مەملەكەتتىك باعدارلامانىڭ «جەكە تۇرعىن ءۇي قۇرىلىسىن دامىتۋدى قولداۋ» دەپ اتالاتىن ەكىنشى باعىتىن جۇزەگە اسىرۋ اياسىندا بيىل تۇرعىن ءۇي سالاتىن 60 مىڭ جەر ۋچاسكەسىن ينجەنەرلىك-كوممۋنيكاسيالىق جەلىمەن قامتاماسىز ەتۋ جوسپارلانۋدا. بۇل تۋرالى بۇگىن قازاقستان رەسپۋبليكاسى ۇكىمەتىنىڭ وتىرىسىندا ينۆەستيسيالار جانە دامۋ ءمينيسترى جەڭىس قاسىمبەك مالىمدەدى.
«ءتيىستى جەلىلەر تارتىلعان ەڭ كوپ جەر ۋچاسكەلەرىن بەرۋدى ماڭعىستاۋ (15759 ۋچاسكە) جانە اقتوبە (11732 ۋچاسكە) وبلىستارىنىڭ اكىمدىكتەرى جوسپارلاپ وتىر. جارتى جىلدىڭ قورىتىندىسى بويىنشا 23،5 مىڭ ۋچاسكە ينجەنەرلىك جەلىمەن قامتاماسىز ەتىلدى. جەكە تۇرعىن ءۇي قۇرىلىسىنا ارنالعان ۋچاسكەلەردى جەلىلەرمەن قامتاماسىز ەتۋگە كوزدەلگەن قاراجاتتىڭ سوماسى 45،5 ملرد. تەڭگەنى قۇرايدى»،-دەپ اتاپ ءوتتى مينيستر.
