اقىن، قوعام قايراتكەرى ولجاس سۇلەيمەنوۆ جەر ساۋداسىنا قاتىستى ءوز ۇستانىمىن ءبىلدىردى، دەپ حابارلايدى Qamshy.kz ازاتتىققا سىلتەمە جاساپ.

جەرگە قاتىستى ويىن ولجاس سۇلەيمەنوۆ الماتىدا ءوزىنىڭ 80 جىلدىق مەرەيتويىنا وراي ءوتىپ جاتقان كونفەرەنسيا كەزىندە ايتقان.

"حالىق جەر ماسەلەسىنە كەلگەندە ءوزىنىڭ شىن نيەتىن تانىتىپ وتىر دەپ ويلايمىن. مۇنى كىمنىڭ باسقارىپ، پايدالانىپ وتىرعانى تۇسىنىكسىز. ءبىراق، مەن ءوزىم جەردى، اۋقىمدى جەر تەلىمدەرىن شەتەلدىكتەرگە ۇزاق مەرزىمگە بەرۋ ءقاۋىپتى دەپ سانايمىن. ويتكەنى، 25، 49 جىل ىشىندە ول جەرلەرگە شەتەلدەردەن جۇمىسشى ادامدار قونىستاندىرىلىپ، ورنىعىپ الۋى مۇمكىن. وندا بۇل ماسەلەنى شەشۋ قيىن بولادى"، - دەيدى اقىن. 

سونداي-اق، اقىن جەر رەفورماسىنىڭ ەلدىڭ تاۋەلسىزدىگىنە دە نۇقسان كەلتىرۋى مۇمكىن ەكەندىگىن، سول ءۇشىن زاڭعا جەردى جالعا بەرۋ مەرزىمىن قىسقارتاتىن وزگەرىستەر ەنگىزۋ كەرەكتىگىن ايتقان.