قازاقستاننىڭ حالىق ءارتىسى تۇڭعىشباي جامانقۇلوۆقا ۇكىم وقىلدى دەپ حابارلايدى قامشى اقپاراتتىق اگەنتتىگى.

سوت پروكۋرور سۇراعانداي جازا تاعايىندادى.

№2 مەدەۋ اۋداندىق سوتىندا پروكۋرور تۇڭعىشباي جامانقۇلوۆتى 7 جىل 6 ايعا سوتتاۋدى، ءبىراق قازاقستان تاۋەلسىزدىگىنىڭ 25 جىلدىعىنا وراي جاريالانعان راقىمشىلىق بويىنشا جازا مەرزىمىن 3 جىل 7 ايعا ازايتۋدى جانە جاسى جەتكەنىن ەسكەرىپ شارتتى جازا كەسۋدى سۇراعان ەدى.

سوتتاعى اقتىق سوزىندە جامانقۇلوۆ «ءومىرىمنىڭ وسى شاعىندا مۇنداي جاعدايعا تۇسەمىن دەپ ويلاماپپىن. بار ويىم تەك جاقسى فيلم ءتۇسىرۋ عانا بولدى. مەن اقشا جۇمساۋمەن مۇلدە اينالىسپادىم. مەن پروديۋسەر بولدىم. پروديۋسەر دەگەنىمىز يدەيالىق جاعىنان جۇمىلدىرۋشى ادام. وسى جەردە وتىرعان مەنىڭ توبىمدا يۋدينادان باسقا ەشكىم مەنى اقشا الدى دەگەن جوق. مەن - اقپىن. ونى ءسىزدىڭ الدىڭىزدا، قۇدايدىڭ الدىندا ايتا الامىن»، - دەگەن.

ايتا كەتسەك جامانقۇلوۆ كوركەم فيلم تۇسىرۋگە بولىنگەن 69 ميلليون تەڭگە قاراجاتتى جىمقىردى دەگەن كۇدىكپەن جارتى جىل بۇرىن ۇستالعان بولاتىن. ونىمەن قوسا «فەنيكس» ءفيلمى توڭىرەگىندەگى داۋدان رەجيسسەر تالعاد جانىبەكوۆ، "فەنيكس" ءفيلمىنىڭ اتقارۋشى پروديۋسەرى ناتاليا يۋدينا، قازاقفيلم" اق ەكونوميكا جانە قارجى جونىندەگى اتقارۋشى ديرەكتورى گاۋھار ىسقاقوۆا، كارتينا رەداكتورى گيزات سۇلتانوۆ، جەكە كاسىپكەر يليا كوروبەينيكوۆ، كارتينانىڭ ەكىنشى رەجيسسەرى بيجان ابىشيەۆ، "فەنيكس" ءفيلمىنىڭ دايىندىعى كەزىندە ءتۇسىرىلىم توبىن باسقارعان ديرەكتور مارلەن ابىشيەۆ، ج ش س وكىلى دانيار مارات ۇلى ابدىقادىروۆتەر سوتقا تارتىلعان.

سوت ناتاليا يۋدينانى كىنالى دەپ تاۋىپ 7 جىلعا باس بوستاندىعىنىن شارتتى تۇردە ايىردى. ق ر تاۋەلسىزدىگىنە 25 جىل تولۋىنا وراي جاريالانعان راقىمشىلىق بويىنشا جازا مەرزىمىن 5 جىلعا قىسقارتتى. بەس جىل بويى مەملەكەتتىك قىزمەت ورگاندارىندا باسشىلىق قىزمەت اتقارا المايدى. 

تالعاد جانىبەكوۆتى سوت كىنالى  دەپ تاۋىپ 7 جىلعا باس بوستاندىعىنىن شارتتى تۇردە ايىردى. تالعاد جانىبەكوۆ 5 جىل مەملەكەتتىك قىزمەت ورگاندارىندا باسشىلىق قىزمەت اتقارا المايدى.