ءال-فارابي اتىنداعى قازاق ۇلتتىق ۋنيۆەرسيتەتىندە ميكروبيولوگ عالىم، قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى جۇبانوۆا اجار احمەت قىزىنىڭ 75 جىلدىق مەرەيتويىنا ارنالعان «قازىرگى بيوتەحنولوگيا ماسەلەلەرى: لابوراتوريالىق زەرتتەۋلەردەن وندىرىستەرگە» اتتى حالىقارالىق عىلىمي-تاجىريبەلىك كونفەرەنسيا ءوتتى، - دەپ حابارلايدى «قامشى» پورتالى.
ءىس-شارانىڭ نەگىزگى ماقساتى – لابوراتوريالىق زەرتتەۋ ناتيجەلەرىن وندىرىسكە ەنگىزۋدىڭ وڭتايلى جولدارىن ىزدەستىرۋ. كونفەرەنسيا جۇمىسىندا سوڭعى ون جىلدا قاتەرلى ىسىك اۋرۋلارىنىڭ الدىن الۋدا جانە ەمدەۋدە قولدانىلاتىن بيوتەحنولوگيالىق پرەپاراتتاردىڭ زەرتحانالىق ۇلگىسىنىڭ سىناق مەرزىمىن توقتاتىپ، ولاردى قولدانىسقا ەنگىزۋ ماسەلەسى ءسوز بولدى. پروفەسسور ن.ت. بالتابەكوۆتىڭ ايتۋىنشا، ستاتيستيكا بويىنشا بۇگىنگى تاڭدا ەلىمىزدە جىلىنا 360 مىڭ ادام قاتەرلى ىسىك اۋرۋلارىنا شالدىعادى. ەڭ قايعىلىسى ونىڭ ىشىندە بالالاردىڭ سانى 500-دەن اسىپ جىعىلادى. جىل سايىن ونكولوگيالىق اۋرۋعا شالدىققانداردىڭ 16 مىڭى دەرتىنە داۋا تابا الماي، ومىردەن وتەدى ەكەن. وكىنىشكە قاراي، بۇل كورسەتكىش كۇن ساناپ ارتىپ كەلەدى.
اتالعان ماسەلەنى جويۋ مەن الدىن الۋ شارالارىن ۇيىمداستىرۋ، سونىمەن قاتار وسىمدىكتەردىڭ، جانۋارلاردىڭ جانە ميكروورگانيزمدەردىڭ بيوتەحنولوگيالىق جانە گەنەتيكالىق پوتەنسيالدارىن انىقتاۋ، ۆەتەريناريا جانە اۋىلشارۋاشىلىعىندا جاڭا بيوتەحنولوگيالىق پرەپاراتتار دايىنداۋدىڭ تاجىريبەلىك شەشىمدەرىن ۇسىنۋ ماسەلەلەرى كونفەرەنسيا بارىسىندا كەڭىنەن تالقىلاندى.
سونداي-اق ءىس-شارا بارىسىندا الەمدى جايلاعان ترانسگەندى ازىق-تۇلىك يندۋسترياسىنىڭ دامىعان ۋاقىتىندا گەندىك موديفيكاسيالانعان ونىمدەردەن اۋلاق بولۋ جانە گەندىك ينجەنەريانى دۇرىس باعىتتا پايدالانۋ سياقتى ءبىرقاتار سۇراقتارعا جاۋاپ بەرىلدى. «قازاقستاندا گەندىك ينجەنەريانىڭ كومەگىمەن ماقتانىڭ «تۇركىستان» اتتى سورتى وتىرعىزىلدى. بۇل ءادىستىڭ باستى ارتىقشىلىعى ول ارام شوپتەردىڭ وسۋىنە جول بەرمەيدى. ناتيجەسىندە شارۋالاردىڭ جۇمىسى جەڭىلدەپ، ءونىمنىڭ كولەمى ارتادى»، – دەدى ق ر بعم «ۇلتتىق بيوتەحنولوگيا ورتالىعىنىڭ» باس ديرەكتورى ە.م. رامانقۇلوۆ. ياعني، بيوتەحنولوگيالاردى ءتيىمدى پايدالانۋ ەل ەكونوميكاسىنا ايتارلىقتاي وڭ وزگەرىستەر اكەلەتىنى ءسوزسىز.
ءال-فارابي اتىنداعى قازۇۋ – بيوتەحنولوگيا سالاسى ماماندارىن دايارلايتىن باستى ءبىلىم وردالارىنىڭ ءبىرى. جوعارى وقۋ ورنىندا «بيولوگيا جانە بيوتەحنولوگيا ماسەلەلەرى» عىلىمي-زەرتتەۋ ينستيتۋتى، «حرونوبيولوگيا جانە حرونومەديسينا» وقۋ-عىلىمي ورتالىعى مەن «جاڭا تالاپ» اتتى گەنەتيكالىق-سەلەكتيۆتىك ورتالىقتىڭ جۇمىس ىستەيتىنىن اتاپ ءوتۋ كەرەك. وقۋ ورداسىندا اجار احمەت قىزى سياقتى جوعارى بىلىكتى مامانداردان ءبىلىم العان شاكىرتتەردىڭ ەرتەڭگى كۇنى ەل يگىلىگى ءۇشىن قىزمەت ەتەتىنىنە سەنىمىمىز مول.
