تەرورريزم مەن ەكسترەميزمنىڭ الدىن الۋعا، ۇلتتىق بولمىسىمىزعا قايشى رۋحاني دەرتتەردىڭ بەت-پەردەسىن اشۋعا باعىتتالعان، ءداستۇرلى ءدىنىمىزدى، قازاقى سالت-سانامىزدى دارىپتەيتىن جاڭا كوركەم فيلم كورەرمەنگە جول تارتتى.
بۇلىنگەن تاعدىر، شايقالعان شاڭىراق. فيلم جەلىسى جات اعىمنىڭ جەتەگىندە كەتىپ، قوعامعا سيىسپاي، وقشاۋلانعان جاس جىگىت جايىندا وربىمەك. «اسىل ارنا» تەلەارناسىنىڭ ءتول ءونىمى تولىق مەتراجدى «سەرگەلدەڭ» ءفيلمىنىڭ تۇساۋكەسەرى 13 ناۋرىز كۇنى ءوتتى. باستى رولدەردى سومدايتىن - المات ساقاتوۆ جانە ماقسات ءسابيتوۆ.
«اسىل ارنانىڭ» باس ديرەكتورى، قازاقستاننىڭ ەڭبەك سىڭىرگەن قايراتكەرى، اقىن مۇحامەدجان تازابەك ءوزىنىڭ ينستاگرام پاراقشاسىندا پىكىرىن بىلاي جەتكىزدى: «ويناعىسى كەلەتىن بالا كوپ، ويلانعىسى كەلەتىندەر از، ءتىل بىلەتىن بالالاردى تاربيەلەپ جاتىرمىز، ءتىل الاتىن بالانى كىم تاربيەلەيدى؟ جاستاردىڭ جات اعىمعا ىلەسىپ، اداسۋعا ۇرىنۋىنىڭ نەگىزگى سەبەبى - العاشقى تۋىنداعان ءدىني، رۋحاني سۇراعىندا دۇرىس جاۋاپ تاپپاۋىندا. ياعني، ۇلكەندەرگە تۇسەر سالماق كوپ. ۇلگىمىز ءۇزىلىپ كەتكەلى قاشان؟! بابالار شيراتىپ ۇستاعان ءجىپتى جالعاي الامىز با؟ «سەرگەلدەڭ» ءفيلمى سوعان جاۋاپ ىزدەيدى. اقيقي ءدىن، اتا ءداستۇر، انا سۇتىمەن دارىعان قاسيەتتەر... ەلدىگىمىز ولمەسىن، تەكتىلىگىمىز تۇگەسىلمەسىن!»
قازاق حالقىنىڭ ماقتانىشى - دۋلات يسابەكوۆ اسىل ارنا تۇسىرگەن «سەرگەلدەڭ» فيلمىنە جىلى پىكىر ءبىلدىرىپ، زور تابىس تىلەدى.
Abai.kz پورتالىنىڭ باس رەداكتورى، پۋبليسيست، جازۋشى داۋرەن قۋات پەن ۇلتجاندى ازامات عابيدەن جاكەي، پروفەسسور ايگۇل ءىسماقوۆا، جازۋشى ەرماحان شايحى، باسپاگەر جارىلقاسىن داۋلەت سىندى ەل ازاماتتارى كورەرمەنگە جول تارتقان «سەرگەلدەڭ" ءفيلمىن تاماشالاپ، ءوز ويلارىمەن ءبولىستى.
سونداي-اق، عالىم، قوعام قايراتكەرى، فيلولوگيا عىلىمىنىڭ دوكتورى، پروفەسسور. قازاقستاننىڭ ەڭبەك سىڭىرگەن قايراتكەرى، «پاراسات وردەنىنىڭ» جانە «ءتىل جاناشىرى» قۇرمەت بەلگىسىنىڭ يەگەرى اسىلى وسمانوۆا دا اسىل ارنا ۇجىمىنا تىلەكشى بولىپ، ءفيلمدى تاماشالاپ قايتتى.
اقاپرات مۇحامەدجان تازابەكتىڭ ينستاگرام پاراقشاسىنان الىنعان
پىكىر قالدىرۋ