تۋريستىك سالانى دامىتۋدىڭ جاڭارتىلعان تۇجىرىمداماسى بۇگىن ۇكىمەتتە تانىستىرىلدى. ول ەكى كەزەڭ بويىنشا، 2018-2020 جىلدارى جانە 2021-2023 جىلدارى ىسكە اسىرىلماق. جوسپار بويىنشا كەلەر جىلى «قازاقتۋريزم» ۇيىمى قۇرىلادى. ولار وڭىرلەردىڭ ەرەكشەلىكتەرىن ەسكەرىپ، ايماقتىڭ يميدج قالىپتاستىرۋ مەن ماركەتينگ جۇمىستارىن جۇرگىزۋ ءىسىن قولعا الىپ، قاي وبلىستا قانداي دەمالىس ۇيىمداستىرىلاتىنىن جانە تۋريستىك باعىت بولاتىنىن بەلگىلەيدى. ازىرگە التى وڭىرلىك مادەني-تۋريستىك كلاستەر انىقتالعان. 

ارىستانبەك مۇحامەدي ۇلى، ق ر مادەنيەت جانە سپورت ءمينيسترى:

ء-قازىر تۋريستىك سالادا ءبىزدىڭ تۇجىرىمدامانى، كونسەپسيانى ءبىرىنشى رەت قابىلداپ جاتىرمىز. قازاقستانعا وسى سالادا كەلەتىن ينۆەستورلار بار. ول بىزگە وتە كەرەك. كەرەمەت ورىندارىمىزدى ءارى قاراي دامىتۋ ءۇشىن ءبىز ينۆەستورلاردى اكەلۋىمىز كەرەك. وسى سياقتى كوپتەگەن ناقتى قادام بار.

ماسەلەن، شىعىس قازاقستان وبلىسىندا تۋريستىك كلاستەردى دامىتۋ بويىنشا 40-تان استام جوبا ىسكە اسىرىلۋدا. اتاپ ايتساق، كونە تاريحي مەكەندەردەگى ارحەولوگيالىق زەرتتەۋلەرگە 150 ملن تەڭگە بولىنگەن. سونداي-اق رۋحاني جاڭعىرۋ باعدارلاماسى اياسىندا وسكەمەن وڭىرىندە تۋريستەر ارالاي الاتىن كيەلى جەرلەر كارتاسى ازىرلەنۋدە. ول 4 اي ىشىندە دايىن بولادى. بۇعان قوسا، ايگىلى الاكولدى قايتا جاڭعىرتۋ جوسپارلانۋدا. دەمالىس ورنىندا بۇگىندە قوناق ءۇي، مەيرامحانا سەكىلدى 140 نىسان قايتا قالپىنا كەلتىرىلۋدە. ونىڭ 82ء-سى بۇگىندە مەيمان كۇتۋگە ءازىر.

دانيال احمەتوۆ، شىعىس قازاقستان وبلىسىنىڭ اكىمى:

ء-قازىر اۋماقتىڭ ينفراقۇرىلىمىن دامىتۋعا 550 ميلليون تەڭگە قاراستىرىلىپ، 1 ميلليارد 400 ميلليون تەڭگەگە جول جانە كوممۋنيكاسيالار تارتىلادى. الاكولدىڭ جىلىنا 2 ميلليون ادام قابىلدايتىن قاۋقارى بار. ءقازىر وسى اۋماقتا ءتۇرلى ويىن-ساۋىق قىزمەتتەرىن كورسەتەتىن ورىندار، مەيرامحانا مەن كۋرورتتىق نىساندار سالۋ ءۇشىن ينۆەستورلار تارتىلۋدا.

ال الماتى قالاسىنىڭ تۋريستتىك الەۋەتى قىسقى ۋنيۆەرسيادانى وتكىزۋمەن جاقساردى. ماسەلەن، شىمبۇلاق پەن مەدەۋ شاتقالىنا وتكەن جىلى 800 مىڭنان استام دەمالۋشى كەلگەن. ياعني كۇنىنە 10 مىڭعا جۋىق ادام تاۋعا شىعىپ، شاڭعى تەپكەن. قالا اكىمى باۋىرجان بايبەكتىڭ سوزىنشە، كەلۋشىلەردىڭ كوبى – شەتەلدىكتەر. «ەندى جاڭا تۇجىرىمداما نەگىزىندە تۋريستىك وپەراتورلاردى ىشكى ءتۋريزمدى دامىتۋعا بەت بۇرعىزباقپىز»، – دەيدى شاھار باسشىسى.

باۋىرجان بايبەك، الماتى قالاسىنىڭ اكىمى:

-بۇگىندە الماتىدا 569 تۋريستىك ۇيىم بار. ولاردىڭ دەنى شەتەلدىك دەمالىس ورىندارىمەن جۇمىس ىستەيدى. ماسەلەن، جىل سايىن وڭتۇستىك استانادان سىرتقا 3 ميلليونعا جۋىق ادام ساپارلايدى. ەندى تۋريستىك اگەنتتىكتەردىڭ قىزمەتىن وتاندىق دەمالىس ورىندارىمەن ءتۇيىستىرىپ، ىشكى تۋريزم فورماتىن جەتىلدىرۋ ءىسىن قولعا الامىز.

