بۇگىن كەشكە «حابار» ارناسىنان كورسەتىلۋى ءتيىس تەلەدەباتقا قاتىسقان ساياساتكەرلەر تۇسىرىلىمنەن سوڭ پىرىكسايىس تۋرالى ويلارىن ايتتى، - دەپ حابارلايدى «قامشى» پورتالى Total.kz – كە سىلتەمە جاساپ.
«اق جول» پارتياسىنىڭ جەتەكشىسى اتالعان شارانى «ۇراندار سايىسى» دەپ باعالاپ، كوڭىلى تولمايتىنىن ايتقان.
«مۇنداي پىكىرسايىستىڭ وتكەنى دۇرىس، ارينە. ءبىراق، مەن ءۇشىن ەكى مينۋت ىشىندە كونسەپتۋالدى دۇنيەلەردى ايتىپ شىعۋ وڭايعا سوقپادى. وكىنىشكە وراي، مۇندا كونسەپتۋالدى ويلار سايىسى ەمەس، جالپىلاما سوزدەر ايتىلعان ۇراندار سايىسى بولدى. ءبىر جاعىنان بۇل سايلاۋ بولعان سوڭ، ادامدار ۇراندارعا ءمان بەرەدى دەپ ويلاعان بولۋ كەرەك»، - دەگەن ا. پەرۋاشيەۆ مۇنداي شارالار «بەتپە-بەت» فورماتىندا كۇن سايىن وتكىزىلۋى كەرەكتىگىن ايتادى.
كومۋنيستەر وكىلى ۆ. كوساريەۆ بولسا، پىكىرسايىسقا «قالىپتى» دەگەن باعا بەرگەن. «اۋىل» پارتياسىنىڭ جەتەكشىسى ءالي بەكتايەۆ تا ۇيىمداستىرىلعان پىكىرسايىسقا كوڭىلى تولاتىنىن ايتقان.
ال، «بىرلىك» پارتياسىنىڭ اتىنان ءسوز تالاستىرعان روزا قۋانىشبايەۆانى جانىنداعىلار پىكىرسايىستان سوڭ «جۋرناليستەرگە سۇحبات بەرۋ ماسەلەسى پارتيا باسشىلىعىمەن كەلىسىلمەگەن» دەپ الىپ كەتكەن.
جسدپ وكىلى زاۋرەش باتتالوۆا بولسا، بۇل باعدارلامانىڭ پىكىرسايىس فورماتىنا كەلمەيتىنىن ايتقان.
«بۇل دەبات ەمەس، تانىستۋرى سوزىنە كوپ كەلەدى. دەبات دەگەن جۇيەلى، تۇراقتى بولىپ، قوعامنىڭ ءار سالاسىنا قاتىستى ماسەلەلەردى كوتەرۋى كەرەك. وعان تەك پارتيا جەتەكشىلەرى نەمەسە وكىلدەرى عانا ەمەس، بارلىق نيەت بىلدىرۋشىلەر قاتىسا الۋى كەرەك قوي. وعان سپيكەرلەر الدىنا ماڭىزدى ماسەلەلەر ۇسىناتىن، سۇراقتار قويا الاتىن كوپتەگەن ازاماتتار قاتىسۋى ءتيىس ەمەس پە؟»، - دەيدى ز. باتتالوۆا.
بۇگىن تاڭەرتەڭ وتكەن تەلەدەبات تۇسىرىلىمىنە جۋرناليستەر قاتىسپاعان. ساياساتكەرلەردىڭ سوزدەرىن ب ا ق وكىلدەرى وكق زالىندا ەكراننان تاماشالاعان. جۋرناليستەر رەگلامەنت بويىنشا 90 مينۋت وتەدى دەلىنگەن پىكىرسايىستىڭ بار-جوعى 70 مينۋتقا سوزىلعانىن ايتۋدا.
