الماتىداعى بوستاندىق اۋدانىندا قاردى ۋاقىتىندا تازالاماعان 300 ادامعا ايىپپۇل سالىندى، دەپ حابارلايدى قازاقپارات قالالىق ءىىد باسپا ءسوز قىزمەتىنە سىلتەمە جاساپ.

بوستاندىق اۋدانى ءىىب جەرگىلىكتى پوليسيا ءبولىمىنىڭ تابيعاتتى قورعاۋ پوليسياسى 20-25 قاراشا كۇندەرى «تازا قالا» جەدەل-الدىن الۋ شارالارى اياسىندا جۇرگىزىلگەن رەيدىك تەكسەرۋلەرىن قورىتىندىلادى.   قۇقىق بۇزۋشىلارعا ق ر اقبك 505-بابى - «قالانى اباتتاندىرۋ ەرەجەلەرىن بۇزۋ» بويىنشا حاتتاما تولتىرىلدى، ال كەيبىرىنە اتالعان باپتىڭ ەكىشى بولىگى بويىنشا حاتتاما جاسالدى، ياعني ولار ءبىر جىلدا ەكىنشى رەت اكىمشىلىك قۇقىق بۇزۋشىلىققا جول بەرىپ وتىر. «رەيدىك تەكسەرۋ كەزىندە شاعىن كاسىپكەرلىك نەمەسە كوممەرسيالىق ەمەس ۇيىم سۋبەكتىلەرىنە 28 حاتتاما، جەكە تۇلعالارعا 245 حاتتاما تولتىرىلدى. سونداي-اق، ازاماتتارعا ەسكەرتۋلەر بەرىلدى. جوعارىدا كورسەتىلگەن باپتىڭ سانكسياسىنا سايكەس، جەكە تۇلعالارعا سالىنعان ايىپپۇل كولەمى - 20 اەك، شاعىن كاسىپكەرلىك نەمەسە كوممەرسيالىق ەمەس ۇيىم سۋبەكتىلەرىنە - 30 اەك»، - دەدى بوستاندىق اۋدانى ءىىب جەرگىلىكتى پوليسيا ءبولىمىنىڭ باسشىسى، پوليسيا پولكوۆنيگى ايتجان المۇحانبەتوۆ.