شىرايلى شىمكەنت جاقتاعى تۇركىستان مەن وتىرارعا دا بارۋشىلار كوپ. تەك ءبىر قوجا احمەت ياسساۋي كەسەنەسىن جىلىنا 1 ميلليوننان استام ادام زيارات ەتەدى ەكەن. بۇدان باسقا، «قازاقتىڭ شۆەيسارياسى» دەپ اتالعان بۋرابايعا دا شەت-شەتتەن تۋريستەر كوپ اعىلادى. اسىرەسە ەلىمىزگە رەسەي، جۇڭگو، تۇركيا، ازەربايجان مەن گرۋزيا، ءتىپتى يراننان دا دەمالۋشىلار كەلەدى ەكەن.

جالپى تۋريستىك الەۋەتتىڭ ارتۋى ترانزيتتىك لوگيستيكانىڭ دامۋىمەن تىكەلەي بايلانىستى. ماسەلەن، سوڭعى 5 جىلدا رەسپۋبليكالىق ماڭىزى بار 34،2 مىڭ كم اۆتوموبيل جولدارى، ونىڭ ىشىندە «نۇرلى جول» مەملەكەتتىك باعدارلاماسى اياسىندا 1،3 مىڭ شاقىرىم جول سالىنعان. تەمىرجول جەلىلەرىنىڭ ۇزىندىعى 1 854 كم-گە ۇلعايدى. سونداي-اق ەلىمىزدەگى جۇمىس ىستەپ تۇرعان 18 اۋەجايدىڭ 15-ىندە جوندەۋ جۇرگىزىلىپ، 11 جولاۋشىلار تەرمينالى سالىندى.

جەڭىس قاسىمبەك، ق ر ينۆەستيسيالار جانە دامۋ ءمينيسترى:

-وسىلايشا، 2016 جىلدىڭ قورىتىندىسى بويىنشا قازاقستان دۇنيەجۇزىلىك بانكتىڭ «لوگيستيكا تيىمدىلىگى يندەكسى» رەيتينگىسىندە «ينفراقۇرىلىم ساپاسى» كورسەتكىشى بويىنشا 106-دان 65-ورىنعا جوعارىلاپ، پوزيسياسىن جاقسارتتى. ەندى سالىنعان جولدار نەگىزىندە ينفراقۇرىلىمىن دامىتۋ كوزدەلۋدە.

ينفراقۇرىلىم دەمەكشى، بۇگىندە جول بويىنداعى قىزمەت ورتالىقتارىندا، ياعني قوناق ءۇي، مەيرامحانالار مەن كەمپينگتەردە ەل بويىنشا 25 مىڭنان استام ادام جۇمىس ىستەيدى. بۇل كەشەندەردىڭ سانى بيىل دا ۇلعايادى. ۇكىمەت تاپسىرماسى بويىنشا، ەندى قىزمەت كورسەتۋ ورتالىقتارى ءبىر ۇلگىدە سالىناتىن بولادى.

ەرمەك عيزاتوۆ، «قازاۆتوجول» ۇك» اق باسقارما ءتوراعاسى:

-بىركەلكىگە كەلتىرۋ تۋرالى شەشىم بىلتىردان بەرى بار. مينيسترلىكتىڭ شەشىمىمەن بەكىتىلگەن. سول بويىنشا 30 وبەكت قازاقستاندا باستالدى. ءقازىر قاراعاندى، اقمولا، پاۆلودار، الماتى وبلىستارىندا جۇمىستار باستالىپ جاتىر. بيىلعى جىل اياعىندا 6 كومپلەكس جۇمىسى ىسكە قوسىلادى. ەندىگى جىلى قالعان 24ء-ىن قوسىپ بىتەمىز.

ۇكىمەت تۋريستەرگە جاعدايدى جەڭىلدەتۋ ءۇشىن ۆيزالىق كوشى-قون ساياساتىن رەتتەۋ مەن اۋە قاتىناستارىن دامىتۋ بويىنشا جۇمىستاردى جالعاستىرىپ جاتىر. ماسەلەن، ەلگە ۆيزاسىز كىرە الاتىن ەلدەردىڭ ءتىزىمى 63 مەملەكەتكە دەيىن ۇلعايعان. سونداي-اق ءقازىر استاناداعى نۇرسۇلتان نازاربايەۆ حالىقارالىق اۋەجايىندا «اشىق اسپان» رەجيمى قولدانىستا. جيىن سوڭىندا پرەمەر-مينيستر باقىتجان ساعىنتايەۆ كوشى-قون پوليسياسىندا شەتەلدىكتەردى تىركەۋ، ەلەكتروندى ۆيزالاردى ەنگىزۋ ماسەلەرىن ءارتاراپتاندىرۋ جۇمىسىن ءجىتى نازاردا ۇستاپ وتىرۋدى تاپسىردى.