ەلباسىمىز ن.ءا.نازاربايەۆ جەڭىل ونەركاسىپ سالاسىن جاڭعىرتۋدا ۇلكەن كورەگەندىك تانىتىپ كەلەدى. قازىرگى تاڭدا زامان تالابىنا ساي ەل دامۋىنا قاجەتتى يننوۆاسيالىق باعدارلامالار قابىلدانىپ، ىسكە اسىرىلىپ كەلەدى. قازاقستان رەسپۋبليكاسىنداعى «ارنايى ەكونوميكالىق ايماقتار» تۋرالى 1996 جىلى 26 قاڭتاردا قابىلدانعان زاڭعا سايكەس ءشيتتى-ماقتانى قايتا وڭدەۋ، توقىما ءوندىرىسى مەن تىگىن ونەركاسىبىن دامىتۋ ماقساتىندا «وڭتۇستىك» ارنايى ەكونوميكالىق ايماعىن قۇرۋ جونىندە ۇسىنىس قابىلدانعان. 2006 جىلدىڭ 6 شىلدەسىندە «وڭتۇستىك» ارنايى ەكونوميكالىق ايماعى تۋرالى ەرەجە بەكىتىلىپ، ماڭىزدى قۇجاتقا قول قويىلدى.

مىرزاشولدىك شارۋالار ماقتا قىرمانىن «اق التىنعا» تولتىرىپ جاتىر. اق ماقتانى قىركۇيەك ايىنان باستاپ تەرە باستاعان قوجالىقتار بۇگىنگە دەيىن 53 مىڭ گەكتار ماقتالىقتان 110 مىڭ توننا ءشيتتى ماقتا جيناپ ۇلگەردى. ونىڭ 44 مىڭ تونناعا جۋىعى قولمەن تەرىلسە، 66 مىڭ توننادان استامى ارنايى تەحنيكامەن جينالعان.

تۇسىمدىلىك تە كوڭىل كونشىتەدى. ءار گەكتاردان بولجامدىق شامامەن 24،1 سەنتنەردەن «اق التىن» الىنۋدا. بۇگىنگە دەيىن جالپى ماقتالىق القاپتارىنىڭ 64 پايىزىن جيناعان ماقتاشىلار ءبىرىنشى تەرىمدى اياقتاپ، ەكىنشى تەرىمگە كوشۋدە. ول ءۇشىن اۋدان كولەمىندە 297 دانا ءتۇرلى كومبايندار مەن 10 مىڭنان استام ادام ماقتا تەرىم ناۋقانىنا قاتىسۋدا.

«ماقتانىڭ باعاسى بيىل جامان ەمەس. كەلىسىن 155-160 تەڭگەدەن وتكىزىپ جاتىرمىز. ونىمدىلىگى دە جىلداعىدان ايتارلىقتاي جوعارى. قۇدايعا شۇكىر، بيىل ءبىر بايىپ قالاتىن بولدىق»، — دەيدى شارۋا الدان سارسەنبايەۆ.

ايتا كەتەيىك، بيىل ماقتارالدىق شارۋالار ماقتا القاپتارىنىڭ كولەمىن جىلداعىمەن سالىستىرعاندا 6 مىڭ گەكتارعا ارتتىرىپ، 83 مىڭ گەكتار جەرگە ماقتا ءشيتىن ەكتى. جيىن-تەرىم ناۋقانىنىڭ سوڭىنا دەيىن مىرزاشولدە 200 مىڭ توننادان استام اق ماقتا جيناۋ كۇتىلۋدە.

http://adym.kz/