قازاقستان رەسپۋبليكاسىنىڭ قارۋلى كۇشتەرىندە كوكتەمگى شاقىرىلىمنىڭ جاس تولىمى اسكەري انت قابىلدادى.

وتانعا ادال ءارى قالتقىسىز قىزمەت ەتۋ ءۇشىن بەس مىڭعا جۋىق مەرزىمدى قىزمەتتەگى اسكەري قىزمەتشى انت بەردى، دەپ حابارلايدى قامشى اقپاراتتىق اگەنتتىگى ق ر قارۋلى كۇشتەرىنىڭ رەسمي سايتىنا سىلتەمە جاساپ.

 سالتاناتتى شارالار قازاقستان رەسپۋبليكاسى قارۋلى كۇشتەرىنىڭ اسكەري بولىمدەرى مەن قۇرامالارىندا وتكىزىلدى. وتان قورعاۋشىلاردى ومىرلەرىندەگى اتاۋلى كۇنمەن قۇتتىقتاۋعا ق ر قارۋلى كۇشتەرىنىڭ ارداگەرلەرى، اسكەري بولىمدەر مەن مەكەمەلەردىڭ قولباسشىلىعى، اتا-انالارى مەن تۋعان-تۋىسقاندارى كەلدى.

مەرزىمدى قىزمەتتەگى اسكەري قىزمەتشىلەر انت قابىلداعاننان كەيىن كىشى مامانداردى دايارلاۋ باعدارلاماسى بويىنشا جاۋىنگەرلىك وقۋعا كىرىسەدى. جارتى جىلدان سوڭ ولار ارتيللەرياشى، تانكىشى، بايلانىسشى، اتقىش اسكەري ماماندىقتارىن الادى جانە تولىققاندى وتان قورعاۋشىلارمەن يىق تىرەسە ءبىر ساپقا تۇرادى.

11971 اسكەري ءبولىمىنىڭ مەرزىمدى قىزمەتتەگى ساربازى ەردوس تورەباي بىلاي دەيدى: «اسكەردە مىنەز-قۇلقىمدى وزگەرتىپ، ەلىمنىڭ يگىلىگى ءۇشىن قىزمەت ەتكىم كەلەدى. اسكەريلەر اۋلەتىنىڭ وكىلى رەتىندە قازاقستاننىڭ قارۋلى كۇشتەرى قاتارىنا شاقىرىلعانىما قۋانىشتىمىن. ارماندار ورىندالادى جانە بۇگىنگى كۇن سونىڭ جارقىن كورىنىسى».

 قازىرگى ۋاقىتتا اسكەرگە دەنە ءبىتىمى شىنىققان، ءبىلىمدى، مورالدىق تۇرعىدا تۇراقتى بوزبالالار كەلەدى. ارداگەرلەر مەن اسكەري بولىمدەردىڭ كومانديرلەرى ولار داڭقتى جاۋىنگەرلىك ءداستۇردىڭ لايىقتى ۇرپاعىنا اينالىپ، قازاقستان رەسپۋبليكاسىنا قالتقىسىز قىزمەت ەتۋدىڭ ۇلگىسى بولاتىندارىنا كامىل سەنەدى.

2017 جىلعى شاقىرۋ ناۋقانى بارىسىندا قازاقستان رەسپۋبليكاسىنىڭ قارۋلى كۇشتەرىنە، باسقا دا اسكەرلەرى مەن اسكەري قۇرالىمدارىنىڭ قاتارىنا بارلىعى شاقىرىلىم جاسىنداعى 16 مىڭنان اسا ازامات شاقىرىلاتىن بولادى.

شولۋشى: گۇلىم جاقان