بۇگىن كەشكى ساعات ون جارىمدا «حابار» ارناسىنان كورسەتىلەتىن ءماجىلىس سايلاۋىنا قاتىسۋشى پارتيا وكىلدەرى اراسىنداعى تەلەدەباتتىڭ ءتۇسىرىلىمى ءوتتى. وعان الدىندا حابارلانعانداي التى پارتيانىڭ وكىلى قاتىسىپ، ءوز ۇستانىمدارىن جەتكىزدى.
ءۇش كەزەڭنەن تۇرعان پىكىرسايىستىڭ العاشقى كەزەڭى «الەمدىك جاڭا ەكونوميكالىق احۋال: ماسەلەلەر مەن دامۋ» تاقىرىبىنا، ەكىنشى كەزەڭ: «قازىرگى جاعدايداعى ينفراقۇرىلىم، كولىك، لوگيستيكا» تاقىرىبىنا ارنالدى. ساياسي ناۋقان كەزىندە ەكونوميكانىڭ كولىك، تاسىمال، ينفراقۇرىلىم سىندى تار تاقىرىپتارىن نەگىزگى اڭگىمەگە ارقاۋ ەتۋ – ءاۋ باستان ساياساتكەرلەردىڭ باتىل مالىمدەمەلەرىنە جول بەرمەۋ ماقساتىنان تۋعان سەكىلدى. تەك ءۇشىنشى كەزەڭدە عانا سپيكەرلەرگە سايلاۋشىلارعا ۇندەۋ ارناۋعا مۇمكىندىك بەرىلىپتى.
سپيكەرلەر سايلاۋ بيۋللەتەنىندە بەلگىلەنگەن ءتارتىپ رەتى بويىنشا ءسوز الىپ، پىكىرسايىستىڭ ءۇشىنشى تۋرىندا سايلاۋ مەن ەلدىڭ ساياسي ومىرىنە، كەلەشەگىنە قاتىستى ويلارىن ورتاعا سالىپ، سايلاۋشىلارعا ۇندەۋ جاسادى. وندا «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ ەلدىڭ بۇگىنگى جەتكەن جەتىستىكتەرىنىڭ بارلىعىن ەلباسى جۇرگىزىپ وتىرعان ساياساتتىڭ جەمىسى دەپتى.
«تاۋەلسىز قازاقستان قول جەتكىزگەن بارلىق جەتىستىكتەر ەلباسى باستاعان بارلىق وتانداستارىمىزدى ەڭبەگىنىڭ جەمىسى. تاۋەلسىزدىك جىلدارى ءبىز بىرنەشە داعدارىستى باستان كەشىردىك: ەكونوميكانى دامىتتىق، مىڭداعان اۋرۋحانا، مەكتەپ، جولدار سالدىق، ونەركاسىپ پەن شاعىن بيزنەستىڭ جاڭا سالاسىن قالىپتاستىردىق... جاڭا قاتەرلەرگە ناقتى جوسپار بار، ول – «نۇرلى جول» باعدارلاماسى»، - دەدى ا. مىرزاحمەتوۆ.
«اق جول» اتىنان سويلەگەن پارتيا جەتەكشىسى ازات پەرۋاشيەۆ:
«اق جول» فراكسياسى پاردامەنتتە ۇكىمەتتىڭ كوپتەگەن باستامالارىنا قولداۋ تانىتپاي، قالىس قالىپ كەلدى. بۇعان ءبىز وسىلاي ىستەۋدى قالاعاننان ەمەس، مەملەكەتتىك ورگانداردىڭ جۇمىسىن ءتيىمدى، جاريا ەتۋ، ولاردىڭ جاۋاپكەرشىلىگىن ارتتىرۋ ماقساتىندا باردىق»، - دەدى.
ا. پەرۋاشيەۆ حالىقتى سايلاۋعا بەلسەندى قاتىسىپ، ءوز داۋىستارىن قالاعان ساياسي پارتياعا بەرۋگە، سول ارقىلى حالىق ءۇشىن الدەبىرەۋلەردىڭ شەشىم شىعارۋىنا جول بەرمەۋگە شاقىردى.
«اۋىل» پارتياسىنىڭ جەتەكشىسى ءالي بەكتايەۆ:
«الداعى سايلاۋ – بارلىعىمىز ءۇشىن، ەلىمىز ءۇشىن ۇلكەن ساياسي جانە تاريحي وقيعا. ءبىز بارلىعىڭىزدى سايلاۋعا قاتىسۋعا، وزدەرىڭىزدىڭ سايلاۋ قۇقىقتارىڭىزدى پايدالانۋعا شاقىرامىز. «اۋىل» پارتياسى سىزدەردى تەك پارتيا ءۇشىن عانا ەمەس، ەلىمىزدىڭ ءالى كۇنگە اسىراۋشىسى بولىپ وتىرعان اۋىل ءۇشىن، اۋىل شارۋاشىلىعى ءۇشىن داۋىس بەرۋگە شاقىرامىز»، - دەگەن ۇندەۋ جاسادى.
