ءبىزدىڭ ەلدە بىلىمدىلەر از، اقىلدىلار ودان دا. ويىن شەبەر جەتكىزەتىن شەشەندەر، الىستى انىق كورەتىن كوسەمدەر كوپ ەمەس.  ءبىراق، سوعان قاراماستان  ءبىزدىڭ ەلدە تانىمالدار، اتاقتىلار، قۇرمەتتىلەر، سۇيىكتىلەر، قالاۋلىلار كوپ. اتتارىنان كەيىن اتاقتارىن اتاپ بىتكەنشە اۋىز اۋىرىپ، ءتىل تالادى. ولاردىڭ باسىم كوپشىلىگى جاس جۇلدىزدار. وزدەرىن وتە سانالى سانايدى. ەگەر از جىلدا جەتكەن جەتىستىكتەرىن ەسكەرسەك، مىقتى ەكەندىكتەرىن مويىندايسىڭ.

كەشە «سونىمەن، سولاي دەيتىن» باعدارلاماعا سول مىقتىلار كەلدى. ىشىندەگى ەڭ ءىرىسى – "سوبچاكتىڭ ءسىڭلىسى" – مارجان. شاشىن الىپ، نەبىر اتاقتىلاردى شاڭ قاپتىردى.  باتىس حالقى مۇنداي ارەكەتكە كوز قىرىن دا سالماس ەدى. ءبىراق الدىڭعى بۋىنى كونسەرۆاتور، كەيىنگى جاستارى جاڭاشىل قازاقستاندا باستىڭ تاقىرلىعى – تاپقىرلىق بولدى. مارجاننىڭ الدىن- الا اقىلعا سالىپ، "ايلاعا" اينالدىرعان  ارەكەتى ءالى كۇنگە دەيىن اياقتالمايتىن اڭگىمەگە ارقاۋ. جۇرتتىڭ جارتىسى جاقتايدى، قالعانى قارالايدى. دەگەنمەن ەكى توپ تا مارجاننىڭ اتاقتى بولۋىنا اتسالىستى.

سول كۇنى ستۋديادا سويلەگەن قوناقتار ەپاتاجدى ارۋدى قولداي قويمادى. كەرىسىنشە، ونىڭ اتاق ءۇشىن جاساعان امالدارىن قاتە دەپ قاتتى دا ايتتى، جۇمساق تا جەتكىزۋگە تىرىستى. قىسقاسى، قولىن الىپ، ارقاسىن قاققان قوناق بولمادى. الايدا، سولاي بولۋى كەرەك تە ەدى. جاقسى وبرازداردى عانا سومداعىسى كەلەتىن ونەر وكىلدەرى كونسەرۆاتور كورەرمەننىڭ كوڭىلىن سۋىتىپ الۋدان ساقتانادى. بىزدىڭشە، مارجاندى ۇناتپاۋ، ونى ايىپتاۋ - قازاقىلىق پەن تاربيەلىلىكتىڭ بەلگىسى. .

ءبىزدىڭ قوعامدا قازاقى ءارى تاربيەلى بولىپ كورىنۋگە تىرىساتىندار جاستار ەمەس. ارينە، الدىڭعى بۋىن ازاماتتار. قاي ەلدە دە وتىزدان اسقاندار اساۋ مىنەزدىڭ الدىن الىپ، بايىپتى بولۋعا بارىن سالادى. قازاقتار دا جاسى كەلگەندە جاقسىعا ۇقساۋعا ۇمتىلادى عوي.   سوندىقتان مارجاننىڭ سويىل الاتىن "سوتقار مىنەزىنە" ءمىن تاعادى. ەگەر ستۋدياعا مەكتەپ جاسىنداعى جەتكىنشەكتەردى شاقىرعاندا كۋميرلەرىن توبەگە كوتەرىپ، وعان وعاش قاراعاندارعا اتىلىپ، ەكى جاق ابىرويدى ايران ەتەتىن ەدى. سوندىقتان باعدارلاماعا كەلگەن قوناقتاردىڭ ەشقايسىسى سۇلتانبايەۆانى قولدامادى ەكەن دەپ، قۋانۋعا بولمايدى. مارجاندى  كورگەن بويدا ارنانى اۋىستارۋعا اسىعاتىن اپاما دا كەشە وسىنى ايتقانمىن. ەكراننىڭ بەرگى بەتىندەگى جاستار جاعى مارجان دەسە ىشكەن اسىن جەرگە قويادى. ءبىز ولاردىڭ كۋميرىن كورگىمىز كەلە مە، جوق پا، جۇمىستارى جوق. باستىسى، كۋميرلەرى بىزدەن باسقا.

ويىن وسىپ تۇرىپ ايتاتىن ارۋعا قاراپ، تانىمال بولۋدىڭ فورمۋلاسى وزگەرگەنىن تۇسىنەسىڭ. بۇگىن بولمىسى قاراپايىم، ءسوزى سالماقتى، ءوزى سۇلۋ قىزدار كورەرمەننىڭ كۋميرى ەمەس. ورەسكەل سويلەيتىن، وتكىر قارايتىن، ءور كوكىرەك كورىنەتىن بويجەتكەندەر الدىڭعىلاردان وق بويى وزىق. جىگىتتەر دە جەتىستىككە جەتكىسى كەلسە تالاپ سول. ءوزىڭدى جاقسى كورىپ، وزگەنى اياما. سوندا اينالاڭ سەنى ارداقتايدى. مادەنيەت، تاربيە، يبا، ۇياتتى ۇمىت. مۇنداي ءقادىرى قالماعان قاسيەتتەردى جاس قازاقتار جاقتىرمايدى. قازاق مەنتاليتەتىنە قارسى شىق. ايتپەسە، جاساندىسىڭ دەپ جاپاتارماعاي جالا جابادى.

