تاۋەلسىزدىك جىلدارىندا ەلدە اگروونەركاسىپتىك كەشەنى سالاسىن دامىتۋعا ايرىقشا باسىمدىق بەرىلدى. بۇل رەتتە، ق ر پرەزيدەنتى ن. نازاربايەۆ «قازاقستان-2050» ستراتەگياسى قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا ارناعان جولداۋىندا ازىق-تۇلىك قاۋىپسىزدىگىنە تونەتىن قاتەردى جاھاندىق سىن-قاتەرلەر قاتارىنا جاتقىزعان بولاتىن. ياعني، الەمدە حالىق سانى ءوسۋىمىنىڭ جوعارى قارقىنى ازىق-تۇلىك تاپشىلىعى ماسەلەسىن تۋىنداتۋدا. 
بۇل قاتاردا، مەملەكەتتىك 2013-2020 جىلدارعا ارنالعان اگروونەركاسىپ كەشەنىن دامىتۋدىڭ سالاارالىق «اگروبيزنەس-2020» باعدارلاماسى شىمكەنت قالاسىندا اۋىل شارۋاشىلىعى ونىمدەرىنىڭ كولەمىن ارتتىرۋعا ايتارلىقتاي مۇمكىندىك بەرۋدە.
– قازىرگى كەزدە الەم ەلدەرىندە ەكونوميكالىق بەلسەندى حالىقتىڭ 45 پايىزى اۋىل شارۋاشىلىعىمەن اينالىسادى. بۇل باعىتتا، مەملەكەتتىك اۋقىمدا قولداۋ كورسەتىلىپ وتىرعان «اگروبيزنەس-2020» باعدارلاماسىنىڭ ناتيجەسىندە، اگروونەركاسىپتىك كەشەندەگى سۋبەكتىلەر سانىن 4،5 ەسەگە كوبەيتۋ كوزدەلگەن. بۇل قۇجاتتىڭ باسقا باعدارلامالارعا قاراعاندا ەرەكشەلىگى وتە زور. ياعني، الدىمىزدا قالاداعى اگروونەركاسىپتىك كەشەن سۋبەكتىلەرىنىڭ باسەكەگە قابىلەتتىلىگىن ارتتىرۋ مىندەتى تۇر، – دەيدى قالالىق اۋىل شارۋاشىلىعى جانە ۆەتەريناريا ءبولىمىنىڭ باسشىسى عاني قۇرمانباي. 
جالپى، شىمكەنت قالاسىنداعى اۋىل شارۋاشىلىعى ماقساتىنداعى جەر كولەمى 62 219 گەكتاردى قۇرايدى. ياعني، بۇل كورسەتكىش قالا اۋماعىنىڭ 54 پايىزىن يەلەنەدى. نەسىبەسىن جەردەن تەرگەن 4152 اۋىل شارۋاشىلىعى تاۋار وندىرۋشىلەرى تىركەلگەن. جىل بويى اتقارىلعان اۋقىمدى جۇمىستاردىڭ ناتيجەسىندە، جيناپ الىنعان ءونىمنىڭ كولەمى 16 ميلليارد 543 ميلليون تەڭگەنى قۇرادى.
اۋىل شارۋاشىلىعى سالاسىن تۇلەتۋدە كليماتى قولايلى ءارى جەر قۇنارلىلىعى جوعارى شىمكەنت قالاسى بۇگىندە ەل اۋماعىنداعى جىلىجايلاردىڭ وتانىنا بالانادى. وعان جىل سايىن ءونىم كولەمى ۇلعايا تۇسكەن اۋىل شارۋاشىلىعى كەشەندەرىنىڭ ناتيجەسى دە باستى سەبەپ بولۋدا. ياعني، جىلىجايلاردىڭ جالپى كولەمى 123 گەكتارعا ۇلعايدى. جيناپ الىنعان ونىمدەردى ساقتاۋ جانە جىل بويى تۇتىنۋشىلارعا قاجەتىنشە جەتكىزۋ ماقساتىندا سىيىمدىلىعى 45 مىڭ توننا بولاتىن قويمالار دايىندالعان.
وبلىس ورتالىعىندا ازىق-تۇلىك بەلدەۋىن قالىپتاستىرۋ، باعانى تۇراقتاندىرۋ باعىتىندا جاسالعان تىڭ قادامدار ءوز قايتارىمىن بەرىپ تە كەلەدى. قالا تۇرعىندارىن تازا ءارى ارزان كوكونىسپەن قامتاماسىز ەتۋ ماقساتىندا بيىل پايدالانۋعا بەرىلگەن «اسار KZ» شارۋا قوجالىعى جىلىجاي كەشەنىنىڭ ونىمدەرى شىمكەنتتىك تۇتىنۋشىلاردىڭ داستارحان ءمازىرىن تولىقتىرىپ ۇلگەردى. بۇگىندە جىلىجاي كەشەنىنىڭ جالپى كولەمى 4،7 گەكتاردى الىپ جاتىر. قوجالىق باسشىسى باقتىبەك ءابدىحالىقوۆ الداعى ۋاقىتتا جىلىجاي كەشەنىنىڭ كولەمىن مۇنان ءارى دە ۇلعايتا تۇسپەك نيەتتە.

http://shymkala.kz/