پاۆلودار وبلىسى، اقسۋ اۋدانى، پارامانوۆكا اۋىلىندا كاسىپكەرلەر مەن جەرگىلىكتى شەتەلدەن كوشىپ كەلگەن قانداستارىمىز اراسىندا كيكىلجىڭ وقيعا ورىن الدى. ناقتىراق ايتساق، بۇل داۋدىڭ باستالعانىنا ءبىر ايدان استى.

   پارامانوۆكا اۋىلىنىڭ تۇرعىندارى اقسۋ اۋدانىنىڭ اكىمى بولات باقاۋوۆقا شاعىمدانۋدا. مامىر ايىنىڭ اياعىنا تامان بەلگىسىز بىرەۋلەر پارامانوۆكا اۋىلى تۇرعىندارىنىڭ 55-كە جۋىق جىلقىسىن تارتىپ اكەتكەن. ۇرلاپ ەمەس، قۋىپ ەمەس، قوراسىندا تۇرعان جەرىنەن تارتىپ العان. بۇل اۋىلدىڭ تۇرعىندارىنىڭ كوبى موڭعوليادان كوشىپ كەلگەن قانداستار. نەسيەگە جىلقى الىپ، سونى كاسىپ ەتىپ وتىرعاندار، ءبىر-اق كۇندە جەپ وتىرعان ناندارىنان، تاۋىپ وتىرعان ءناپاقالارىنان ايرىلىپ قالدى. اتالعان اۋىلدىڭ تۇرعىنى نۇرساۋلە احايدىڭ ايتۋىنشا، ءۇش جارىم ميلليون تەڭگە كرەديت العان. ايىنا سول ءۇشىن 137 مىڭ تەڭگە بانككە تولەيدى. ەندى مىنە، مۇڭ-زارىن كىمگە ايتارىن بىلمەي وتىر. موڭعوليادان كەلگەندەر، ورالماندار سۇيەنەر جەرى، ارقا سۇيەر تىرەگى جوق دەپ باسىنعانى بولار دەيدى كوزى جاستى، كوڭىلى شەرلى، ايدىڭ-كۇننىڭ امانىندا مەنشىكتەرىنەن ايرىلىپ قالعاندار. قۇقىق قورعاۋ ورگاندارىنا شاعىمدانعان جابىرلەنۋشىلەر ولاردان ەش قايران بولمادى دەيدى. ءتىپتى، جىلقىنى تارتىپ اكەتكەندەر قورانىڭ ەسىگىن اشپاسا استانادان ارنايى جاساق الدىرىپ، قىرىپ تاستايمىز دەپ قورقىتقان. اۋىل ادامدارى جىلقىلارىن قالاي تيەپ جاتقان ساتتەرىن ءبارىن ۆيدەوعا، فوتوعا ءتۇسىرىپ العان. قولدارىندا دالەلدەرى بولا تۇرا اق-ادال مالىمىزدى قايتارا الماي وتىرمىز دەيدى. اۋىل تۇرعىندارى جىلقىلارىن «باقىت» شارۋا قوجالىعىنا باققىزادى ەكەن. ال شارۋا قوجالىعىنىڭ باسشىسى سونىڭ الدىندا عانا كورشى شارۋا قوجالىقتان 14 باس جىلقى ساتىپ العان. ارتىنان جىلقىنى ساتۋشىلار مالىمىزدى ۇرلاپ الدىڭ دەپ، قوجالىقتان بولەك اۋىل تۇرعىندارىنىڭ دا جىلقىلارىن الىپ كەتكەن. ال، اقسۋ قالاسىنىڭ اكىمى بولسا جاعداي ءوزىنىڭ تىكەلەي باقىلاۋىندا ەكەنىن، 1 اپتانىڭ ىشىندە مالدارىن قايتارىپ بەرەتىنىن جەتكىزگەن بولاتىن. «نۇر وتان» پارتياسى دا مالدارىن قايتارىپ بەرەمىز دەگەن ۋادە بەرىپتى. ءبىراق، ول ۋادەلەر ۋادە كۇيىندە قالعان.

   P.S. جىلقىلارىن قايتارىپ الۋعا نۇركەنوۆتىڭ شارۋا قوجالىعىنا بارعان جاپا شەگۋشىلەردى شارۋا قوجالىعىنىڭ قىزمەتكەرلەرى پوليسياسىمەن قوسىپ تاس اتىپ قۋىپتى. «سەندەرگە ءبىر جىلقى دا بەرمەيمىز» دەپ ايتىپتى دەگەن مالىمەت الدىق.

  وڭعار قابدەن، كەرەكۋ

ماقالا janaozen.net سايتىنان الىندى

سۋرەت: www.com.kz