قازاقستانداعى العاشقى سپۋتنيكتىك «Caspionet» تەلەارناسىنىڭ قۇرىلعانىنا 8 جىل بولدى. كاسپيي ارقىلى رەمپۋبليكامىزدى الەم جۇرتشىلىعىنا تانىتىپ كەلە جاتقان ارنانىڭ ەۋروپا مەن ورتا ازيادا، ورتالىق شىعىستا، افريكانىڭ سولتۇستىك جانە رەسەيدىڭ ەۋروپالىق بولىگىندە تۇراتىن 99 ميلليونداي كورەرمەندى اقپاراتپەن قامتۋعا مۇمكىندىگى مول. ءوز جۇمىسىن 2002 جىلدىڭ 25 قازانىندا باستاعان «Caspionet» تەلەارناسى بۇگىنگى تاڭدا شەتەلدەگى قانداس اعايىندار مەن قازاق مادەنيەتىن، ءداستۇرىن، تاريحىن قۇرمەتتەيتىن سىرتتاعى وتانداستارىمىزعا تانىمدىق، اقپاراتتىق جانە مادەني باعدارلامالارىمەن ەتەنە تانىس.
اتالمىش ارنادا ءار ءتۇرلى سالاعا باعىتتالعان تەلەجۋرنالدار دايىندالادى. ولار – «Regional Focus»، (ايماقتاعى اقپاراتتار)«Culture»، (مادەنيەت) «Portraits»، (تۇلعا) «International Dialogue» (ۇلتارالىق ديالوگ) «History»، (تاريح) «Occupations» (ماماندىق) سەكىلدى تۇراقتى ايدارلارمەن بەرىلەتىن شاعىن حابارلار. مۇنان بولەك، جاڭالىقتار، بيزنەس جاڭالىقتار، سپورت باعدارلامالار ۋاقىتىندا جۇرتشىلىق نازارىنا ۇسىنىلىپ وتىرادى.
وسى ورايدا بىرنەشە باعدارلامالارعا توقتالا كەتسەك، تاريحى تەرەڭنەن تامىر تارتقان «اتامەكەن» باعدارلاماسى –كورەرمەن قاۋىمدى ەكى جىلدان بەرى ۇلتتىق ءسالت-داستۇر، مادەنيەتىمىزبەن سۋسىنداتىپ كەلەدى. «CELEBRITY WORLD» (جۇلدىزدار الەمى) – ارتىستەر تۋرالى، ولاردىڭ شىعارماشىلىعى، جەكە ءومىرى جايىندا اڭگىمەلەسە، «KAZAKHSTAN: A RECIPE FOR FRIENDSHIP» (قازاقستان: دوستىق پەن كەلىسىم فورمۋلاسى) – كوپ ۇلتتى مەملەكەتىمىزدە تۇراتىن حالىقتاردىڭ داستۇرلەرى مەن سالتتارى تۋرالى تۇشىمدى مالىمەت بەرەدى. ال «Caspionet» عارىشتىق ارناسىنىڭ جاڭا ماۋسىمعا جوسپارلاپ وتىرعان جاڭالىقتارى جونىندە تەلەارنا ديرەكتورى ايگۇل مۇرات قىزى جۇمابايەۆا بىلاي دەيدى.
