«ادىلەتتى جانە پروگرەسسيۆتى قازاقستاننىڭ حالىقتىق كونستيتۋسياسى ءۇشىن!» كواليسياسى قۇرىلدى
 
بۇگىن ەلوردادا ەلىمىزدىڭ جەتەكشى قوعامدىق-ساياسي كۇشتەرى «ادىلەتتى جانە پروگرەسسيۆتى قازاقستاننىڭ حالىقتىق كونستيتۋسياسى ءۇشىن!» اتتى جالپىۇلتتىق كواليسياعا بىرىكتى. ونىڭ قۇرامىنا بەس جەتەكشى ساياسي پارتيانىڭ وكىلدەرى مەن ميلليونداعان ازاماتتىڭ مۇددەسىن بىلدىرەتىن 300-دەن استام قوعامدىق ۇيىم ەندى.
 
وتىرىسقا قاتىسۋشىلار جاڭا كونستيتۋسيا جوباسى ساياسي جۇيە ارحيتەكتۋراسىن قوعامنىڭ جاڭا سۇرانىسىنا ساي تۇبەگەيلى قايتا جاڭعىرتاتىنىن اتاپ ءوتتى. بۇل بيلىكتىڭ بارلىق تارماعىنىڭ تۇراقتى جۇمىسىن قامتاماسىز ەتەدى.

ءماجىلىس سپيكەرى، جالپىۇلتتىق كواليسيا جەتەكشىسى ەرلان قوشانوۆ اتاپ وتكەندەي، جاڭا كونستيتۋسيا – شىن مانىندە تاريحي قۇجات. وندا ەڭ الدىمەن ادامعا باسىمدىق بەرىلىپ، مەملەكەتتىڭ باستى بايلىعى جەر قويناۋىنداعى رەسۋرستار ەمەس، ءبىلىمدى جاس ۇرپاق ەكەنى ايقىندالدى. بۇل – پرەزيدەنت قولعا العان اۋقىمدى وزگەرىستەردىڭ التىن ارقاۋى. ەندى ول ەڭ جوعارى كونستيتۋسيالىق دەڭگەيدە بەكىتىلۋدە.

«قازاقستاننىڭ جاڭا كونستيتۋسياسى – وسى ىرگەلى رەفورمالاردىڭ شىرقاۋ شىڭى. بۇل – پرەزيدەنتىمىزدىڭ جىلدار بويعى وي-تولعامدارىنىڭ جەمىسى. حالىقتىڭ مۇڭ-مۇقتاجى، تالاپ-تىلەگى مەن ۇمىت-سەنىمى ۇشتاسقان تاريحي قۇجات. سوندىقتان جاڭا كونستيتۋسيا حالىقپەن بىرگە جازىلعان – ناعىز حالىقتىق كونستيتۋسيا دەۋگە تولىق نەگىز بار. ءبىز كەلەر ۇرپاققا ءار ازامات ماقتان تۇتاتىن، وركەندەگەن، ادىلەتتى قازاقستاندى قالدىرۋىمىز كەرەك. ءبارىمىزدى بىرىكتىرەتىن وسى اسقاق ارمان. سول ارمانعا – ادىلەتتى ءارى پروگرەسسيۆتى قازاقستانعا پرەزيدەنتىمىزبەن بىرگە جەتەيىك»، – دەدى ول.

ءوز سوزىندە مەملەكەتتىك كەڭەسشى ەرلان قارين جاڭا كونستيتۋسيانىڭ ماڭىزىنا توقتالدى: «قازاقستان بولاشاقتا ازاماتتارى ءبىلىمدى، عىلىمدى مەڭگەرگەن، يننوۆاسياعا ارقا سۇيەگەن، تەحنولوگياسى دامىعان ەلدەردىڭ قاتارىندا بولۋعا ۇمتىلاتىنىن بايقاتتى. سوندىقتان، بۇل ەلدىڭ وركەندەۋىنە جاڭا سەرپىن بەرەتىن كونستيتۋسيا»، – دەدى ول.

سونداي-اق وتىرىس بارىسىندا «اۋىل» پارتياسىنىڭ ءتوراعاسى سەرىك ەگىزبايەۆ، «اق جول» قازاقستان دەموكراتيالىق پارتياسىنىڭ ءتوراعاسى ازات پەرۋاشيەۆ، «Respublica» پارتياسىنىڭ ءتوراعاسى ايداربەك قوجانازاروۆ، ماجىلىستەگى قازاقستان حالىق پارتياسى فراكسياسىنىڭ جەتەكشىسى ماگەررام ماگەرراموۆ، ءماجىلىس دەپۋتاتتارى، «AMANAT» پارتياسى فراكسياسىنىڭ مۇشەلەرى ەرلان سايروۆ، ءۇنزيلا شاپاق جانە سەرگەي پونوماريەۆ ءسوز سويلەدى.

سونىمەن قاتار «اگروماشحولدينگKZ» اق پرەزيدەنتى دينارا شۇكىجانوۆا، رەسپۋبليكالىق ادۆوكاتتار القاسىنىڭ ءتوراعاسى ءمادي مىرزاعارايەۆ، ساياساتتانۋشى مارات شيبۇتوۆ، «قازاق ءتىلى» حالىقارالىق قوعامىنىڭ پرەزيدەنتى راۋان كەنجەحان ۇلى ءوز ۇستانىمدارىمەن ءبولىستى.