كومۋنيستەر اتىنان ۆلاديسلاۆ كوساريەۆ ءسوز الىپ، پارتيانىڭ سايلاۋعا بارۋداعى ماقسات، مىندەتتەرىن جەتكىزىپتى.
«ءبىز پارلامەنتكە سىزدەردىڭ ومىرلىك جوسپارلارىڭىز، ارماندارىڭىز بەن ءوز ومىرلەرىڭىزدەگى باقىتتا ساتتەر ءۇشىن كۇرەسۋگە بارامىز. ءبىز، كومۋنيستەر، ۇكىمەتكە باتىستىڭ ماگناتتارى سياقتى ويلارىنا كەلگەندى ىستەۋگە جول بەرمەيمىز»، - دەيدى ول. ۇندەۋىنىڭ اياق جاعىن ۆ. كوساريەۆ ولەڭگە اينالدىرىپ جىبەرىپتى.
قازىرگى بيلىككە اشىق قارسىلىق تانىتىپ جۇرگەن جالعىز ساياسي پارتيا- جالپىۇلتتىق سوسيال-دەموكراتيالىق پارتيا اتىنان پىكىرسايىسقا قاتىسقان زاۋرەش باتتالوۆناڭ سوزدەرى جاڭارۋعا شاقىرعان باتىل مالىمدەمە بولعان سياقتى.
«22 ناۋرىزدا ءبىز ناۋرىزدى – جاڭارۋ مەرەكەسىن، جاڭا جىل مەن جاڭا ءومىردىڭ باستاۋىن اتاپ وتەمىز. كۇن مەن ءتۇن تەڭەلەتىن كوكتەمنىڭ وسى كۇنىندە اسپان دەنەلەرى مەن جۇلدىزدار وزدەرىنىڭ باستاپقى نۇكتەلەرىنە كەلىپ، جاڭا جول، جاڭا سيكل باستايدى. 20 ناۋرىزدا سايلاۋ وتەدى. وسى كۇنى قازاقستاندىقتار ءوز تاڭداۋلارىن جاساپ، جاڭا جول، جاڭا سيكل باستايدى. جوق دەگەندە ءبىزدىڭ مەملەكەتىمىزدىڭ جاڭاشا دامۋىنا تالپىنادى»، - دەگەن ول ەلدى جاڭارۋ مەرەكەسى قارساڭىندا ءوز پارتيالارىنا داۋىس بەرۋگە شاقىرىپتى.
«بىرلىك» پارتياسى اتىنان ءسوز جارىسقا شىققان ۇمىتكەر روزا قۋانىشبايەۆا ساياسي ۇيىمنىڭ ەكولوگيا مەن قورشاعان ورتانى قورعاۋ ماسەلەسىنە كوڭىل بولەتىنىن جەتكىزگەن.
«ءوزىمىزدىڭ ازاماتتىق جاۋاپكەرشىلىگىمىزدى سەزىنە وتىرىپ، ءبىز بولاشاق ۇرپاققا تازا قازاقستاندى قالدىرۋدى ماقسات ەتەمىز. الەم ۇلكەن كليماتتىق وزگەرىستەر الدىندا تۇر. ءقازىر بارلىق قازاقستاندىقتاردىڭ قورشاعان ورتانى قورعاۋ ماسەلەسىندەگى بەلسەندى ازاماتتىق ۇستانىمى وتە ماڭىزدى»، - دەگەن ول بولاشاقتا جاسىل ەكونوميكاعا كوشۋ ماسەلەلەرىنە كوڭىل اۋدارتتى.
ءار ساياسي پارتيا ءوز جەتەكشىلەرى مەن وكىلدەرىنىڭ تەلەدەباتتا ايتقان سوزدەرىن وزدەرىنە تيەسىلى اقپارات رەسۋرستارى ارقىلى تاراتۋدا. تاڭەرتەڭ تۇسىرىلگەن تەلەباعدارلامانىڭ كوگىلدىر ەكراننان كورەرمەن نازارىنا ۇسىنىلعانعا دەيىن قانشالىقتى وزگەرىسكە ۇشىرايتىنى، وسى ساياسي شارا ءۇشىن بەرىلگەن 90 مينۋت ۋاقىتتان كىمگە قانشاسى تيەسىلى بولاتىنى كەشكە بەلگىلى بولادى. قالاي بولعاندا دا ساياسي تارتىس قۇرالى رەتىندە ماڭىزى جوعارى، سايلاۋ ناتيجەلەرى مەن سايلاۋشىلاردىڭ تاڭداۋىنا ىقپال ەتۋدىڭ باستى قۇرالى سانالاتىن تەلەدەباتتىڭ ۇگىت-ناسيحات ناۋقىنى اياقتالۋعا جاقىنداعاندا وتكىزىلۋىنىڭ ءوزى بيلىكتىڭ اشىق پىكىر تالاس پەن ءادىل باسەكەگە ءالى دە ۇركە قارايتىنىن اڭعارتىپ وتىر. سوعان قاراعاندا ەركىن ويلى ازاماتتاردىڭ ماجىلىسكە ءوتىپ، پارلامەنتتى جاڭارتا قويۋى دا ەكىتالاي سياقتى.
دارحان مۇقانتەگى
پىكىر قالدىرۋ