وزبەكستاننىڭ ءبىرىنشى پرەزيدەنتى يسلام كاريموۆتىڭ قازاسىنان كەيىن كوڭىل ايتا بارعان قازاقستان پرەزيدەنتى نازاربايەۆ پەن سول كەزدەگى ۋاقىتشا پرەزيدەنت ميرزيويەۆ. 13 قىركۇيەك 2016 جىل.

وزبەكستان پرەزيدەنتى شاۆكات ميرزيويەۆ قازاقستانعا 22-23 ناۋرىزدا كەلەدى. بۇل تۋرالى ماجىلىستە ۇكىمەت ساعاتىندا سىرتقى ىستەر ءمينيسترى قايرات ءابدىراحمانوۆ مالىمدەدى، دەپ حابارلايدى Qamshy.kz. ونىڭ سوزىنشە، ميرزيايەۆتىڭ ساپارىنان سوڭ استاناعا ورتالىق ازيا ەلدەرىنىڭ "بىرنەشە باسشىلارى" ساپارلاپ كەلەدى.

وتكەن جىلدىڭ جەلتوقسانىندا سايلانعان وزبەكستاننىڭ ەكىنشى پرەزيدەنتى ميرزيويەۆتىڭ العاشقى ساپارى رەسەيگە جاسالاتىنى تۋرالى كوپ ايتىلعان. كەيىن ءبىرقاتار ب ا ق ميرزيايەۆ مەملەكەت باسشىسى رەتىندەگى شەتەلگە العاشقى ساپارىن جىلدىڭ ءبىرىنشى جارتىسىندا استانادان باستايدى دەپ حابارلاعان. ءبىراق ميرزيايەۆ 6-7 ناۋرىزدا تۇركىمەنستانعا بارعان. ساپار قورىتىندىسىندا تۇركىمەنستان پرەزيدەنتى گۋربانگۋلى بەردىمۇحامەدوۆپەن بىرلەسكەن مالىمدەمە قابىلدانعان.

ۇكىمەت ساعاتىندا سويلەگەن ابدراحمانوۆ وزبەكستان باسشىسىنىڭ ساپارى ايماق ەلدەرىنىڭ "ترانسۇلتتىق سيپاتتاعى ماسەلەلەر الدىندا" بىرلىگى جاقسى ەكەنىن كەزەكتى رەت ايعاقتايتىنىن ايتتى.

ايتا كەتەتىن بولساق، وزبەكستانعا ميرزيويەۆ پرەزيدەنت بولىپ كەلگەننەن كەيىن وزبەك ەلى كورشىلەرمەن اشىق قاتىناس ۇستانا باستادى. ءتىپتى ول پرەزيدەنت بولىپ سايلانعانعا دەيىن-اق، ۋاقىتشا پرەزيدەنت كەزىندە قىرعىزستانمەن ارادا شەكارا داۋىنىڭ ءبىراز بولىگىن شەشىپ تاستادى. قازاقستان دا وزبەكتىڭ جاڭا بيلىگى مەن ترانزيتتىك، شەكارالىق بىرنەشە ماڭىزدى كەلىسىمدەر جاساپ ۇلگەردى.