بۇگىندە تابيعاتى اۋىل شارۋاشىلىعى سالاسىنا قولايلى تۇلكىباس اۋدانىندا اسىل تۇقىمدى مال شارۋاشىلىعىن دامىتۋ ەرەكشە قولعا الىنىپ، مال باسى جىلدان جىلعا ارتىپ كەلەدى. اۋدانداعى ءاربىر شارۋاشىلىق اسىل تۇقىمدى مال باسىن ارتتىرۋدى قولعا العان. ويتكەنى اسىل تۇقىمدى مالدار ەتتى جانە ساتۋعا وتە ىڭعايلى.
بۇگىندە اۋداندا اسىل تۇقىمدى ءۇش مىڭنان استام ءىرى قارا مال، سەگىز جۇزگە جۋىق جىلقى بار. ونىڭ ىشىندە وسىدان ءۇش جىل بۇرىن اۆستراليا ەلىنەن اكەلىنگەن جاباعىلى اۋىلىنداعى انگۋس جانە گەرەفورد اسىلتۇقىمدى ءىرى قارا مالدار جەرسىنىپ، تولدەپ مال باسى 800-گە جەتكەن. سونىمەن قاتار كەرەيت اۋىلىنداعى رەسەي، تۇركىمەنستان، قىرعىزستان ەلىنەن اكەلىنگەن سايگۇلىكتەر رەسپۋبليكادا وتكىزىلگەن ءتۇرلى جارىستارعا قاتىسىپ، اۋدان مەرەيىن ۇستەم ەتۋدە. ءقازىر وندا 180-گە تارتا اسىل تۇقىمدى اتتار بار.
جالپى اۋداندا مال شارۋاشىلىعىن دامىتۋ، مالداردى اسىلداندىرۋ مەملەكەتتىك باعدارلامالارى تولىق ورىندالىپ وتىر. ماسەلەن، ءبىر عانا «سىباعا» مەملەكەتتىك باعدارلاماسى بويىنشا بيىلعى جىلعى جوسپاردا 100 باس انالىق الۋ بەلگىلەنگەن بولسا، جارتى جىلدىڭ وزىندە 364 باس انالىق، 12 باس بۇقا ساتىپ الىنىپ، تاپسىرما 3،6 ەسە ورىندالدى. سونىمەن قاتار «التىن اسىق»، «قۇلان» باعدارلامالارى اۋداندا بەرىلگەن مەجەدەن ارتىعىمەن ورىندالۋدا.
بيىلدىڭ التى ايىنداعى مالىمەت بويىنشا اۋداندا شاعىن جانە ورتا بيزنەستە تىركەلگەن كاسىپكەرلەر سانى 7772 بىرلىكتى قۇرادى. شاعىن جانە ورتا كاسىپكەرلىكتە جۇمىس ىستەيتىندەردىڭ سانى 17315 ادامعا جەتىپ، وسى سالادا وندىرىلگەن ءونىم كولەمى 7 ملرد 213 ملن تەڭگەنى، بيۋدجەتكە تۇسكەن سالىق كولەمى 76،8 ملن. تەڭگەگە جەتتى.
پىكىر قالدىرۋ