جۇڭگو حالىق رەسپۋبليكاسىنىڭ ينتەرنەت اقپارات قۇرالدارىنىڭ ىشىندەگى ىقپالدى، تارالىمى كەڭ ەلەكتروندى اقپارات قۇرالدارىنىڭ ءبىرى بولىپ سانالاتىن «شينلاڭ» (sina.com.cn) سايتىندا قازاق حالقىنىڭ  ءسالت-داستۇرىن بۇرمالاۋ، قورلاۋ، جانە مازاق ەتۋ ماقساتىمەن جازىلعان ماقالا  جارىق كورگەن بولاتىن. «ەستەلىك» رەتىندە جازىلعان ماقالانىڭ اۆتورى  حۇڭ باۋ: «قازاق قوناقشىل حالىق، قوناعىن كۇتكەنى سونداي - قوناعىنا قوي سويىپ، ەت بەرىپ كۇتۋمەن قويماي، قوينىنا ۇزاتىلماعان قىزىن سالىپ بەرەدى!» دەپ، قازاقتىڭ سالت-داستۇرىندە جوق، قازاق حالقىنىڭ ۇلتتىق ار-نامىسىنا تيەتىن جالعان وقيعانى ءوز باسىنان وتكەن شىندىق رەتىندە جاريالادى. حۇڭ باۋدىڭ قازاق حالقىن ماسقارالاۋعا ارنالعان وسى وتىرىگى جۇڭگو ەلىندە تۇراتىن قازاقتاردىڭ عانا ەمەس،  باباقونىسىنداعى قازاقتاردىڭ دا اشۋ-ىزاسىن تۋعىزدى. وكىنىشكە قاراي، بۇل - قحر سايتتارىندا قازاقتى قورلاۋ باعىتىندا جازىلعان ءبىرىنشى ماقالا ەمەس ەكەنىن ەستەرىڭىزگە سالامىز. ءيىسى تۇركى حالقىنىڭ، قالا بەردى كۇللى مۇسىلمان قاۋىمىنىڭ نامىسىن اياققا تاپتاعان وسى جاعدايعا بايلانىستى بۇگىن (دۇيسەنبى كۇنى) تاڭعى ساعات 10:30 دا استانا قالاسىنداعى جۇڭگو ەلشىلىگىنە (قونايەۆ كوشەسى مەن قابانباي باتىر كوشەلەرىنىڭ قيىلسى) ەلىمىزدەگى ساياسات قايراتكەرلەرى مەن زيالى جۇرتىنان، جۋرناليستەر مەن وزگە دە قوعامدىق ۇيىمداردىڭ وكىلدەرىنەن كوپتەگەن ادام قولداپ قول قويعان نارازىلىق حاتىن تاپسىرۋ شاراسىن وتكىزۋگە جينالعان ەدىك.. قحر حالىق ۇكىمەتىنە، قحر سىرتقى ىستەر  مينستىرلىگىنە، قحر-دىڭ قازاقستانداعى باس ەلشىسىنە ارناپ نارازىلىق رەتىندە جازىلعان اشىق حاتتى تاپسىرۋ شاراسىنا استانا قالاسىندا تۇراتىن اقىن-جازۋشىلارعا، جۋرناليستەرگە، ستۋدەنتتەرگە، ت.ب. كوپشىلىك قاۋىمعا ۇندەۋ تاستاعان ەدىك. كەلۋگە ءتيىس دەپ جوسپارلانعان ءبىراز ادامداردىڭ قالتا تەلەفونى «بايلانىس اياسىنان تىس جەردە» بولعانىن ەسەپكە الماعاندا، جۋرناليستەردەن بولەك جينالعان ۇركەردەي توپقا جۇڭگو ەلشىلىگىنەن جولىعاۋعا ارنايى ءۇش ادام شىقتى. كەلگەن ماقساتىمىزدى ايتىپ، حۇڭ باۋدىڭ «شاتپاقتارىنىڭ» تازا جۇڭگو تىلىندە شىققان نۇسقاسىنان جاسالعان كوشىرمەنى، ەل اعالارى قول قويعان اشىق حاتتى كورسەتتىك. سىرتتاعى جينالعان قازاقتاردىڭ سەسىنەن جاسقاندى ما، الدە،  يمپەريالىق كەۋدەسىن كورسەتكىسى كەلدى مە، قايدام، انتالاعان جۋرناليستەردەن، ۆيدو-كامەرالاردان بەتىن قالقالاپ، تۇمىسىعىن جاعاسىنا تىققان جۇڭگو «وكىلدەرى» تەمىر قورشاۋ ىشىنە قايتا قاشىپ كىردى دە،  تايىپ تۇردى. ءسويتىپ، استانا تورىندە، قازاق پەن جۇڭگو ەكى ەل ورتاسىنداعى ءتۇيىندى ماسەلەلەردى شەشىپ، «اربانى دا سىندىرماي، وگىزدى دە ولتىرمەي» ەلشىلىك مىندەتىن اتقارۋعا ءتيىستى جۇڭگو كونسۋلدىعى قازاقتاردىڭ اشۋ-ىزاسىن وياتقان حۇڭ باۋدىڭ «مىلجىڭىنا» بايلانىستى جازىلعان، مەملەكەتارالىق رەنىش تۋدىرۋى مۇمكىن داۋعا الدىن-الا توسقاۋىل قويۋدى نيەت تۇتقان اشىق حاتتى تاپسىرىپ الۋدان رەسمي تۇردە باس تارتتى.  

استانا قالاسى

"اباي" اقپارات