سوزاق اۋدانىندا اۋىل شارۋاشىلىعىن دامىتۋدىڭ «قۇلان»، «سىباعا»، «التىن اسىق»، «اگروبيزنەس – 2020» مەملەكەتتىك باردارلامالارىمەن قاتار وبلىس اكىمىنىڭ باستاماسىمەن قابىلدانعان «2014-2016 جىلدارعا ارنالعان مال شارۋاشىلىعىن دامىتۋ باعدارلاماسى» شەڭبەرىندە اۋقىمدى جۇمىستار اتقارىلۋدا. اتالعان باعدارلامالار اياسىنداعى جۇمىستار اۋدان شارۋالارىن مال بورداقىلاۋعا ىنتالاندىرىپ، كەلەشەكتە تابىس تابۋدىڭ، قوسىمشا جۇمىس ورىندارىن اشۋدىڭ، بىردەن ءبىر كوزىنە اينالۋدا. 

بۇگىندە مەملەكەت تاراپىنان بەرىلگەن مۇمكىندىكتەردى دۇرىس پايدالانعان قاراقۇر اۋىل وكرۋگىندە «قاراقۇر» وندىرىستىك كووپەراتيۆى تۇيە جانە قوي شارۋاشىلىعىن دامىتۋدا. ال، شولاققورعان اۋىل وكرۋگىندەگى «باعدات» شارۋا قوجالىعى تۇيە وسىرۋمەن عانا اينالىسادى. قۇمكەنت اۋىل وكرۋگىنەن «قۇمكەنت» وندىرىستىك كووپەراتيۆى اسىل تۇقىمدى قوي شارۋاشىلىعى بولىپ تىركەلىپ، جۇمىس جاساۋدا.

اۋدان اكىمى ماقسات يسايەۆتىڭ بيىلعى العاشقى التى ايدا اتقارىلعان جۇمىستارىنىڭ ەسەبىنە جۇگىنسەك، «سىباعا» باعدارلاماسى بويىنشا 42 باس اسىل تۇقىمدى بۇقا ساتىپ الىنىپ، مىڭ ەكى جۇزگە جۋىق سيىر تۇقىمدىق تۇرلەندىرىلۋگە تارتىلعان. ال «التىن اسىق» باعدارلاماسى بويىنشا جوسپار الپىس توعىز باس قوشقار ساتىلىپ الىنىپ، ەكى مىڭنان استام تۇساق قويلار تۇقىمدىق تۇرلەندىرىلىپ، مەجە 99 پايىز ورىندالعان. «قۇلان» باعدارلاماسى بويىنشا جوسپارعا سايكەس اسىل تۇقىمدى 14 باس ايعىر مەن 210 باس انالىق جىلقى ساتىلىپ الىنعان.

مال بورداقىلاۋ الاڭدارىن جانە جانۇيالىق ءسۇت فەرماسىن اشۋ ءۇشىن بيىلعى جىلدىڭ ءبىرىنشى جارتى جىلدىعىندا اۋدان بويىنشا بارلىعى 116 ملن. 300 مىڭ تەڭگە نەسيە الىندى. ونىڭ ىشىندە «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنان مال بورداقىلاۋ الاڭدارىن اشۋعا  سەكسەن جەكە كاسىپكەر 80 ملن. 800 مىڭ تەڭگە قارجى الىپ جۇمىسىن جۇرگىزگەن. ولار  538  باس ءىرى قارا مال ساتىپ العان. ال، «ىرىس» ميكرو قارجى ۇيىمى» جشس-نەن بەرىلگەن 12 ملن تەڭگە نەسيەگە ەسەپتى مەرزىمدە 5 جوبا قارجىلاندىرىلىپ، 70 باس مال ساتىپ الىنعان.

http://rgmedia.kz/