بۇگىن، 11 قاراشادا كاسىپقوي بوكسشى قانات يسلام اتىراۋداعى سابىر قازىبايەۆ اتىنداعى جەتىمدەر ۇيىندە باردى.
سپورتشى وڭىرگە وبلىستىق دەنە شىنىقتىرۋ جانە سپورت باسقارماسىنىڭ شاقىرۋىمەن كەلگەن.
- ءبىزدىڭ سپورتشىلار قانات يسلامدى وزدەرىنە ۇلگى تۇتادى. ونىڭ جەڭىستەرىنەن شابىت الادى. ايگىلى بوكسشىنى جاستارعا شەبەرلىك كلاسىن وتكىزۋگە جانە بىرنەشە كەزدەسۋلەر ۇيىمداستىرۋ ءۇشىن شاقىردىق، - دەدى دەنە شىنىقتىرۋ جانە سپورت باسقارماسىنىڭ باسشىسى ازامات بەكەت.
قانات يسلام شەبەرلىك كلاسىن وتكىزبەس بۇرىن سابىر قازىبايەۆ اتىنداعى جەتىمدەر ۇيىنە باس سۇقتى. ول بالالارمەن ەركىن اڭگىمە ايتىپ، ولاردىڭ دايىنداپ قويعان كونسەرتىن تاماشالادى. كەزدەسۋ سوڭىندا قانات يسلام بالالارعا پلازمالىق تەلەديدار سىيلادى.
- ءسوزىمنىڭ سوڭىندا سىزدەرگە مىنا ءبىر نارسەنى ايتقىم كەلەدى. ومىردە ءتۇرلى جاعدايلار بولادى. كەيدە سالىڭ سۋعا كەتىپ، ءبارىن تاستاپ جاتىپ العىڭ كەلەدى. ءبىراق مۇنداي كەزدەردە ءوز-وزىڭدى قولعا الىپ، تاباندىلىقتى ودان ءارى ەسەلەي ءتۇسۋ كەرەك. ءبىز تاڭداي قاعىپ جۇرگەن چەمپيوندار جەتىستىككە ءبىر عانا ءپرينسيپتىڭ ارقاسىندا جەتتى. ول - ەشقاشان بەرىلمەۋ. وسى ەرەجەنى ومىرلىك ۇستانىم ەتىپ الاتىن بولساڭدار جەڭىسكە جەتەسىڭدەر، - دەدى قانات يسلام.
كەزدەسۋدەن سوڭ بوكسشى جەرگىلىكتى ستۋدەنتتەرمەن اڭگىمەلەسىپ، جاس سپورتشىلارعا شەبەرلىك كلاسىن وتكىزدى، اتىراۋ وبلىسىنىڭ اكىمى نۇرلان نوعايەۆپەن كەزدەستى.
ايتا كەتەلىك، قانات يسلام 2012 جىلى ءبىرىنشى ورتا سالماقتا WBA Fedecaribe تيتۋلىن جەڭىپ العان. سپورتشى 2008 جىلعى وليمپيادانىڭ قولا جۇلدەگەرى، سپورت شەبەرى. «Astana Arlans» (WSB) كومانداسىنىڭ كاپيتانى بولعان.
ەستەرىڭىزگە سالايىق، 29 قازاندا الماتىدا وتكەن جەكپە-جەكتە قانات يسلام گاانالىق پاتريك اللوتەيدى جەڭگەن ەدى. وسىلايشا، سپورتشى كاسىپقوي بوكستا 22ء-شى جەڭىسىنە قول جەتكىزدى. بوكسشى جەكپە-جەكتەرىنىڭ 18ء-ىن نوكاۋتپەن اياقتاعان.
