كەشە الەۋمەتتىك جەلىسىندە فاريزا اتتى قولدانۋشى كىشكەنتاي ءسابيدى شاپالاقپەن "جاپ مىنا اۋىزدى" دەپ التى ايلىق ءسابيدى ساباپ جاتقان قاتىگەز ايەلدىڭ ۆيدەوسىن سالعان.

بەزبۇيرەك ايەل ۇستالسا، وعان  قىلمىستىق كودەكستىڭ 110-بابى 2-تارماعى («دەنساۋلىققا قاساقانا اۋىر زارداپ كەلتىرۋ») جانە 106-بابى 3-تارماعى («ازاپتاۋ») بويىنشا ءىس قارالىپ، تەرگەۋ امالدارى جۇرگىزىلۋى مۇمكىن،- دەپ حابارلايدى قامشى پورتالى. 

قاتىگەزدىككە تولى  بۇل ۆيدەو بارشا الەۋمەتتىك جەلىلەردى شۋلاتىپ، قوعام نارازىلىعىن تۋدىرعان ەدى. ۆيدەونى ءسابيدىڭ اناسى جۇمىستا بولعاندا 8 جاستاعى قىز ءتۇسىرىپ العان. ال، اياۋسىز ايەل بولسا ەميگرانت جۇمىسشى بولۋى مۇمكىن. ەسىمى كۋرمانبايەۆا ايگۋل كوجاباييەۆنا دەيدى ۆيدەونى ءبولىسۋشى.

وسى ماسەلەگە بايلانىستى پورتالىمىزدىڭ ءتىلشىسى ق ر ىشكى ىستەر مينيسترلىگىنە حابارلاسىپ، رەسمي اقپارات سۇراعان ەدى.  

ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ:

كەشە ينتەرنەت جەلىسىندە كىشكەنتاي بالانى ۇرىپ جاتقان ايەلدىڭ ۆيدەوسى جارىق كورگەن بولاتىن. سول بويىنشا ازاماتشا تۇلعاسىن انىقتاۋ جۇمىستارىن جۇرگىزىپ جاتىرمىز.  وقيعانىڭ انىق-قانىعى بەلگىلى بولعاندا  ماسەلەگە پروسەسسۋالدى باعا بەرىلەتىن بولادى. 

قامشى پورتالىنىڭ تىلشىلەرى بۇل ءىستى ءوز نازارىنا الىپ، رەسمي ۇيىم وكىلدەرىمەن بايلانىستا وتىر.