اقتوبەدە ازاماتتاردىڭ ميلليونداعان تەڭگەسىن قالتاعا باسقان 2 ايەل قوعا ءتۇستى، - حابارلايدى دەپ Qamshy.kz  قازاقپارتقا سىلتەمە جاساپ.

بۇل تۋرالى وبلىستىق ءىىد باسپا ءسوز قىزمەتى اقپارات تاراتتى.

ماسەلەن، 2 مامىر كۇنى 46 جاستاعى قالا تۇرعىنى پوليسياعا كەلىپ، 2014 جىلدىڭ ناۋرىزىندا تانىس ايەل 2 ملن. 300 مىڭ تەڭگە اقشاسىن الداپ الىپ كەتكەندىگىنە شاعىم تۇسىرگەن. ونىڭ ايتۋىنشا، كۇدىكتى ايەل ونى مەملەكەتتىك باعدارلاما اياسىندا پاتەر الۋعا قول ۇشىن بەرەتىندىگىنە سەندىرگەن.

«جەدەل ىزدەستىرۋ جۇمىستارى بارىسىندا سازدى پوليسيا بولىمشەسىنىڭ ۋاكىلدەرى اتالعان قىلمىستى جاساعان كۇدىكتىنى ۇستادى. ول 40 جاستاعى قالا تۇرعىنى بولىپ شىقتى. تەرگەۋ بارىسىندا ۇستالعان ايەل كىناسىن مويىندادى. بۇعان قوسا، تەرگەۋشىلەر ونىڭ ءدال وسىنداي باسقا دا قىلمىستارعا قاتىسى بار ەكەندىگىن دالەلدەدى»، - دەلىنگەن حابارلامادا.  

سونىمەن قاتار ءىىد اقپاراتىنا قاراعاندا، سازدى پوليسيا بولىمشەسىنىڭ قىزمەتكەرلەرى قالا تۇرعىنىنىڭ ارىزى بويىنشا تاعى ءبىر 42 جاستاعى ايەلدى ۇستادى. ول دا الداۋ ارقىلى قالا تۇرعىنىنىڭ 2 ملن. تەڭگەگە جۋىق قارجىسىن قالتاسىنا باسقان. تەرگەۋشىلەر ونىڭ  وسى سيپاتتاعى 4 قىلمىسقا قاتىسى بارلىعىن انىقتادى.

ولاردىڭ وسىعان ۇقساس وزگە دە قىلمىستارعا قاتىسى تەكسەرىلۋدە. بۇل فاكتىلەر ق ر قىلمىستىق كودەكسىنىڭ 190 بابى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىندە تىركەلگەن.