«ءبىرىڭعاي زەينەتاقى قورىنداعى» قارجى كىسى قولىندا كەتۋدە. تۇرعىنداردىڭ "كارىلىك كەلگەندە كادەمە جارار" دەپ جيناپ جۇرگەن اقشاسى كوممەرسيالىق بانكتەردى قارجىلاندىرۋدا. ءتىپتى قورداعى اقشانىڭ قىزىعىن رەسەي بانكى كورۋدە. «كتك ارناسىنىڭ» حابارلاۋىنشا، بۇل ماسەلەنى دەپۋتات ازات پەرۋاشيەۆ كوتەرگەن.

«قاتارداعى تۇرعىنداردىڭ جيناعان اقشاسىن ءبىزدىڭ ۇلتتىق بانكىمىز دە، «ءبىرىڭعاي جيناقتالعان زەينەتاقى قورى» دا رەسەيدىڭ «سبەربانكىنە» جىبەرىپ جاتىر. ءوزىمىز ءبىلىپ وتىرمىز عوي، رەسەيدە جاعداي قانداي ەكەنىن قازىرگى كەزدە. رۋبل ءتۇسىپ بارا جاتىر. ەگەر، ءوز قارجى جۇيەسىن قۇتقارۋعا، ءبىزدىڭ اقشامىزدى جىبەرسە، ەرتەڭ زەينەتكەرلەرىمىز اقشاسىز قالادى. مىسالى، بيىل وتاندىق قوردان "سبەربانككە" 152 ميلليارد تەڭگە ءبولىنىپتى. ياعني، قاراپايىم جۇرتتىڭ اقشاسى رەسەيدى قارجىلىق قيىندىقتان قۇتقارۋعا جۇمسالۋدا»، - دەپ مالىمدەگەن  دەپۋتات پەرۋاشيەۆ.

دەپۋتات ءوز سوزىندە، "ءبىرىڭعاي زەينەتاقى قورىنداعى" قارجىنىڭ قالعان بولىگى  جالپاق جۇرتقا ءبىر تيىندىق  پايداسى جوق ەكىنشى دەڭگەيلى بانكتەرگە قۇيىلىپ جاتقانىن ايتقان. اركىمنىڭ اي سايىنعى جالاقىسىنىڭ 10 پايىزى كوممەرسيالىق بانكتەردىڭ دەپوزيتى مەن قۇندى قاعازدارىنا سالىناتىنى بەلگىلى. ال، قازىرگىدەي ەكونوميكالىق تۇراقسىزدىق كەزدە بۇل كاپيتالدىڭ قايتارىمسىز، تۇبەگەيلى قۇردىمعا كەتۋى دە مۇمكىن. قاراپايىم تۇرعىنداردىڭ ەسەبىنەن جەكە بانكتەرگە زەينەتاقى قورىنان اقشا ءبولۋدى دوعارۋ كەرەك دەگەن دەپۋتات ءسوزىن قۇپ كورۋگە ابدەن بولادى.

بىلتىرعى جىلى، مارچەنكونىڭ كەزىندە قازاقستانداعى زەينەتاقى قورى ورتالىقتاندىرىلعان بولاتىن. سونىمەن قاتار زەينەتاقى تاعايىنداۋ جۇيەسىنە دە ايتارلىقتاي وزگەرىستەر ەندى. ونسىز دا كۇن ساناپ قۇنى تۇسكەن تەڭگەدەن جىرمىشتاپ، قورعا جيناقتايتىن اقشانى قايتارىمى بولماي قالۋ ءقاۋپى بار سالاعا جۇمساۋعا نەندەي قيسىن بار؟

سبەربانك – رەسەيلىك بانكتىڭ قازاقستانداعى بولىمشەسى. ونىڭ ەلىمىزدىڭ ەكىنشى دەڭگەيلى بانكتەردەن ايىرماشىلىعى تابىسى رەسەيگە كەتەتىندىگى. بۇنى كەز كەلگەن ادام بىلەدى. دەپۋتات كەلتىرگەن دەرەككە ساي، وتاندىق قوردان "سبەربانككە" 152 ميلليارد تەڭگە ءبولىنۋى – اقشانى تەككە شاشۋمەن بىردەي-اق اڭگىمە. بۇنىڭ استارىنان قازاقتىڭ تەڭگەسىن رۋبلگە تاۋەلدى ەتە تۇسۋدەن باسقا ساياسات كورە المايمىز.

ۇكىمەت ادەتتە كوپتەگەن جوبالاردى قولعا الىپ، سىبىرعا ايعاي قوسىپ زاۋىتتار اشىپ جاتادى. سونىڭ بارىنە شەتەلدەن ينۆەستيسيا تارتتىق دەپ شالقاقتايدى. سونداي زاۋىتتاردىڭ، ءوندىرىس وشاقتارىنىڭ باسەكەگە قابىلەتتى، ساپالى تاۋار شىعارا قويمايتىنى ءوز الدىنا، كوپ وتپەي جابىلىپ قالىپ تا جاتادى. زەينەتاقى قورى – از اقشانىڭ قازانى ەمەس. بۇنداعى اقشانى الىپ-ساتارلىق دەڭگەيدەن ارىس اسا المايتىن بانكتەرگە جۇمساعانشا، وتاندىق وندىرىسكە، جەكە كاسىپكەرلىكتى دامىتۋعا، اقشا وتە از بولىنەتىن عىلىم سالاسىنا قاراي باعىتتاۋ كەرەك. ۇكىمەت وسى تۇرعىدان جەدەل شارالار قولدانۋى كەرەك. جىلىكتىڭ مايلى باسىن رەسەيگە ۇستاتا بەرۋدى قوياتىن كەز جەتتى.

نۇرعالي نۇرتاي