ق ر پارلامەنت ءماجىلىسىنىڭ دەپۋتاتى گۇلجان قاراقۇسوۆا ەلدە ءورشىپ كەتكەن جەر داۋىنا جۋرناليستەردى كىنالاپ وتىر، - دەپ حابارلايدى Qamshy.kz  Informburo.kz سايتىنا سىلتەمە جاساپ.

دەپۋتات تىلشىلەرگە بەرگەن سۇحباتىندا، «تىلشىلەر ءاۋ باستا كونتەكست ىشىنەن ءماتىندى ءبولىپ الىپ، زاڭنىڭ ماعىناسىن قۇبىلتىپ بەرگەن» دەپ قالام يەلەرىن كىنالايدى.

"ءقازىر ماسەلەنىڭ ءمان-جايىن انىقتاماي، كونتەكست ىشىنەن ويىڭدى ءبولىپ الىپ، ماعىناسىن وزگەرتىپ بەرۋ سانگە اينالدى. جۋرناليستەر مىقتى ساراپشى بولۋى كەرەك. مەن مۇنى ۇنەمى قايتالاپ كەلەمىن. سىزدەر، جۋرناليستەر، تالداۋعا سۇيەنۋلەرىڭىز كەرەك، ويتكەنى، ەڭ سوڭعى ءسوزدى حالىققا جەتكىزەتىن سىزدەرسىزدەر. جەر ماسەلەسىنە قاتىستى جاعدايدى ەشكىم سارالاعان جوق، كونتەكستتەن قيىپ الىپ، وزدەرىنە ىڭعايلى ەتىپ بەرە سالدى. سالدارىنان شىندىققا جاناسپايتىن پىكىرلەر ايتىلىپ جاتىر" دەيدى قاراقۇسوۆا.

دەپۋتاتتىڭ ايتۋىنشا، ەلگە ينۆەستور تارتۋ جۇمىسى 2013 جىلدان بەرى قىزۋ ءجۇرىپ جاتىر. الايدا ازىرگە ناتيجەسى كورىنبەگەن.

"ءقازىر 2016 جىل. بىزگە ءالى ينۆەستيسياسىن كوتەرىپ ەشكىم كەلگەن جوق. اۋىلشارۋاشىلىق جەرلەرىنىڭ تەك 0،06 پايىزىن عانا شەتەلدىكتەر جالعا الىپ وتىر. ونىڭ 2 پايىزى قىرعىزداردا، 2 پايىزى وزبەكتەردە، قالعان 2 پايىزى ەۋروپالىق ەلدەردىڭ ۇلەسىندە" دەپ اتاپ ءوتتى ماجىلىسمەن.

ايتا كەتەيىك، «داۋلى جەردە جۇرەتىن» دەپۋتات گۇلجان قاراقۇسوۆا بۇعان دەيىن VI شاقىرىلىمىنداعى پارلامەنت ءماجىلىسىنىڭ دەپۋتاتتتاردىڭ «بەيجىڭ سارايى» قوناق ۇيىندە تۇرۋىنا بايلانىستى پىكىرلەرىمەن باسى داۋعا قالعان بولاتىن. بۇل جولى جۋرناليستەردى ايىپتاعان دەپۋتات «جەرىمىزدى جالعا الامىز دەپ كەزەكتە تۇرعان شەتەلدىك ازىرگە جوق" ەكەنىن ايتتى.