اۋتيزممەن اۋىراتىن يليا ەسىمدى بالانىڭ ءبىر كۇنى جايىندا ورىستىڭ bbc جاڭالىقتار قىزمەتىنىڭ ءتىلشىسى جاريالاعان بولاتىن. «قامشى» اقاپاراتتىق اگەنتتىگى ءاۋتيزمى بار بالالار جايىندا، سونداي-اق يليانىڭ ءومىرى جايىندا اقپاراتتى نازارلارىڭىزعا ۇسىنادى.

يليانىڭ جاسى 14-تە. اتا-اناسىمەن جانە ىنىسىمەن ماسكەۋ وبلىسىنداعى پۋشكينو قالاسىندا تۇرادى. اپتاسىنا 3 ۋاقىت ول جەرگىلىكتى مەكتەپ-ينتەرناتىنا بارادى، اپتاسىنا 2 رەت اناسى ماسكەۋ قالاسىنداعى «تۋرمالين» وڭالتۋ ورتالىعىنا اپارىپ تۇرادى.

ول ورتالىقتا ارنايى پەداگوگتار يليا سەكىلدى پسيحولوگيالىق اۋىتقۋشىلىعى بار 4-5 جەتكىنشەكپەن 12 ساعات بويى جۇمىس ىستەيدى.

يليانىڭ كۇندەلىكتى تىرشىلىگى – تاماقتانۋ، ىدىس جۋۋ، قىدىرۋ. ال «تۋرماليندە» دامىتۋ تاپسىرمالارى، ءتۇرلى ويىندار، سونداي-اق باسقا دا ادامدارمەن ارالاسۋ سىندى جۇمىستار جۇرگىزىلەدى.  اۋتيستيكالىق بۇزىلۋى بار بالالار ءۇشىن ەڭ قيىنى – ادامدارمەن جانە قورشاعان ورتامەن تىعىز ارەكەتتەسۋ. بۇل ماقساتتى جۇزەگە اسىرۋ – «تۋرمالين» پەداگوگتارىنىڭ باستى مىندەتى.

يليا تازالىقتى جاقسى كورەدى. اينالاسىندا زاتتاردىڭ شاشىلىپ جاتقانىنان بولەك، ءىس-قيمىلدارىنىڭ دا جيناقى بولعانىن قالايدى. بۇل – ءاۋتيزمى بار ادامداردىڭ بارىنە ءتان قاسيەت. ءومىر ءسۇرۋ قالپىنىڭ بۇزىلۋى ونداي ادامدار ءۇشىن دۇربەلەڭ جاعدايدىڭ تۋۋىنا سەبەپ بولادى.

بولماشى دۇنيەلەردىڭ ءوزى، مىسالى، بولمەسىندەگى ەسىكتىڭ اشىق قالۋى، قىدىرعان اۋلاسىنداعى شاشىلىپ جاتقان قوقىستار – وسىنىڭ ءبارى يليانىڭ اشۋىنا تيەدى ەكەن.

يليا ەشكىممەن ارالاسپايدى. نەگىزى، سويلەي الادى، نەنىڭ نە ەكەنىن جاقسى بىلەدى، تۇسىنەدى. ءبىراق، ونىڭ سويلەگەنى – وزىنە جاڭعىرىق بولىپ قايتا ەستىلەدى. سوندىقتان، وزگەلەرمەن ارالاسپايدى.

ءتىپتى، ولاردى جەرگە تۇسىرگەن جات پلانەتالىق دەسە دە ارتىق ەتپەيدى. سەبەبى، ونداي ادامدار اينالادا بولىپ جاتقان دۇنيەلەردەن بەيحابار.

ءبىر كۇندە باسىنا كوپ اقپارات كەلىپ تۇسەدى، الايدا، ولار ول اقپاراتپەن نە ىستەرلەرىن بىلمەي دال بولادى. ونداي كەزدە ادامداردان قورعانۋ ءۇشىن تىعىلىپ نە قاشىپ كەتكىڭ كەلەدى ەمەس پە؟

الايدا، ولار بايلانىسقا شىققىسى كەلەدى، ءتىپتى، جابىق بايلانىس بولسا دا.

اۋتيزم – ادامنىڭ سىرتقى دۇنيەدەن وقشاۋلانىپ، وزىمەن-وزى بولۋى. ىشتەي سارى ۋايىمعا سالىنۋى، الەۋمەتتىك ورتامەن قارىم-قاتىناستىڭ تولىقتاي ءۇزىلۋى.

باسقا ادامدار ءاۋتيزمى بارلاردى كورسە، بويلارىن الا قاشادى. بارىنشا جاقىنداماۋعا تىرىسادى. كەرىسىنشە، ولارمەن ارالاسىپ، ومىرگە قايتارۋعا تىرىسۋ كەرەك سەكىلدى.