«ازىرەت سۇلتان» مەملەكەتتىك تاريحي مادەني قورىق-مۇراجايىنىڭ قورى تاعى دا ءبىر تاريحي، اسا قۇندى جادىگەرمەن تولىقتى دەپ حابارلايدى Qamshy.kz اقپارات اگەنتتىگى.

ول - بولاتتان جاسالعان قىلىش. قىلىشتىڭ ساقتالۋ جاعدايى ورتاشا. سۇيەكتەن جاسالعان تۇتقا-سابىنىڭ تومەنگى بولىكتەرى سىنعان. ءجۇزى ازداعان قارا-قوڭىر ءتۇستى توتىققان. ءجۇزىنىڭ ءبىر جاعى عانا وتكىرلەنگەن. قىلىشتىڭ جۇزىندەگى كوپتەگەن كەرتپە ىزدەرى ونىڭ اسكەري قاقتىعىستاردا باستان كەشىرگەندىگىن كورسەتسە كەرەك. دەگەنمەن، قىلىشتىڭ ءجۇزى ءالى دە وتكىرلىگىن جويماعان. قايقىلانعان پىشىندەگى قىلىشتاردى قازاقتا جاتاعان قىلىش دەپ تە اتايدى. قىلىشتىڭ وتكىرلەنگەن جۇزىنە قارسى بەتىنىڭ جارتى تۇتىك ءپىشىندى بولىپ كەلۋى، قىلىشتىڭ اسكەري ارەكەتتەردە قارسىلاستى تەك شابۋ ءۇشىن عانا ەمەس، تۇيرەۋ ماقساتىنا دا ارنالعاندىعىن اڭعارتىپ تۇر. ءجۇزى مەن سابىنىڭ تۇيىسكەن جەرى جەزبەن كومكەرىلگەن.

بۇل قىلىشتى بىرەگەي جادىگەرلەر قاتارىنا جاتقىزۋعا مۇمكىندىك بەرەتىن وزگەشە بەلگىسى بار. ول – قىلىش سابىنىڭ تومەنگى بولىگىندەگى 1798 جىلدان 1809 جىلعا دەيىن قوقان حاندىعىنىڭ حانى بولعان اليم حان نەمەسە بۇحارا امىرلىگىنىڭ سوڭعى بيلەۋشىسى سەيد ءمىر مۇحاممەد اليم حاننىڭ اتى جازىلعان جەكە ءمور بەدەرىنىڭ ءتۇسىرىلۋى بولىپ وتىر. بۇعان دەيىن حاندار ۇستاعان، تۇتىنعان زاتتار ءبىزدىڭ قورىق-مۇراجايدا كەزدەسپەگەن.

ءحىح عاسىر مەن حح عاسىردىڭ باسىنداعى قازاق تاريحىنا قاتىستى مالىمەت كوزى سانالاتىن مۇنداي جادىگەرلەر تاريح اقتاڭداقتارىن ايقىنداۋعا سەپ بولار تىڭ جاڭالىقتارعا قول جەتكىزۋگە مۇمكىندىك بەرۋى بەك مۇمكىن. ونىڭ ۇستىنە مۇنداي بەلگىلى ءبىر تاريحي تۇلعانىڭ ەسىمىنىڭ جادىگەر بەتىندە كەزدەسۋى جادىگەردىڭ ەكسپونات تۇرعىسىنداعى قۇندىلىعىن ارتتىرا تۇسەتىنى بەلگىلى.

 بولاشاقتا اتالمىش جادىگەرگە عالىمدارىمىز تياناقتى زەرتتەۋ جۇمىستارىن جۇرگىزبەك.