قازاقستاندىق اكتەر، رەجيسسەر نۇرتاس ادامباي قازاق ءتىلىن بىلمەيتىن ادامدارعا قاتىستى ايتىلاتىن سىن-پىكىرلەرگە جاۋاپ بەردى. ءوزىنىڭ فەيسبۋك پاراقشاسىنداعى جازباسىن «قامشى» پورتالى قازاق تىلىنە اۋدارىپ، نازارلارىڭىزعا ۇسىنادى. ەلىمىزدە تازا قازاقشا سويلەي المايتىن قانشاما ازاماتتارىمىزدىڭ بارى شىندىق. جانە ولارعا ايتىلاتىن تەرىس پىكىرلەر دە بارشىلىق. بۇنداي تەرىس پىكىرلەرگە ءنۇرتاس ادامبايدىڭ اشۋى قارا قازانداي.

ولاي بولسا، اكتەر-رەجيسسەردىڭ اۋدارىلعان نۇسقاداعى جازباسى مىناداي:

«مەنىڭ الەۋمەتتىك جەلىدەگى جازبالارىما كوبىنە مىناداي پىكىرلەر كەلىپ تۇسەدى: «قازاقشا نەگە جازبايسىڭ؟»، «قازاقشا سويلە!». ءتىپتى، وسى جاقىندا ءبىر جاسى كەلگەن كىسىنىڭ «بۇل قازاقتىڭ جەرى! قازازقشا سويلەۋ كەرەك!» دەگەن پىكىرىن كوزىم شالدى.  ول كىسىنىڭ سوزىنەن جاي عانا سوگىس ەمەس، اگرەسسيا بايقالدى.

مەن قازاق تىلىنە قاتىستى ايتىلعان وسى سىندى پىكىرلەرگە ءوز جاۋابىمدى ايتۋدى ءجون سانادىم.

ءوز انا ءتىلىن جەتىك بىلمەگەن ادامعا نەگە اسپاننان سالبىراپ تۇسكەندەي قارايسىزدار؟ ءبىز عايىپتان پايدا بولعان جوقپىز عوي. ءوز مەملەكەتىمىزدە قازاق تىلىنەن گورى ورىس ءتىلىن ساپالى ۇيرەتكەندەرى ءۇشىن ءبىز بە كىنالى؟ الدە ول مەكتەپتەردىڭ نەگىزىن قالاعان ءبىز بە ەدىك؟ بۇگىن ءبىزدى سوگىپ وتىرعان قاريالار سول زاماندا قايدا قاراپ وتىردى؟ سول كەزدە ورىس مەكتەپتەرىنىڭ ەمەس، قازاق مەكتەپتەرىنىڭ كوبىرەك سالىنۋىنا نەگە سىزدەر اتسالىسپادىڭىزدار؟ قازاق تىلىندەگى كىتاپتاردىڭ ساپاسىز باسىلىمىنا نەگە سول كەزدە كوڭىل بولمەدىڭىزدەر؟ ءتىپتى، مىنا اۋدارمالارعا قاراپ، قازاق تىلىندە بۇگىننىڭ وزىندە بىرىزدىلىك جوق ەكەنىن بايقاۋعا بولادى: اۋەجاي، ءپالساپا، عالامتور ت.ب.

ءيا، ءار ازامات ءوز مەملەكەتتىك ءتىلىن بىلۋگە مىندەتتى. ءبىراق بۇل ماسەلەنى قوعامدىق داۋعا اينالدىرماۋ كەرەك. كۇشپەن ادامعا جاعا المايسىڭ.

كەيبىر «انا ءتىلىن قۇزداي قورعاۋشىلار» ءوز تىلىندە ەمەس، ورىس تىلىندە سويلەگەندەردى وتانىنىڭ ساتقىنى دەپ ەسەپتەيدى. ءسىزد الدىمەن ول ادامنىڭ ايتىپ جاتقان سوزىنە ءمان بەرىڭىز، سودان كەيىن قاي تىلدە ايتىپ جاتقانىن اڭعارىڭىز.

مەن باسقا تىلدەردەن گورى ورىس ءتىلىن جەتىك مەڭگەرگەنمىن. جانە ورىس ءتىلىنىڭ بەرگەن بىلىمىنە العىس ايتامىن. «قۇدىرەتتى ءتىلدى» ءبىلۋ – ءبىزدىڭ السىزدىگىمىزدى كورسەتپەيدى، كەرىسىنشە كۇشىمىزىدڭ كورسەتكىشى.

وسى ماسەلەگە بايلانىستى سىني-پىكىرلەر بۇرىننان ايتىلىپ كەلەدى. مەن نە ىستەۋ كەرەكتىگىمدى ءوزىم شەشەمىن. ءوز وتانىم مەن حالقىمدى قالاي جاقسى كورەتىنىمە ءوزىم عانا كۋامىن، باسقاسى باسىن اۋىرتپاسىن.

تەك وسى ماسەلەنى باسقا تۇرعىدان تۇسىنەتىندەرگە قاراپ كوڭىلىم قىنجىلادى. ءوز تىلدەرىن دۇرىس مەڭگەرمەي، ءوز مەملەكەتتەرىندە وزدەرىن كەمسىتىپ ۇستايتىن تالاي ادامداردى كەزدەستىردىم. ءتىپتى، ولار قازاقستاننان ءبىرجولا كوشۋدى جوسپارلاپ ءجۇر.

دوستار، بۇل ءبىزدىڭ ورتاق وتانىمىز جانە اركىم ەلىنە تەك جاقسىلىق تىلەيدى.

بۇگىندە ەلىمىز حالىق اراسىنداعى بىرلىككە مۇقتاج. ال، ەلدىڭ ءبارى ءبىرىن-بىرى سوگۋمەن ۋاقىتتارىن وتكىزۋدە.

ادامداردى «تازا قازاقتار» مەن «شالا قازاقتار» دەپ ءبولۋدىڭ قاجەتى قانشا؟ بۇل تاۋەلسىز مەملەكەتتىڭ تۇرعىندارىن ەكىگە بولگەنمەن تەڭ.

بۇگىنگى حالىقتىڭ كوبى ءوز انا تىلدەرىندە سويلەيتىنىنە ءوز باسىم سەنىمدىمىن. الماتى قالاسىنىڭ ەسكى الاڭىندا وتەتىن گاككۋ ارناسىنىڭ جىلدىق كونسەرتىندە كەمىندە 40 مىڭ كورەرمەن قازاقشا اندەردى قوسىلىپ ايتادى. بۇل تاماشا عوي! ءوز مەملەكەتتىك ءتىلىن جەتىك مەڭگەرىپ كەلە جاتقان ۇرپاق ءوسىپ جاتىر، بۇعان قۋانۋىمىز كەرەك. الايدا، بەلگىلى سەبەپتەرمەن قازاق تىلىندە تاربيەلەنبەگەن ادامداردى سوگۋدىڭ قاجەتى جوق.

ءوز مەملەكەتىمدى شەكسىز سۇيەمىن، بولاشاعىنا الاڭدايمىن. بۇنداي سىن-پىكىرلەردىڭ ورىن الۋىنا قارسىمىن. بولاشاقتا ءبارى جاقسى بولادى.

پ.س. «كەلينكا سابينانىڭ» باستى كەيىپكەرى ءبىراز ۋاقىت اۋىلدا تۇرعاندىقتان، ءوز ەركىمەن قازاق ءتىلى كۋرسىنا جازىلدى. ونى ەشكىم قيناعان جوق، ءوزى سولاي شەشتى».