مۇنى وقىپ، بايسالدىلار شامدانىپ، شارت بۇلىنبەسىن: «جۇلدىز بولۋ ءبىزدىڭ ماڭدايعا جازىلماعان با؟» دەپ، «اتاق، ابىروي، داڭق اڭداماي سويلەيتىن اقىماقتارعا بۇيىرعان با؟» دەپ. ءبىراق تاعى دا مويىنداۋ كەرەك، جوعارىداعى ءتيپتى اقىماق ادامعا تەلۋگە بولمايدى. ولار اقىلدى، الايدا ميى بىلىمگە ەمەس ايلاعا بەيىم.  ولاردىڭ از ۋاقىتتا جيناعان «ابىرويلارىن» ومىرشەڭ دەپ تە ايتۋ ارتىق. شىنتۋايتىنا كەلگەندە، ەپاتاجدى ازاماتتاردىڭ اۋديتورياسى جيىرماعا دەيىنگى جاستار قاۋىمى. بۋىنا بەكىپ، بۇعاناعى قاتپاعان جەتكىنشەكتەردىڭ قالاۋى اعىسقا قارسى ءجۇزۋ. ەسى كىرمەگەندەر ەرەكشەلىككە ەلىكتەيدى جانە ول ەرەكشەلىك اسقان ەڭبەكتى قاجەت ەتپەيتىن بولسا، وندا ءتىپتى كەرەمەت. «ءوزىمدى نەعۇرلىم ەركىن ۇستاسام، اتا -انانىڭ تىيىمدارىنا ءمان بەرمەسەم، الاماندا الدىدا بولام» دەيتىن كۇماندى كۇشكە سەنەدى. «كۇشتىمىن دەيتىن ءسوزدىڭ وزىندە كۇش بار» دەيدى، كەيبىرەۋلەر. الايدا تەلەارناداعى شوۋ مەن شىن ءومىردى شاتاستىرماۋ كەرەك. كينونىڭ سەناريى سەكىلدى باعدارلامانىڭ دا ماتىننەن باسقا سەناريى بار. جۇلدىزداردىڭ رولدەرى بار. كەلىسىلگەن سۇراق-جاۋاپ، ويلاستىرىلعان وقيعالار بار. مارجاننىڭ اساۋ مىنەزى تەلەارنادا ۇتىمدى كورىنۋى مۇمكىن. الايدا، ءسىز سول  وكتەم مىنەزدى ومىردە كورسەتسەڭىز كوپشىلىك استىڭىزعا كورپە توسەپ، ابىرويىڭىزدى ارتتىرادى دەپ ايتا المايمىن.

شىندىعى سول، شاتاق شىعارىپ اتاققا جەتەتىندەردىڭ مەرەيى مەزگىلىمەن بىتەدى. ەگەر، ولار ەستەرى كىرىپ، ەل قاتارلى ەڭبەك ەتپەسە. نەگە؟ ويتكەنى جاس اۋديتوريا وسەدى. تانىم تەرەڭدەپ، تۇسىنىك تۇراقتايدى. جۇلدىزدار سول قالپىندا قالعانىمەن، تابىنۋشىلاردىڭ تالعامى وزگەرەدى. «جوق، سول ەلىكتەۋدەن شىعا الماي قالادى» دەپ قاۋىپتەنۋلەرىڭىز زاڭدى. ءبىراق پايىم -پاراساتى پىسپەگەندەردىڭ وزدەرى جاسى كەلگەندە جاڭاعى جۇلدىزداردى جاقتىرمايتىنداي كەيىپ كورسەتەدى. سىرت كوز بولىپ، سىنايدى. ايتپەسە، ورتاسى وي ءورىسى وسپەگەن دەپ ويلاۋى مۇمكىن. مۇنداي كەمسىتۋگە ءوزىن-وزى وتە جاقسى كورەتىن قازاق ازاماتىنىڭ پسيحيكاسى شىدامايدى. سوندىقتان سارى ۋايىمعا سالىنۋعا سەبەپ جوق. ال كەلەسى «كەيىنگى بۋىن» جەتكىنشەكتەرى جاساقتالعانشا مىنا «مىنەزدى» جۇلدىزداردىڭ جاسى كەلىپ، كەلبەتى وزگەرەدى. بۇرىنعىداي بۇرىمىن قىرىقسا دا، قىرا المايدى. جاسى كەلگەن سوڭ، تەنتەك مىنەزدى قالاسىن، قالاماسىن تىيۋعا تۋرا كەلەدى. سول كەزدە قازىرگى «شاتاقتى جۇلدىزدار» شىنايى جۇمىس ىستەپ،  ءبىلىمى مەن كاسىبيلىگىن كورسەتەدى نەمەسە جەرگە تۇسەدى.

ماقپال مەيىربەك قىزى

استانا

سۋرەت elarna.kz سايتىنان الىندى