بۇگىن ماقالا جازۋ بارىسىندا "DDC" دنق ورتالىعىنا حابارلاستىم. بۇل ورتالىق نەگىزىنەن رەسەيدە ورنالاسقان. ال، قازاقستاننىڭ استانا، الماتى قالالارىندا فيليالدارى بار. "الماتىدا بالانىڭ تەگىن انىقتاپ بەرەتىن دنق ورتالىعى جۇمىس جاسايدى" دەپ ماقالا جازباقشى، تەگىن جارناما جاساپ بەرمەكشى بولعان مەن كومپانيا قىزمەتكەرلەرىنىڭ تاراپىنان تەپەرىش كوردىم. سايتتىڭ قازاقشا نۇسقاسى بولماعاندىعىنا شاعىمدانعان مەنى اقىماق-جىندى قىلدى. شاعىمىمدى ساناسىزدىققا بالادى. مەملەكەتتىك ءتىل تۋرالى زاڭدى نازارعا المادى.  جان ايقايىما، ەڭ بولماعاندا، جاندارى اشىمادى. ءسويتىپ، بىرەۋ مەنىڭ بۇكىل ەنەرگيامدى سورىپ العانداي بولدى. ءوزىمنىڭ كىم ەكەنىمدى، نە ىستەپ جۇرگەنىمدى تۇسىنبەي قالدىم. شوكتىڭ اسەرى شىعار... ماقالا جايىنا قالدى. ىزاعا بۋلىقتىم. رەسەي فەدەراسياسىنا، ماسكەۋ قالاسىنا قوڭىراۋ شالدىم. قىزمەتكەرلەرىنىڭ ءسوزىن جەتكىزدىم. باستىقتارىن سۇرادىم. مەنى تەرگەۋگە الدى. تەرگەۋلەرىنە توزىمدىلىك تانىتىپ، ءىستىڭ ءمان-جايىن ايتتىم. رەسەيلىكتەر قازاق ورىستارىنا قاراعاندا مەيىرىمدىلەۋ ەكەن. ەتيكا دەگەننەن حابارلارى جوق ەمەس. مۇڭ-زارىمدى باستىقتارىنا جەتكىزەتىن بولدى (شەتەلدە ەكەن). ءوز كەزەكتەرىندە، قازاق تىلىندە اقپارات كەرەك بولسا، قازاق ءتىلدى ماماندار بار ەكەنىن جەتكىزدى. ءبىراق ول ەندى مەن ءۇشىن ماڭىزدى ەمەس بولىپ قالدى. سايتتارىنىڭ قازاق ءتىلدى نۇسقاسى بولۋىن تالاپ ەتتىم.

استانا، الماتى قالالارىنىڭ قىزمەتكەرلەرىمەن ارامىزدا بولعان ديالوگ:

- dnk-center.kz سايتىن اشىپ وتىرمىن. ءجۋرناليستپىن. سايتتىڭ قازاقشا نۇسقاسى بار ما؟ قازاق تىلىندە اقپارات كەرەك ەدى.

- جوق.

- نەگە؟

- سايتىمىز ورىس تىلىندە. سايتتى قاي تىلدە جاسايتىنىن كومپانيا ءوزى شەشەدى. "قازاق تىلىندە سايتتىڭ نۇسقاسى كەرەك" دەپ تالاپ ەتە المايسىز.

- قىزىق، نەگە؟!

- سەبەبى بۇل ءبىزدىڭ قۇقىعىمىز.

- قازاقستاندا تۇرعاندىقتان قازاقستاندىق كەز كەلگەن اقپاراتتى مەملەكەتتىك تىلدە الۋعا قۇقىلى. ونى بىلمەپ پە ەدىڭىز؟

- كومپانيا اقپاراتتى ءوزى قالاعان ياعني ورىس تىلىندە بەرۋگە، جاريالاۋعا قۇقىلى.

- ورىسشا بىلمەيتىندەرمەن نە ىستەيمىز؟ ولار اقپاراتقا ءزارۋ دەلىك.

- كەرەك بولسا ورىسشا ءتۇسىنىپ الادى.

- تۇسىنبەسە شە؟

- ءوزىنىڭ پروبلەماسى.

- بۇل ءسىزدىڭ وي-پىكىرىڭىز بە؟ الدە بۇكىل كومپانيا اتىنان سويلەپ تۇرسىز با؟

- ءسىز نەگە سونشا شامداناسىز؟! ورىسشا جاقسى-اق سويلەپ تۇرسىز.

- مەن اعىلشىنشا دا سويلەيمىن. ءسىز شە؟

- ازداپ تۇسىنەمىن.

- كومپانيانىڭ شەتەلدە فيليالدارى بار ما؟

- بار.

- لاتۆيا، شۆەسيا، اقش-تاعى سايتتارىڭىز تەك ورىس تىلىندە مە؟

- قازاق تىلىندە اقپارات كەرەك بولسا قازاق ءتىلدى ادمينيستراتوردىڭ ءنومىرىن بەرەيىن.

- مەن قازاقشا بار اقپاراتتى ۋاقىتتى جوعالتىپ، تەلەفون ارقىلى ەمەس سايتتان اق الىپ وقىعىم كەلەدى. وعان نە دەيسىز؟

- مەنەن نە قالايسىز؟

- ەڭ ۇلكەن باستىقتارىڭىزدىڭ ءاتى-جونىن، ءنومىرىن بەرىڭىزشى. ءسىزدىڭ مەملەكەتتىك تىلگە قاتىستى كوزقاراسىڭىزدى باسشىلىققا جەتكىزبەكشىمىن. ولار نە دەيدى ەكەن؟!

- ءاتى-جونى سايتتا كورسەتىلگەن.

- ايتۋ قيىن با؟ ءنومىرى شە؟

- ءنومىرىن بەرە المايمىن.

- بۇل قۇپيا اقپارات پا؟

- بۇل رەسەي كومپانياسى.

- مەيلى اقش-تىكى. ۆاشينگتونعا زۆونداۋعا دايىنمىن.

پاۋزا. تۇتقانى قويا سالدى. تەلەفوننىڭ جالىقتىراتىن گۋىلى ويناي باستادى.

ءسوز سوڭى: مەن كىممىن؟ قايدا تۇرامىن؟ نە ىستەپ ءجۇرمىن ءوزى؟...

جازيرا بايدالى