- ەلىمىزدىڭ اقيقاتقا نەگىزدەلگەن ءيميدجىن قالىپتاستىرۋ ءۇشىن ءبىزدىڭ مىندەت – رەسپۋبليكادا بولىپ جاتقان ىشكى ەكونوميكالىق، ساياسي جاڭالىقتاردى جانە الەمدىك قوعامداستىققا قازاقستان تاراپىنان ۇسىنىلىپ جاتقان ءتۇرلى جوبالار مەن يدەيالاردى ەكىجاقتى شىنايى اقپاراتتارمەن قالىڭ كورەرمەندى حاباردار ەتۋ. سونداي-اق باعدارلامالار قاتارىن ەفيرگە ۇسىنۋدا العا قويىپ وتىرعان ماڭىزدى جۇمىستاردىڭ ءبىرى – ارنادا قازاق ءتىلىن تەرەڭ دامىتۋعا ءمان بەرىلۋدە. ويتكەنى، شەتەلدە كوپتەگەن قازاق دياسپورالارى تۇرىپ جاتىر، ولاردى اتاجۇرتىمەن تابىستىراتىن كوپىر وسى «Caspionet» ارناسى بولىپ وتىر. ال ەندى، بيىلعى ماۋسىمدا شەتەل جۇرتشىلىعىن قانداي باعدارلامالارىمەن قۋانتادى دەگەن سۇراققا كەلسەك، ءبىزدىڭ كانالدان «STEPPE TALES»، «PERSONA GRATA»، «SOUNDS OF NOMADS»، «LIMITLESS SCIENCE»، «MASTERS OF CREATIVITY» جانە «THE REAL ECONOMY» دەگەن اتاۋلارمەن جاڭا باعدارلامالار قىركۇيەكتىڭ 6-سىنان باستاپ كورسەتىلەدى. بۇل باعدارلامالارعا جەكە-دارا توقتالاتىن بولساق، «STEPPE TALES» باعدارلاماسىندا ارنانىڭ حالىقارالىق رەداكسياسى قىزمەتكەرى دجوناتان نيۋەل، شەتەل ازاماتتىڭ كوزىمەن قازاق تۇرمىسىنداعى ەرەكشلىكتەردى كورسەتەدى. سىرت ەل ازاماتىنا ءبارى قىزىق: جەرگىلىكتى تابيعات، ادامدار، ۇلتتىق دۇنيەتانىم، قازاقستان مادەنيەتى. ول ءوز قولىمەن كيىز ءۇي تىگەدى، قازى اينالدىرادى، ۇلتتىق تاعامدار: قۇرت، جەنت، ىرىمشىكتى جەپ كورەدى. قاراپايىم قازاقستاندىقتارمەن تانىسىپ، تاريحي ەسكەرتكىشتەردى، سپورتتىق جارىستاردى، ءتىپتى، شىعىستىڭ بازارىن ارالاي ءجۇرىپ، كورەرمەندەرمەن العان اسەرلەرىن بولىسەدى.
«PERSONA GRATA» – شەتەلدىك ديپلوماتتارمەن بەيرەسمي سۇحباتتار. ولاردىڭ وتباسى، قارىم-قاتىناس ورتاسى، ساياساتتان تىس ءومىرى، ەلشىلىك مىندەتى، قازاقستانعا دەگەن كوزقاراسى وسى باعدارلاماعا وزەك بولماق.
ال، «SOUNDS OF NOMADS» - قازاقتىڭ ۇلتتىق مۋزىكا اسپاپتارىن ناسيحاتتاپ، ولاردىڭ ەرەكشەلىكتەرىن دارىپتەسە، «LIMITLESS SCIENCE» – قازاقستاندىق عالىمداردىڭ الدىڭعى قاتارلى جاڭالىقتارى، ولاردىڭ ءار سالادا قولدانىلۋى. ياعني، «شەكاراسىز عىلىم» باعدارلاماسى ارقىلى قالىڭ جۇرتشىلىق زەرتحانالارداعى وتە كۇردەلى تاجىريبەرەلەرگە كوز جەتكىزەتىن بولادى. «MASTERS OF CREATIVITY» - ۇلتتىق قولونەرىن، اتا-بابا ءداستۇرىن جالعاستىرىپ جۇرگەن شەبەرلەردى جۇمىسىن كورسەتەدى. ال كەزەكتى، «THE REAL ECONOMY» باعدارلاماسى – ەلىمىزدەگى ەكونوميكالىق جاڭالىقتاردى تەرەڭ تالداپ، مەملەكەتتىك رەفورمالاردى، ەكونوميكاداعى وزگەرىستەر مەن ترانسفورماسيالاردى تۇسىندىرەدى. دالىرەك ايتقاندا، بۇل حاباردا ەلباسىنىڭ شەتەلدەرگە ساپارى بارىسىندا بىرلەسكەن كاسىپورىندارمەن، ءىرى شەتەل ينۆەستورلارىمەن قوس تاراپتىق كەلىسىمدەرىنىڭ ناتيجەسى، قازاقستاندا قولعا الىنىپ جاتقان ەكونوميكالىق باستامالار، سونداي-اق، ەل ەكونوميكاسىنىڭ ءارقيلى سالالارى مەن مۇمكىندىكتەرى تۋرالى جان-جاقتى اڭگىمە ءوربيدى.
جالپى العاندا، «كاسپيونەت» ارناسى شەتەلدە جۇرگەن اعايىنداردى، وتانداستارىمىزدى وسىنداي جاڭا جوبالارىمەن قۋانتقالى وتىر.
«
پىكىر قالدىرۋ