ۋكراينادان قۋىلعان پرەزيدەنت يانۋكوۆيچ ۋكراينادا مايدان كوتەرىلىسى بولىپ جاتقاندا اسكەر كىرگىزبەگەنىنە وكىنەدى.

BBCء-دىڭ حابارلاۋىنشا، يانۋكوۆيچ باسپا ءسوز كونفەرەنسياسىندا ۋكرايناعا اسكەري جاعداي ەنگىزۋگە قول قويماعانىنا وكىنەتىنىن ايتقان.

«مەن شىنىمەن دە قاتەلىك جاسادىم، اۋليە ەمەسپىن عوي، ۋكرايناعا اسكەري جاعداي ەنگىزۋگە، اسكەر كىرگىزۋ بۇيرىعىنا قول قويۋعا وزىمە كۇش بەرە الماعانىم باستى قاتەلىگىم بولدى. بۇل راديكالداردى توقتاتۋدىڭ جالعىز شاراسى بولعان بولار ەدى. مەن قانتوگىسكە بارمادىم»، - دەدى دونداعى روستوۆتا وتكەن باسپاسوز-كونفەرەنسياسىندا يانۋكوۆيچ.

ول سونداي-اق، ەگەر سول ۋاقىتقا قايتا ورالار مۇمكىندىك بولسا ءبارىبىر دە ول قۇجاتقا قول قويا المايتىنىن، ۋكراينا قاتتى بولىنگەنىن، ويتكەن جاعدايدا ازاماتتىق سوعىس تۋىلاتىنىن ايتقان.

ۋكراينادان قاشىپ، رەسەيگە باس ساۋعالاعان يانۋكوۆيچ ۋكراينانىڭ تەرريتوريالىق تۇتاستىعىن قولدايتىنىن، ءارى تۇتاستىقتى ساقتاپ قالۋ ءۇشىن دونباسسقا تولىق قۇقىلى اۆتونوميا مارتەبەسىن بەرۋ جانە امنيستيا جاريالاۋ كەرەك ەكەنىن ايتتى. ول بۇل تۇرعىدا ۋكراين بيلىگىن دونباسسپەن كەلىسىمگە كەلۋگە قۇلىقسىزدىعى ءۇشىن ايىپتادى.

«قىرىمنىڭ ۋكراينادان ايىرىلىپ كەتكەنى جاقسى بولدى ما، جوق، مەن جامان بولدى دەپ سانايمىن. قىرىم حالقىنىڭ داۋىسى مايدانداعى پروۆوكاسيانىڭ كەسىرى» دەدى يانۋكوۆيچ.

ايتا كەتەر بولساق، روستوۆ وبلىستىق سوتقا كييەۆتىڭ تەرگەۋىنە ۆيدەو كونفەرەنسيا ارقىلى جاۋاپ بەرۋ ءۇشىن بۇرىنعى پرەزيدەنت كەلۋگە ءتيىستى بولدى. يانۋكوۆيچ سوتقا كەلدى ءارى ۆيدەو بايلانىسقا دا شىقتى. دەگەنمەن كييەۆتەگى سوتتا ايىپتاۋشىلار كەلمەي قالۋىنا بايلانىستى تەرگەۋ 28 قاراشاعا كەيىنگە قالدىرىلعان.

يانۋكوۆيچ سوتتا مايدانداعى بەلسەندىلەردى اتتى دەگەن قىلمىسپەن ايىپتالعان بۇرىنعى 5 «بەركۋت» ارناۋلى جاساعىنا قارسى كۋالىك ەتەدى.

يانۋكوۆيچ باسپاسوز-كونفەرەنسياسىندا مايدانداعى بەلسەندىلەردى اتقان سنايپەرلەردىڭ بەلسەندىلەر باقىلاۋىنداعى عيماراتتان وق اتقانىن، ءوزىنىڭ ەشقانداي دا قارۋلى كۇش قولدانۋعا بۇيرىق بەرمەگەنىن اتاپ ءوتتى.

ۋكراين بيلىگى ونىڭ 2013 قاراشاسى - 2014 اقپانى ارالىعىندا مايدانعا ەرەۋىلگە شىققاندارعا بەيبىت شارا قولدانعانىنا كۇمان كەلتىرەدى.

ۋكراينانىڭ باس پروكۋراتۋراسى ءقازىر يانۋكوۆيچ كۇدىكتى رەتىندە قارالعان 8 قىلمىستىق ءىستى تەكسەرىپ جاتىر. سونداي-اق جەمقورلىق بويىنشا ايىپتالعان.

باسپاسوز-كونفەرەنسياسىندا بۇرىنعى ۋكراين پرەزيدەنتى جەمقورلىق ايىبىن جوققا شىعاردى. ونىڭ سوزىنشە ول ۋكراينادان تەك «قول جۇگىمەن» كەتكەن. قازىرگە دەيىن يانۋكوۆيچتىڭ شەتەلدىك ەسەپشوتتارى انىقتالماعان.

اۋدارعان قارابۋرا قۇلتاي