كەزدەسۋگە قاتىسۋشىلار جاڭا كونستيتۋسيا جوباسى مەملەكەتتىڭ ساياسي جۇيەسىن ودان ءارى جاڭعىرتۋعا، الەۋمەتتىك كەپىلدىكتەردى نىعايتۋعا، كاسىپكەرلىكتى قولداۋعا، عىلىمدى، مادەنيەتتى جانە ۇلتتىق قۇندىلىقتاردى دامىتۋعا باعىتتالعان ستراتەگيالىق باعدارعا تولىق سايكەس كەلەتىنىن اتاپ ءوتتى.

سونىمەن قاتار مەملەكەت ينستيتۋسيونالدىق وزگەرىستەر جولىندا ماڭىزدى كەزەڭنەن وتكەنى اتاپ ءوتىلدى: «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى نىعايۋدا، كونستيتۋسيالىق سوت جۇمىس ىستەۋدە، زاڭسىز شىعارىلعان اكتيۆتەر مەملەكەتكە قايتارىلۋدا، ۇلتتىق رەسۋرستاردى ءادىل ءبولۋ قاعيداتى كۇشەيتىلۋدە. بۇل بارلىق شەشىم ادىلدىك، تەڭدىك جانە بولاشاق ۇرپاق الدىنداعى جاۋاپكەرشىلىك قۇندىلىقتارىنا نەگىزدەلدى.

جاڭا نەگىزگى زاڭ قوعامداعى تەرەڭ وزگەرىستەر مەن دۇنيەتانىمى جاڭارعان، مەملەكەتكە جوعارى تالاپ قوياتىن جاڭا بۋىننىڭ قالىپتاسۋىنا جاۋاپ رەتىندە قابىلدانعانى اتاپ ءوتىلدى. وسى ۇمىتتەردىڭ وزەگىندە ادالدىققا، زاڭ ۇستەمدىگىنە، ادامنىڭ قادىر-قاسيەتىنە دەگەن قۇرمەتكە جانە ادام قۇقىعىنا كەپىلدىك بەرۋگە دەگەن سۇرانىس جاتىر. جاڭا كونستيتۋسيا وسى قوعامدىق تالاپتارعا ايقىن ءارى ناقتى جاۋاپ بەرەدى.

سونداي-اق نەگىزگى زاڭ جوباسى قوعاممەن اشىق ءارى اۋقىمدى ديالوگ اياسىندا ازىرلەنگەنى ايتىلدى. كونستيتۋسيالىق كوميسسيا جۇمىسى جاريا تۇردە، تىكەلەي ەفيردە جانە تۇراقتى كەرى بايلانىس ورناتا وتىرىپ جۇرگىزىلدى. وسى ۋاقىت ارالىعىندا ازاماتتاردان، ساراپشىلاردان، كاسىبي قاۋىمداستىقتاردان جانە ءتۇرلى سالا وكىلدەرىنەن 10 مىڭ ۇسىنىس پەن ءوتىنىش كەلىپ ءتۇستى. ولاردىڭ ءارقايسىسى قۇجاتتى ازىرلەۋ بارىسىندا قارالىپ، ەسكەرىلىپ وتىردى.

ءسوز سويلەگەن بارشا ازامات وسى شەشۋشى كەزەڭدە جاڭا كونستيتۋسيانى قابىلداۋدىڭ تاريحي ماڭىزىن قالىڭ جۇرتشىلىق اراسىندا ىلگەرىلەتۋ ءۇشىن قوعامداعى جەتەكشى كۇشتەردى بىرىكتىرۋدىڭ ماڭىزىن اتاپ ءوتتى.

كواليسيا قۇرامىنا ساياسي پارتيالاردىڭ ورتالىق جانە وڭىرلىك قۇرىلىمدارى، رەسپۋبليكالىق قوعامدىق بىرلەستىكتەر، پارلامەنت جانە ءماسليحات دەپۋتاتتارى، عىلىمي جانە ساراپشىلىق قاۋىمداستىق وكىلدەرى، مادەنيەت جانە سپورت قايراتكەرلەرى، كاسىپوداق ۇيىمدارى، سالالىق قاۋىمداستىقتار مەن جاستار بىرلەستىكتەرى كىردى.

جۋىردا كواليسيا مۇشەلەرى وڭىرلەردە ءتۇسىندىرۋ جۇمىسىن باستايدى. الداعى رەفەرەندۋم قارساڭىندا اشىق ديالوگ پەن ازاماتتاردىڭ سانالى تۇردە قاتىسۋىن قامتاماسىز ەتۋ ماقساتىندا ەڭبەك ۇجىمدارىمەن، ساراپشىلار قاۋىمىمەن جانە تۇرعىندارمەن كەزدەسۋ وتكىزۋ جوسپارلانىپ وتىر. سونىڭ ىشىندە شالعاي ەلدى مەكەندەر دە نازاردان تىس قالمايدى. سەبەبى ءاربىر قازاقستاندىق ازاماتتىڭ داۋىسى اسا ماڭىزدى.

 
جالپىۇلتتىق كواليسيانىڭ باسپا ءسوز قىزمەتى
سۋرەتتى تۇسىرگەن: ءالي عالىم