جۋىردا شىمكەنت قالاسىندا «تۇيە تۇقىمدارى» رەسپۋبليكالىق پالاتاسى قۇرىلىپ، جۇمىسىن باستادى. «تۇيە تۇقىمدارى» پالاتاسىنىڭ ديرەكتورى يسلام احمەتوۆ شارۋاشىلىقتىڭ دامۋى تۋرالى پىكىرىن ءبىلدىردى. «بۇگىندە تۇيە شارۋاشىلىقتارى ەلىمىزدەگى 7 وبلىستا شوعىرلانعان. باتىس قازاقستان وبلىسى، ماڭعىستاۋ، قىزىلوردا، وڭتۇستىك قازاقستان وبلىستارىندا تۇيە باعاتىندار بارشىلىق. تۇيە ەتىنە سۇرانىس جوق دەگەن اقپارات نەگىزىندە جالعان. تۇيەنىڭ ەتىنە دە، سۇتىنە دە، ءتىپتى جۇنىنە دە سۇرانىس جوعارى. ستاتيستيكاعا تۇيە ەتىنىڭ قانشالىقتى وتىمدىلىگى جونىندەگى اقپار ەنبەي قالادى» دەدى ول.

ق ر «اسىل تۇقىمدى مال شارۋاشىلىعى تۋرالى» زاڭىنا 2015 جىلدىڭ 27 قاراشاسىندا وزگەرىستەر مەن تولىقتىرۋلار ەنگىزىلگەنى بەلگىلى. وسى زاڭنىڭ 28 بابىنىڭ 2ء-شى تارماعىنا سايكەس، 2016 جىلدىڭ 26 تامىزىندا «تۇيە تۇقىمدارىنىڭ» رەسپۋبليكالىق پالاتاسى وڭتۇستىك قازاقستان وبلىسىنىڭ ادىلەت دەپارتامەنتىندە زاڭدى تۇلعا رەتىندە تىركەۋدەن ءوتتى. پالاتانىڭ الدىنا قويعان مىندەتتەرى وراسان، ونىڭ باسقى تىزىمىندە: ايماقتارداعى تۇيە تۇقىمدارىنىڭ اسىل تۇقىمدىلارىن تاراتۋ جانە وسى تۇقىمىنىڭ سانىن كوبەيتۋ، تۇيەنىڭ اسىل تۇقىمىنا ستاتۋس بەرۋ، اسىل تۇقىمدىلىق كۋالىگىن بەرۋ، تۇيە تۇقىمدارىن يمپورتتاۋ، بازاعا تىركەۋ، ستاتۋس بەرۋ جانە ساتۋ كەزىندە، زاۋىتشىلارى بەرگەن كورسەتكىشتەردى پالاتانىڭ بەكىتكەن ىشكى ەرەجەلەرىنە سايكەس تەكسەرۋ كىرەدى.
بۇل ماقساتتارعا قاراستىرىلعان بيۋدجەتتىك قاراجات شەگىندە سۋبسيديالاناتىن، ساتىلاتىن ءونىمنىڭ جىل سايىنعى كۆوتاسىن انىقتاۋ، اسىل تۇقىمدى كىتاپتى جۇرگىزۋ جانە باسىپ شىعارۋ دا بار.

http://kazrabat.kz/