مامانداردىڭ بولجامى بويىنشا سولتۇستىك قازاقستان وبلىسىنا ۇلكەن سۋ ناۋرىز ايىنىڭ ءسوڭىندا-ساۋىر ايدىڭ باسىندا كەلەدى.
وبلىستىق جۇمىلدىرۋ دايارلىعى جانە ازاماتتىق قورعاۋ باسقارماسىنىڭ باسشىسى نۇرلان بۇركىتاليننىڭ اقپاراتىنا سايكەس (سۋرەتتە)، ايماقتا 14 جەدەل ارەكەتتەنۋ جاساعى مەن 16 ازاماتتىق قورعاۋ قىزمەتى دايىندالدى دەپ حابارلايدى qamshy.kz.
سۋ دەڭگەيىنىڭ كوتەرىلۋى مۇمكىن 95 ەلدى-مەكەن انىقتالدى. ولاردىڭ بارلىعى باقىلاۋعا الىندى. ۇزىندىعى 280 شاقىرىمنان استام 291 اۆتوكولىك جانە تەمىرجول ۋچاسكەسى دە باقىلاۋعا الىنعان.
جەرگىلىكتى اتقارۋشى ورگانداردىڭ بيۋدجەتىنەن كوكتەمگى سۋ تاسقىنىنا قارسى شارالاردى وتكىزۋگە 561 ملن. تەڭگە قاراستىرىلعان.
ەلدى-مەكەندەردەن 918 مىڭ تەكشە مەتر قار شىعارىلدى. ۇستىمىزدەگى جىلى پەتروپاۆلدا العاش رەت قالا شەتىن قاردان تازارتۋ جۇمىستارى ۇيىمداستىرىلدى. قالانىڭ 20-دان استام كوشەلەرىنەن قار تازارتىلدى. ول جۇمىسپەن 9 كاسىپورىن اينالىسادى، 108 بىرلىك تەحنيكا جۇمىلدىرىلدى.
41،1 مىڭ توننا ينەرتتى ماتەريال، 28،4 مىڭ دانا ىدىس-قاپ پەن 139،1 ليتر جانار-جاعار ماي دايىندالدى.
وبلىستىڭ اۆتوكولىك جولدارىندا تاسقىن سۋ وتەتىن 2 مىڭنان استام سۋ وتكىزۋ قۇبىرلارى بار. (بۇگىندە وبلىس اۆتوجولدارىندا 70%-تەن استام قۇبىرلار تازارتىلدى، جۇمىس 20 ناۋرىزعا دەيىن تولىق اياقتالاتىن بولادى).
كوكتەمگى سۋ تاسقىنى كەزەڭى شيەلەنىسۋى مۇمكىن جاعدايدا 2713 ادامنان قۇرىلعان جەكە قۇرام، 827 بىرلىك تەحنيكا، سونىڭ ىشىندە سۋ تارتاتىن 309 بىرلىك تەحنيكا مەن 133 ءجۇزۋ قۇرالدارى جۇمىلدىرىلادى.
وبلىس اۋماعىندا ورنالسقان سۋ قويمالارىنىڭ تولۋى بويىنشا باقىلاۋ جۇرگىزىلۋدە (سەرگەيەۆ سۋ قويماسى 93،9 پايىزعا تولدى (جوبالىق كولەمى 693 ملن. تەكشە مەتر)، پەتروپاۆل سۋ قويماسى 87،8 (24،5 ملن. تەكشە مەتر)).
9-10 ناۋرىزدا پەتروپاۆل قالاسىندا كوكتەمگى سۋ تاسقىنى كەزەڭىندە شارتتى توتەنشە جاعدايلاردى بولدىرماۋ ماقساتىندا «كوكتەم-2017» رەسپۋبليكالىق كوماندالىق-شتابتىق وقۋ-جاتتىعۋلارى ءوتتى.
بۇدان باسقا پەتروپاۆل قالاسىنىڭ كوجيەۆەننىي اۋىلىندا قورعانىس بوگەتى قايتا قۇرىلدى جانە ۇزىندىعى 76 شاقىرىم بولاتىن جەرگىلىكتى ماڭىزى بار اۆتوكولىك جولدارى قالپىنا كەلتىرىلدى. اعىمداعى جىلى بۋلايەۆ قالاسىنداعى كولدى (850 م.) تەرەڭدەتۋ مەن مامليۋت قالاسى ماڭىنداعى كانالدى (200م.) قۇرۋ بويىنشا جۇمىستار جۇرگىزىلدى.
پىكىر قالدىرۋ