تۇركىستانداعى جىندىحاناعا ءومىر بويىنا توعىتىلعان مارجان تۇرلىبايەۆاعا قاتىستى جاڭا ساراپتاما ونىڭ اقىل-ەسى دۇرىس ەكەنىن راستاعان، - دەپ حابارلايدى «قامشى» پورتالى NUR.KZ-كە سىلتەمە جاساپ.

وندا قارشاداي قىزدىڭ بويىندا بۇعان دەيىن تاعايىندالىپ كەلگەن شيزوفرەنيا سىرقاتىنىڭ جەڭىل ءتۇرىنىڭ بەلگىلەرى بولماي شىققان جانە ونىڭ قوعامعا ەشقانداي ءقاۋپى جوق ەكەنى دە انىقتالعان.

بۇل تۋرالى شىمكەنتتىك جۋرناليست گۇلجان باينازاروۆا سايتتىڭ ايماقتاعى تىلشىسىنە بەرگەن ەكسكليۋزيۆتى سۇحباتىندا ايتىپ بەرگەن.

ايتا كەتەيىك، گۇلجان باينازاروۆا مارجان تۇرلىبايەۆاعا قاتىستى ماسەلەنى العاش رەت كوتەرىپ، ودان كەيىن بۇل جايت قوعام اراسىندا قىزۋ تالقىعا سالىنعان ەدى.

«سەگىز جىل بويى ەسى اۋىسقان دەپ جىندىحانادا ءماجبۇرلى تۇردە ۇستاعان مارجانعا رەسپۋبليكالىق سوت مەديسينالىق ساراپشىلارى وڭ ناتيجە بەردى. كۇنگەيلىك دارىگەرلەردىڭ قويعان دياگنوزى جوققا شىعارىلىپ، شيزوفرەنيانىڭ جاي ءتۇرى انىقتالماعان. قورىتىندى بويىنشا مارجانىڭ قوعامعا ءقاۋىپتى ەمەستىگى انىقتالدى. قايتا جىندىحانادان شىعىپ، كوپشىلىكپەن بىردەي ءومىر سۇرۋگە قۇقىلى» - دەدى جۋرناليست.

ءجۋرناليستىڭ ايتۋىنشا، ساراپتاما قورىتىندىسى 24 اقپاندا شىققان. الايدا مارجان ءالى كۇنگە دەيىن جىندىحانادان شىعارىلماپتى. سەبەبى، جاۋاپتىلار بىر-بىرىنە سىلتەپ جۇرگەنگە ۇسقايدى.

«ساراپتاما قورىتىندىسى 24 اقپاندا شىقتى. سودان بەرى بارلىعىنا حابارلاستىم. وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ەشقانداي حابار كەلگەن جوق دەدى. تەرگەۋشى تۇركىستانداعى مەكەمەگە جىبەرگەنىن ايتادى. تۇركىستانعا بارىپ، ديرەكتوردان سۇراسام، ساراپتاما قورىتىندىسىن العانىن راستادى. ءبىراق، مارجان ءالى شىققان جوق. باسقارما قۇزىرلى مەكەمەگە سىلتەيدى، قۇزىرلى مەكەمە باسقارما شىعارۋى كەرەك دەيدى. قىسقاسى، ءبارى بىر-بىرىنە سىلتەيدى»، - دەپ اتاپ ءوتتى جۋرناليست.

«سودان كىمگە بارارىمدى بىلمەي الەۋمەتتىك جەلىدەگى پاراقشامدا ەلدەن ءسۇيىنشى سۇراپ، جاعىمدى جاڭالىقپەن ءبولىستىم» - دەدى ول.

«رەسپۋبليكالىق ساراپشىلاردىڭ بەرگەن قورىتىندىسىنا وڭتۇستىكتىڭ دارىگەرلەرى مويىنسۇنعىسى كەلمەيدى، ويتكەنى سەگىز جىل بۇرىنعى بىلىقتارىنىڭ اشىلىپ قالاتىنىنان قورقادى. بۇل ءسۇيىنشى حاباردى ەكران ارقىلى سۇراماق بولعانىمىزدا، جاۋاپتىلار بىر-بىرىنە سىلتەپ، باستارىن الىپ قاشتى. اقىرى ايتتىم عوي.... ءسۇيىنشى حاباردى حالىققا جەتكىزگىسى كەلمەيتىندەردىڭ قاتارىندا وقو جۇمىسپەن قامتۋ جانە الەۋمەتتىك باعدارلامالار باسقارماسىنا قاراستى مەكەمەلەردىڭ بارلىعى بار... قازاقتىڭ ورىمدەي قىزىنا جاڭا ءومىر سىيلايتىنىما دا سەنىمدىمىن. ال حالايىق، مارجان قىزدارىڭىزدىڭ دەنى ساۋ! ەندىگى ارمانى جىندىحانا قابىرعاسىنان بوساپ شىعىپ، ەل قاتارلى ءومىر ءسۇرۋ. سوت ساراپتاماسىنداعى قورىتىندى جۇزەگە اساتىن كۇن جاقىن»، -  دەپ ويىمەن ءبولىستى باينازاروۆا.