2016 جىلدىڭ 9 قاراشاسىندا قازاقستان حالقى اسسامبلەياسى ەتنوسارالىق قاتىناستار ورتالىعى دوستىق ۇيىندە  ت.ك. جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورلارى ءاليا ءالىمجانوۆا مەن مەڭدىعانىم شايمەردەنوۆانىڭ «ناۋرىز مەيرامى: كوكتەمنىڭ، بىرلىكتىڭ، كەشىرىمدىلىك  پەن راحىمدىلىقتىڭ قۇتتى مەيرامى»   اتتى وقۋ قۇرالىنىڭ تۇساۋكەسەرى ءوتتى.

كىتاپتىڭ رەسەنزەنتتەرى – ءال-فارابي ات. قازۇۋ پروفەسسورى ت.ح. عابيتوۆ پەن گ.ت. الدامبەرگەنوۆا. ءىس-شاراعا قازاقستان حالقى اسسامبلەياسىنىڭ مۇشەلەرى، ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلوسوفيا جانە ساياساتتانۋ فاكۋلتەتىنىڭ ءدىنتانۋ جانە مادەنيەتتانۋ كافەدراسىنىڭ وقىتۋشىلارى، ماگيسترانتتارى مەن ستۋدەنتتەرى،  ت.ك. جۇرگەنوۆ اتىنداعى قازاق ۇلتتىق ونەر اكادەمياسىنىڭ ماگيسترانتتارى، باسشىلىعى جانە پروفەسسورلارى، بەلگىلى قوعام قايراتكەرلەرى قاتىستى.

ەلىمىزدىڭ 25 جىلدىق تاۋەلسىز كەزەڭى تاريحىندا قالىپتاسقان كوپەتنوستى قازاقستاندىق قوعامداعى ۇلتتىق مەملەكەتتىلىكتى نىعايتۋدا، مادەني داستۇرلەردى جالعاستىرۋدا مەملەكەتتىك مەرەكەلەردىڭ ءرولى ەرەكشە. سونىڭ ىشىندە ناۋرىز مەرەكەسى – تاريحى تەرەڭنەن باستاۋ الاتىن، ۇرپاقتان ۇرپاققا ميراس ەتىلگەن باي مادەنيەتىمىزدىڭ كورىنىسى، مادەنيەتتەر ساباقتاستىعىنىڭ جەمىسى. ناۋرىز مەيرامى  – تاياۋ شىعىس ەلدەرى، ورتا ازيا حالىقتارى، كۇللى تۇركى دۇنيەسىنىڭ ءدۇبىرلى مەرەكەسى. ناۋرىز – جىل باسى، كۇن مەن ءتۇننىڭ تەڭەلگەن كەزى، اق تۇيەنىڭ قارنى جارىلعان كۇن، سامارقاننىڭ كوك تاسى ءجىبيتىن كۇن، ۇلىستىڭ ۇلى كۇنى. بۇل مەرەكەنىڭ ءدىني بەلگىلەرى جوق بولعاندىقتان كوپۇلتتى، كوپ كونفەسسيالى قازاقستان حالقى ناۋرىزدى ءبىر كىسىدەي تويلايدى. بۇل مەرەكەنىڭ ساياسي، مادەني-الەۋمەتتىك ماڭىزى وتە زور. ناۋرىز مەيرامى – ۇلتارالىق تاتۋلىق پەن كەلىسىمنىڭ، بىرلىك پەن تولەرانتتىلىقتىڭ نىشانى، جاستاردا  پاتريوتتىق سەزىمدى وياتاتىن، ەلىنە، مادەنيەتىنە دەگەن قۇرمەتتى اسقاقتاتاتىن بىردەن ءبىر مەيرام.

ناۋرىز مەيرامىنىڭ تاريحى مەن مازمۇنىن زەرتتەپ، ماڭىزدىلىعىن ايقىنداعان اۆتورلار قازاق مادەنيەتىنىڭ ءداستۇرلى كەزەڭى مەن قازىرگى جاھاندانۋ پروسەستەرى اراسىنداعى ساباقتاستىق يدەياسىن ءبىر وقۋلىققا سىيدىرعان. بۇل ەلىمىزدىڭ قوعامدىق-گۋمانيتارلىق ءبىلىم سالاسىنىڭ دامۋىنا، جالپى دۇنيەتانىمدىق كوكجيەكتىڭ كەڭەيۋىنە، قوعامدا ۇلتارالىق قاتىناستاردىڭ كەلىسىمدەنە تۇسۋىنە اتسالىسادى. قازاقستان حالقىن بىرىكتىرۋشى ۇلتتىق يدەياسىن پايىمداۋداعى سيپاتى كوپەتنوستى حالقىمىزدىڭ ىنتىماقتا ءومىر سۇرۋىنە، ەلىمىزدەگى رۋحاني جانە الەۋمەتتىك كەڭىستىكتى جاڭعىرتۋعا ءوز ۇلەسىن قوساتىندىعىنا سەنىمدىمىن.

تۇرسىن حافيز ۇلى عابيتوۆ

فيلوسوفيا عىلىمىنىڭ دوكتورى، پروفەسسور، اكادەميك

ايبالا ماناپوۆا

قازۇۋ

فيلوسوفيا جانە ساياساتتانۋ فاكۋلتەتى

ءدىنتانۋ جانە مادەنيەتتانۋ كافەدراسىنىڭ

مادەنيەتتانۋ ماماندىعىنىڭ 2 كۋرس ماگيسترانتى