«قامشى» پورتالى مال ساۋداسىمەن اينالىسقان اعايىندى ءۇش جىگىتتىڭ ولىمىنە قاتىستى ۇزىناعاش اۋىلىندا بولعان قىلمىستىق ءىستى ءجىتى باقىلاپ، وقىرماندارىن اقپاراتتاندىرىپ كەلەدى. جاقىندا عانا، اتالعان قىلمىسقا قاتىستى تەرگەۋ ءىسى اياقتالىپ، قىلمىسقا قاتىستى ءۇشىنشى كۇدىكتى بار ەكەنى بەلگىلى بولعان ەدى.

ۇزىناعاشتاعى ءۇش اعايىنىنىڭ ولىمىنە قاتىستى ايىپتالعاندار قاتارىنا سۇلەيمەنوۆتىڭ ايەلى دە كىرۋى  مۇمكىن. قاراساي اۋدانىندا ءوتىپ جاتقان سوت پروسەسىندە پروكۋرور وسىنداي جايتتىڭ باسىن اشتى. بۇل تۋرالى 31 ارنا حابارلادى. 

تەكسەرۋ بارىسىندا ىستەگى باستى ايىپتالۋشى سۇلەيمەنوۆتىڭ ۇيىنەن اعايىنداردى ولتىرگەن مىلتىقتان باسقا، تاعى ءبىر قارۋدىڭ ساقتالعانى انىقتالعان.

پروكۋرور ۇيدە قارۋدىڭ بار ەكەنىن بىلە تۇرا قىلمىستىڭ الدىن الماعان ونىڭ ايەلىنىڭ دە وقيعاعا قاتىسى بار دەدى.

ەسكە سالا كەتەتىن بولساق، اتالعان وقيعاعا بايلانىستى تەرگەۋ اياقتالىپ سوت باستالار الدىندا جابىرلەنۋشىلەردىڭ تۋىستارى «قامشى» پورتالىنا تەرگەۋ جۇمىستارىندا شيكىلىكتىڭ بار ەكەنىن ايتقان بولاتىن.

«تالعاتتىڭ ايەلى بولسا قارۋ-جاراقتى جاسىرعان ەكەن. ول جاۋابىندا: «18ء-ى كۇيەۋىم ۇيدە بولدى» دەگەن. ال، تالعا ۇيدە بولسا ءبىزدىڭ باۋىرلارىمىزدى كىم ءولتىردى؟»، دەگەن ەدى جابىرلەنۋشى تۋىستارىنىڭ ءبىرى ادال زارلىحان. ايتا كەتەر بولساق، تالعات سۇلەيمەنوۆ تەرگەۋگە بەرگەن جاۋابىندا اعايىندار جوعالعان 18 قىركۇيەكتە ۇيدە بولماعانىن ايتقان. وسىنداي كۇدىكتى جاعدايلاردان جابىرلەنۋشىلەردىڭ تۋىستارى مارقۇمداردى ولتىرگەن قىلمىستىڭ ارتىندا باسقا سىر بار دەپ كەلەدى. ولار بيلىكتەن قىلمىستى تولىق اشىپ، قىلمىسكەرلەردىڭ ءتيىستى جازاسىن بەرۋدى سۇراپ وتىر. 

وقىرماننىڭ ەسىنە سالساق، 18 قىركۇيەكتە الماتى وبلىسى جامبىل اۋدانىندا جوعالعان ءۇش ازاماتتىڭ قىلمىسكەرلەر قولىنان قازا تاپقانى، وسى قىلمىسقا قاتىستى كۇدىكتى رەتىندە 24 قىركۇيەكتە ەكى ازاماتتىڭ ۇستالعانى حابارلانعان بولاتىن. اتالعان ءۇش ازامات، 1979 جىلعى دولدان ۇلى جارقىنبەك، 1973 جىلعى زارلىحان ۇلى مۇقيات پەن ءالىمحان قادىلبەك ەسىمدى جىگىتتەر شىعىس قازاقستان وبلىسىنىڭ تارباعاتاي اۋدانىنان 40 باس مال ساتىپ الىپ، ونى ەكى جۇك كولىگىمەن 17 قىركۇيەك، سەنبى كۇنى، الماتى ماڭىنداعى ۇزىناعاش بازارىنا شىعارعان.

ەرلان تولەۋباي