەن ۇلتتىق قاۋىپسىزدىك كوميتەتىنىڭ ءتوراعاسىن پارلامەنتتىڭ كەلىسىم بەرۋىمەن تاعايىندايدى، جوعارعى سوت ءتوراعاسى مەن سۋديالارى، باسقا دا لاۋازىمدى تۇلعالار دەپۋتاتتاردىڭ كەلىسىمىمەن سايلانىپ، قىزمەتتەرىنەن بوساتىلادى»، - دەگەن ق. توقايەۆ بۇگىننىڭ وزىندە دەپۋتاتتىق كورپۋستىڭ ەلدىڭ ساياسي ومىرىنە بەلسەندى ارالاساتىنىن ايتقان.
«مەنىڭ ويىمشا قازاقستاندا پارلامەنتتىڭ ءرولى ارتا بەرەدى. مۇنداي سەنىمدىلىككە پرەزيدەنت نۇرسۇلتان نازاربايەۆتىڭ ستراتەگياسى دا سەبەپ بولىپ وتىر. ءبىز قازاقستاندا ساياسي رەفورمالار ەسەپپەن، ورتا تاپتىڭ قالىپتاسۋى مەن ازاماتتىق قوعامنىڭ دامۋ دەڭگەيىنە قاراي جۇرگىزىلىپ كەلەدى دەپ سانايمىز. ءبىز مەملەكەتتىڭ ەۆاليۋسيالىق دامۋىن جاقتايمىز. سوندىقتان، قازاقستان بولاشاقتا كۇشتى پارلامەنتپەن بىرگە ترانسپارەنتتى جانە ەسەپتى ۇكىمەت ارەكەت ەتەتىن پارلامەنتتىك-پرەزيدەنتتىك باسقارۋ جۇيەسىنە كوشەتىنىن جوققا شىعارمايمىن. ءبىراق، بۇل مەنىڭ جەكە بولجامىم. اقىرعى ءسوزدى پرەزيدەنت پەن قوعام ايتادى»، - دەگەن ق. توقايەۆ.
سونداي-اق، ق. توقايەۆ مىرزاعا «قازاقستاندا ەلدىڭ ەۋرازيالىق ينتەگراسيالىق پروسەستەرگە جانە حالىقارالىق ينستيتۋتتارعا قاتىسۋىنا قاتىستى بالاما كوزقاراستارعا يە ساياسي كۇشتەر بار ما؟» دەگەن دە سۇراق قويىلعان.
«ايماقتىق كووپەراسيالارعا بالاما – ءوزىن-وزى وقشاۋلاۋ. مۇنداي پەرسپەكتيۆا حالىقتىڭ كەڭ كولەمدى قولداۋىنا يە بولا قويۋى ەكىتالاي. ەكىنشى ماسەلە – ينتەگراسيا ساپاسى. مىسالى، ەۋرازيالىق ەكونوميكالىق كوميسسيا جۇمىسىن قازاقستاننان باسقا دا ۇيىم مۇشەلەرى سىناپ جاتىر. بۇل بىرلەستىكتەن حالىقارالىق ەكونوميكالىق ۇيىم رەتىندە كۇتىلەتىن دۇنيە كوپ. سوندىقتان، دەر كەزىندە ەاەو-عا مۇشە بارلىق ەلدەردىڭ مۇددەسىن قامتيتىن ءىس-قيمىلدار الگوريتمىن جاساۋ كەرەك. مەملەكەت باسشىلارى كەڭ وكىلەتتىلىك بەرىپ وتىرعان ەۋرازيالىق ەكونوميكالىق كوميسسيا جۇمىسىنىڭ ماڭىزى دا وسى.
سونىمەن قاتار، الدىعا ەرتەرەك وزىپ كەتىپ، ەاەو جۇمىسىن قيىنداتاتىن باستامالارمەن دە اسىعىستىق جاساماۋ كەرەك. ينتەگراسيا ازاماتتاردىڭ ءال-اۋقاتىن ارتتىرۋعا، ەلدەردى الەمدىك ەكونوميكانىڭ جەتەكشى ورىندارىنا شىعارۋعا قىزمەت ەتۋى ءتيىس»، - دەگەن جاۋابىمەن ق. توقايەۆ ەل ىشىندە رەسەي باستاعان ەكونوميكالىق وداققا ەشقانداي نارازىلىق جوق دەپ ءبىر-اق كەسىپتى.
پىكىر قالدىرۋ