الماتى وبلىسىندا جانتۇرشىگەرلىك قايعىلى وقيعا بولدى، دەپ جازدى قامشى اقپاراتتىق اگەنتتىگى.

31 ارنانىڭ حابارلاۋىنشا، تۋىستارى ەكى كۇن بويى ىزدەگەن نەبارى 9-10 جاسار ەكى بالانىڭ دەنەسى ەسكى ساندىقتىڭ ىشىنەن تابىلدى. الدىن الا جاسالعان بولجام بويىنشا، بالالار تىعىلماق ويناپ ءجۇرىپ، ساندىقتىڭ ىشىندە تۇنشىعىپ قالۋى مۇمكىن دەلىنگەن. الايدا، اتا-انالار بۇل بولجامعا مۇلدەم سەنبەيدى. «تۇنشىققان بولسا، بولمە ىشىندەگى قان ىزدەرى قايدان شىقتى؟» دەيدى. كۇدىك تۋدىرار جايتتار كوپ. ازىرگە ءبارى جۇمباق...

جوعالىپ كەتكەن ەكى بالانى تۋعان-تۋىستارى كۇنى بويى ىزدەپتى. تەك 14 مامىردا تۇنگى 12 كەزىندە ءۇي ارتىنداعى شاعىن سارايدىڭ ىشىندەگى ساندىقتىڭ ىشىنەن ەكى بالانىڭ ءولى دەنەسىن تابادى. ول ساندىقتى پوليسەيلەر ساراپتاما جۇرگىزۋ ءۇشىن وزدەرىمەن بىرگە الىپ كەتىپتى.

ۇزىندىعى 1 مەتر بيىكتىگى 40 سانتيمەتردەن اساتىن شاعىن ساندىق تەمىر قاڭىلتىرمەن قاپتالعان. بالالار كوك ساندىق ىشىندە ءبىرىنىڭ ۇستىندە ءبىرى جاتتى دەيدى كورگەندەر. ساندىق تۇرعان جەردە، كىمدىكى ەكەنى بەلگىسىز، قان ىزدەرى ءالى جاتىر.

«بارسام، ارعى بۇرىشتا ساندىق تۇر ەكەن. ساندىقتىڭ ىشىندە ەكەۋى جاتىر. استىندا ابىلاي جاتىر، ابىلايدىڭ قولى بىلاي، ونىڭ ۇستىنە مەنىڭ بالامدى جاتقىزىپ قويعان. بالام بىلاي بۇكتەلىپ ەكەۋى قۇشاقتاسىپ جاتىر. ءبىز ويلادىق بالا ءتىرى ەكەن دەپ»، - دەيدى قايتىس بولعان ەرمەك ەسىمدى بالانىڭ اكەسى دۋلات كادىربەكوۆ.

الدىن الا مالىمەت بويىنشا، بالالار ويناپ ءجۇرىپ ساندىققا كىرگەن. ال ساندىق قاقپاعىن جاپقاندا ىلمەگى بەكىتىلىپ قالىپ، ەكى ءبۇلدىرشىن تۇنشىعىپ ولگەن. الايدا ابىلاي مەن ەرمەكتىڭ تۋىستارى بۇل نۇسقاعا سەنبەيدى. اسىرەسە، ەرمەكتىڭ اناسى ۇلىنىڭ ولىمىنە كورشىسىنەن جانە ەكىنشى كۇيەۋىنەن كۇدىكتەنەدى.

«سكلادتىڭ ءبارى اشىق جاتىر، شەگە-بالعالار شاشىلىپ جاتتى. ول دا اشۋمەن كەلىپ ءولتىرىپ قويۋى مۇمكىن. ودان دا كۇماندانامىن. مەنىڭ بار شىرىلداعانىم – بالامدى ولتىرگەن ادامدى تاپسا ەكەن دەپ ءجۇرمىن»، - دەيدى ەرمەكتىڭ زار جىلاعان اناسى جانسايا كادىربەكوۆا.

«قانداي جاعداي بولعانىن تۇسىنبەي قالدىق، گرامم تۇسىنبەي قالدىق. كوكتەن كەلدى ما بالالاردىڭ ءولىمى، جۇمباق بولىپ تۇر. ەشتەڭە ايتا الماي تۇرمىز عوي. كىمنەن كورەرىمىزدى بىلمەي تۇرمىز»، - دەيدى ابىلاي ەسىمدى ەكىنشى بالانىڭ اتاسى ءنۇرلان يمانعازييەۆ.

ابىلاي مەن ەرمەكتى وقيعا بولعان كۇنى كوردىم دەگەن جان جوق. قايعىلى وقيعاعا قاتىستى قىلمىستىق ءىستى وبلىستىق ىشكى ىستەر دەپارتامەنتى ءوز باقىلاۋىنا العان. تەرگەۋ اياقتالماعاندىقتان پوليسەيلەر دە تولىق مالىمەتكە ساراڭ.

«ەكى بالانىڭ ولىمىنە قاتىستى بىرنەشە ساراپتاما تاعايىندالدى. وسى ساراپتامالار ناتيجەسىندە وقۋشىلاردىڭ نەدەن قايتىس بولعانى انىقتالادى. ناتيجەلەردى قولعا العان سوڭ، اۋىز تولتىرىپ بىردەڭە ايتۋعا بولادى»، - دەيدى الماتى وبلىستىق ءىىد رەسمي وكىلى كوبەيحان نۇراحمەت.

قوس بالانىڭ ولىمىنەن كەيىن اششىساي اۋىلىنان دا مازا كەتكەن. ولار وقىعان مەكتەپ تە قارا جامىلىپ وتىر. 3-سىنىپتا وقىعان ەرمەك پەن 4-سىنىپ وقۋشىسى ابىلاي تۋرالى ۇستازدارى دا، مەكتەپ باسشىسى دا تەك جاقسى مىنەزدەمە بەردى. ال ەكى بىردەي وتباسىنا قايعى اكەلگەن جۇمباق ءولىمنىڭ قۇپياسى قاشان اشىلارى بەلگىسىز.