بۇل تۋرالى ينۆەستيسيا جانە دامۋ ءمينيسترى جەڭىس قاسىمبەكتىڭ Facebook پاراقشاسىندا حابارلاندى. مينيستر تومەندەگىدەي جازبا جاريالاعان.
دوستار، جاقسى جاڭالىعىمىز بار!
2 شىلدەدەن باستاپ EXPO-2017 حالىقارالىق كورمەسى مەيماندارىنا جاعداي جاساۋ ماقساتىندا «ەير استانا» اۋە كومپانياسى ورىندايتىن استانا–دەلي باعىتى بويىنشا جاڭا حالىقارالىق رەيس اشىلادى. قازاقستان مەن ءۇندىستان استانالارىن بايلانىستىراتىن رەيس اپتاسىنا 3 رەت، دۇيسەنبى، بەيسەنبى جانە جەكسەنبى كۇندەرى قاتىنايدى. حالىقارالىق رەيستى اشۋ ءۇشىن ق ر يدم ازاماتتىق اۆياسيا كوميتەتى مەن ءۇندىستاننىڭ اۆياسيالىق بيلىگى بىرلەسىپ ناتيجەلى جۇمىس اتقاردى.
قازاقستاننىڭ حالىقارالىق ترانزيتتىك حابقا اينالۋى ماڭىزدى قادامداردىڭ ءبىرى. جاڭا حالىقارالىق رەيس مەملەكەت باسشىسى نۇرسۇلتان نازاربايەۆتىڭ 2020 جىلعا دەيىن ەلىمىز ارقىلى وتەتىن ترانزيتتىك جولاۋشىلار اعىنىن 4 ەسەگە دەيىن ۇلعايتۋ جونىندەگى تاپسىرماسىن ورىنداۋ اياسىندا جۇزەگە اسىرىلىپ وتىر.
سوڭعى 7 جىلدا ترانزيتتىك اۋە جولاۋشىلار اعىنى 20 ەسەگە ارتتى. پەرسپەكتيۆالى باعىتتاردىڭ ءبىرى ءۇندىستاننان قازاقستان ارقىلى تمد ەلدەرىنە باعىتتالعان ترانزيتتىك جولاۋشىلار مارشرۋتى. ەكى ەل استاناسى اراسىن جالعايتىن رەيس 2004 جىلدان بەرى «ەير استانا» اۋە كومپانياسى ورىنداپ كەلە جاتقان الماتى – دەلي – الماتى رەيسىن تولىقتىراتىن ءتيىمدى جوبا. سونداي-اق، اتالمىش رەيس حالىقارالىق استانا قارجى ورتالىعى جۇمىسىنىڭ ىلگەرىلەۋىنە سەپتىگىن تيگىزەدى دەپ كۇتەمىز.
ەسكە سالا كەتەتىن بولساق، «EXPO — 2017 Astana» ۇلتتىق كورمەسى اياسىندا قازاقستان ءبىرقاتار باتىس ەلدەرىمەن تىكەلەي رەيستەر اشتى. وعان وتاندىق اۋە كومپانيالاردىڭ قوسقان ۇلەسى زور دەۋگە بولادى. Air Astana اۋە كومپانياسى EXPO — 2017 Astana ۇلتتىق كورمەسىنىڭ رەسمي سەرىكتەسى بولىپ تابىلادى.
