ورتا سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق بوكسشى گەنناديي گولوۆكين Big Bear جاتتىعۋ لاگەرىندە وتكەن Radio Rahim TV راديوسىنا سۇقبات بەردى، دەپ Qamshy.kz اقپارات اگەنتتىگى Vesti.kz سايتىنا سىلتەمە جاساپ. 

سۇحبات كەزىندە GGG باپكەرى تۋرالى جانە ابەل سانچەستىڭ قول استىندا وتكىزگەن ءبىرىنشى جاتتىعۋى جايلى، جەكە ءومىرى تۋرالى ايتىپ بەردى. 

"مەنىڭ ءاربىر كەزدەسۋىن بىر-بىرىنەن ەرەكشە. ءبىراق شىنىندا "كانەلوعا" قارسى وتەتىن كەزدەسۋ مەنىڭ كارەرامداعى ەڭ ماڭىزدى جەكپە-جەك بولادى. دەگەنمەن مەن جاتتىعۋ جۇمىستارىما ەشقانداي وزگەرىس ەنگىزگەن جوقپىن: جاتتىعۋ زالىندا تىنباي تەر توگىپ، زالدا جۇمىس ىستەيمىن. مەن ءوز جۇمىسىمدى بىلەمىن. 

سانچەسپەن بىرگە جۇمىس ىستەۋگە ۇزاق ۇيرەنىستىم دەپ ايتا المايمىن. ونىمەن وتكىزگەن ءبىرىنشى جاتتىعۋىم دا ەسىمدە. مەن كىشكەنتاي عانا سۋمكامەن كەلگەن ەدىم. تۇسىنەسىزدەر مە، بوكس - مەنىڭ ءومىرىمنىڭ ءبىر بولشەگى. بوكس ماعان كەرەك. بۇل تەك مەنىڭ جۇمىس عانا ەمەس. سانچەس - كەرەمەت ادام. ءوز ءىسىنىڭ ناعىز شەبەرى. مەن وعان سەنەمىن. باستىسى - تىنبەي ەڭبەك ەتۋ. جاتتىعۋعا بارىڭدى ارناۋ كەرەكسىڭ. نازارىڭ جاتتىعۋدا بولۋ كەرەك. سول كەزدە عانا چەمپيون بولاسىڭ. ەگەر جاتتىعۋعا نەمقۇرايلى قارايتىن بولسا، ەشتەڭەگە قول جەتكىزە المايسىڭ. ۋاقىتىڭ دا زايا كەتەدى. 

مەنى الەمنىڭ ۇزدىك بوكسشىسى دەگەن تەڭەۋمەن كەلىسپەيمىن. ءار بوكسشى ءارتۇرلى. ءبىرىنىڭ ءستيلى باسقا، ءبىرىنىڭ تالانتى مىقتى، ءبىرىنىڭ مۇمكىندىكتەرى كوپ. سوندىقتان دا مەن الەمنىڭ ۇزدىك بوكسشىسىمىن دەپ ايتا المايمىن. ءيا، مۇحامەد ءالي - ۇلى بوكسشى. الايدا مەن ودان كەيىن ەكىنشى ورىندا دا تۇرعان جوقپىن. ءبىزدىڭ بارلىعىمىزدىڭ ەرەكشەلىكتەرىمىز بار. اۋىر سالماقتاعى بوكسشىلار - ءىرى دەنەلى، سوققىلارى اۋىر. جەڭىل سالماقتاعىلار - جىلدام. مەنى ەكىنشى قويعىڭىز كەلەدى مە؟ بۇل مەن ءۇشىن قىزىق ەمەس. مەن ءۇشىن P4P رەيتينگى دە ماڭىزدى ەمەس. 

Big Bear-دە مەن تولىق دايىندالا الامىن.  مۇندا مەن جەكپە-جەككە ەكى اي قالعاندا كەلەمىن. شامامەن 10-12 اپتا بويى جەكپە-جەككە دايىندالامىن. بۇل دا مەنىڭ ءومىرىمنىڭ ءبىر بولىگى. بوكس - ءقاۋىپتى جۇمىس. ءبىراق مەنىڭ سپورتتىق كارەرام ءومىرىمنىڭ تولىق بولشەگى ەمەس. جەكە ءومىر مەن بوكستى سالىستىرۋعا كەلمەيدى. 

تانىمالدىلىق؟ ماعان ول دا قىزىق ەمەس. تانىمال بولعىم كەلمەيدى. جانە ول ماعان ەشقاشان اسەر دە ەتپەگەن. مەن بوكسشىمىن. ءيا، مەنى كوپشىلىك تانىپ جاتادى. دەيتۇرعانمەن ماعان "ول جۇلدىز"، "ول تانىمال" دەگەن اڭگىمەلەر اسەر ەتپەيدى. رينگتەن سىرتىندا مەن قاراپايىم اداممىن. جۇلدىز ەمەسپىن. مەن ءوز حالقىمنىڭ باتىرى دا ەمەسپىن. شىنىمەن. مەن ءۇشىن ول اسا ماڭىزدى ەمەس. 

الۆارەسپەن وتەتىن جەكپە-جەك مەن ءۇشىن ماڭىزدى. "كانەلو" - ەرەكشە بوكسشىلاردىڭ ءبىرى. ءبىراق ول دا سۋپەرچەمپيون ەمەس. ءبىزدىڭ جەكپە-جەگىمىز بوكس ءۇشىن ۇلكەن وقيعا دەپ ويلايمىن. كىمنىڭ جەڭەتىنى ماڭىزدى ەمەس. ول ما، الدە مەن بە؟ ءبىراق بۇل ەكەۋمىز ءۇشىن دە ۇلكەن جەڭىس بولايىن دەپ تۇر. كەيبىرەۋلەر بۇل جەكپە-جەكتە رەيتينگتىڭ، P4P كورسەتكىشىندەگى ورىن، مىقتى ەكەنى انىقتالادى دەپ ويلايدى. الايدا، باستىسى - جەڭىس"، - دەيدى گولوۆكين. 

ەسكە سالايىق، گولوۆكين-الۆارەس جەكپە-جەگى 16 قىركۇيەكتە لاس-ۆەگاستاعى 20 مىڭ ادام سياتىن T-Mobile ارەناسىندا وتەدى.