ەلىمىزدىڭ اۋىل شارۋاشىلىعى سالاسىندا ەلباسىنىڭ تاپسىرماسىمەن قولعا الىنعان بىرنەشە مەملەكەتتىك باعدارلامانىڭ جۇزەگە اسىپ جاتقان امبەگە ايان. سونىڭ ءبىرى – اسىل تۇقىمدى ءىرى قارانى كوبەيتۋدى كوزدەيتىن «سىباعا» باعدارلاماسى. بۇگىندە ۇكىمەت تاراپىنان «سىباعا» باعدارلاماسىنا قاتىسۋشىلارعا قولداۋ قارجىلار كورسەتىلۋدە.
تۇركىستان قالاسى اكىمى اپپاراتىنىڭ باسپا ءسوز قىزمەتى تاراتقان مالىمەتتەرگە سۇيەنسەك، تۇركىستان اۋماعىندا بيىلعى جىلدىڭ جەتى ايىندا «سىباعا» باعدارلاماسى اياسىندا بەس مىڭعا تارتا ءىرى قارا ساتىپ الىنعان. ناقتىلاپ ايتساق، 4993 باس. بۇل بۇل باعىتتا بەرىلگەن تاپسىرمانىڭ ەكى جارىم ەسەگە ارتىق ورىندالعانىن بىلدىرسە كەرەك. ويتكەنى جوسپار بويىنشا جىل باسىنان بەرى تامىز ايىنا دەيىن ەكى مىڭ باس الىنۋى ءتيىس بولعان.
«سىباعا» باعدارلاماسىنىڭ ماقساتى شارۋالار شەتەلدەن جانە ءوز ەلىمىزدەگى ەتتى باعىتتاعى اسىل تۇقىمدى بۇقالاردى ساتىپ الىپ، سەلەكسيالىق جانە اسىل تۇقىمدىق جۇمىستاردى جۇرگىزۋ، الىنعان تولدەردىڭ بۇقاشىقتارىن ارنايى بەلگىلەنگەن شەتەلگە ەكسپورتقا ەت شىعارۋ مۇمكىندىگى بار ءىرى مال بورداقىلاۋ الاڭدارىنا وتكىزۋ (ساتۋ)، ال مال بورداقىلاۋ الاڭدارى ءوز كەزەگىندە ساتىپ العان بۇقاشىقتاردى بورداقىلاپ، ەتىن شەتەلدەرگە شىعارۋى ءتيىس. سەلەكسيالىق جانە ءىرى قارا مالدى اسىلداندىرۋ جۇمىستارىن جۇرگىزۋدىڭ ناتيجەسىندە شارۋالاردىڭ انالىق مالدارى 10-12 جىلدا ەتتى باعىتتاعى اسىل تۇقىمدى مالعا اينالاتىن بولادى.
اتاپ ايتقاندا، ساتىپ الۋ بويىنشا: وتاندىق جانە ەۋروپا ەلدەرىنەن يمپورتتالعان مالدىڭ ءاربىر باسىنا 154 مىڭ تەڭگە، اۆستراليا، اقش جانە كانادادان الىنعان اسىل تۇقىمدى مالعا 200 مىڭ تەڭگە سۋبسيديا، ال سەلەكسيالىق جانە اسىل تۇقىمدىق جۇمىستاردى جۇرگىزگەنى ءۇشىن ءاربىر باس ءىرى قارا مال انالىعىنا 18 مىڭ تەڭگە سۋبسيديا بەرىلەدى جانە بۇقاشىقتاردى بەلگىلەنگەن ارنايى مال بورداقىلاۋ الاڭدارىنا وتكىزگەنى ءۇشىن ءاربىر باسىنا ساتۋ قۇنىنان باسقا 24 مىڭ تەڭگە سۋبسيديا بەرىلەدى.
پىكىر قالدىرۋ