وڭتۇستىك قازاقستان وبلىسىندا مال شارۋاشىلىعى بۇگىندە ەل ەكونوميكاسىن تۇلەتۋدە تىڭ سەرپىن بەرەتىن ەلەۋلى كۇشكە اينالدى. ءبىر كەزدەرى قازاق دالاسىندا ميلليونداپ سانالاتىن اشاتۇياقتىلار قاتارى توقسانىنشى جىلدارى ءتىپتى ازايىپ كەتكەن ەدى. «اگروبيزنەس-2020» مەملەكەتتىك باعدارلاماسى شەڭبەرىندە سوڭعى جىلدارى اتالمىش سالاعا جان ءبىتىپ، تامىرىنا قان جۇگىردى. مال شارۋاشىلىعىن وركەندەتۋگە كوڭىل ءبولىنىپ، شارۋاعا قارجىلاي قولداۋ كورسەتىلۋدە. بۇل قاتاردا، مەملەكەتتىك باعدارلامالار – اتا كاسىپتى وركەندەتۋدەگى بىردەن-بىر قولايلى جوبا بولۋدا.
بۇگىندە شىمكەنت قالاسىندا اۋىل شارۋاشىلىعى جانۋارلارىنىڭ جالپى سانى 65 مىڭنان اسىپ جىعىلادى. مەملەكەتتىك «سىباعا»، «التىن اسىق»، «قۇلان» باعدارلامالارى شەڭبەرىندە بيىل شىمكەنتتىك فەرمەرلەر 150 ءىرى قارا مال، 15 اسىل تۇقىمدى بۇقا، 400 ۋاق مال، 70 جىلقى ساتىپ الىپتى. مال بورداقىلاۋ الاڭدارىنىڭ سانى 41-گە ارتسا، 30 جانۇيالىق ءسۇت فەرماسى قىزمەت اتقارۋدا. تيىسىنشە، «پرود&گرۋپ» جانە «مارك» جشس-لەرى ەت ونىمدەرىن وڭدەۋ كولەمىن جىلىنا 1500 تونناعا دەيىن ارتتىرىپ وتىر.
ءيا، مال – باققانعا بىتەدى. ءتورت تۇلىكتى قازاق ەجەلدەن ىرىس ساناعان. كەز كەلگەننىڭ قوراسىنا بىتە بەرمەيتىن بولعان سوڭ دا وسىلاي تۇيىندەگەن بولار. مال راسىندا مىنسە – كولىك، جەسە – تاماق، ىشسە – سۋسىن، كيسە – كيىم. دەمەك، كاسىپتىڭ كوزىن ىزدەگەندەر مال شارۋاشىلىعىنا ويلانباي كىرىسۋىنە بولادى. اسىرەسە، ەل بولىپ، ەڭسە تۇزەگەن تاۋەلسىزدىك جىلدارىنداعى شارۋالاردىڭ جەتىستىكتەرى ەڭبەكتىڭ ەسەلى ناتيجەسى بولارىن دالەلدەپ بەرگەندەي. بۇگىنگى قول جەتكەن جەتىستىكتەر تاۋەلسىزدىكتىڭ جيىرما بەس جىلدىق مەرەيتويىنا لايىقتى تارتۋ بولماق.

http://shymkala.kz/