سولتۇستىك قازاقستان وبلىسىندا ءبىرىنشى جارتىجىلدىقتاعى الەۋمەتتىك-ەكونوميكالىق دامۋ كورسەتكىشتەرىنىڭ ناتيجەسى شىعارىلدى، دەپ حابارلايدى Qamshy.kz اقپارات اگەنتتىگى   ستاتيستيكا دەپارتامەنتىنە سىلتەمە جاساپ.

جىل باسىنان بەرى وبلىسقا 66 ملرد. ينۆەستيسيا تارتىلدى. وندىرىستىك كاسىپورىندار 103،3 ملرد. تەڭگەنىڭ ونىمدەرىن شىعاردى. نەگىزگى ۇلەس وڭدەۋشى ونەركاسىپتەردىڭ ەنشىسىندە. بيىلعى جىلى ىرىمشىك، سۇزبە، ەت، ماكارون جانە ۇن ءوندىرىسى ارتتى. «ماشينا جاساۋ ءوندىرىسىنىڭ كولەمى 2،4 ەسەگە، جەڭىل ونەركاسىپ - 1،9 ەسە، ماشينالار مەن قۇرىلعىلاردان باسقا دايىن مەتال ونىمدەرى - 1،6 ەسەگە ارتتى. قۇرىلىس ماقساتىنداعى بەتون ونىمدەرى مەن اس ءۇي جيھازدارىنىڭ ءارقايسىسىنىڭ شىعارىلىمى - 1،6 ەسەگە كوبەيدى»، - دەپ ءمالىم ەتتى دەپارتامەنت.

سولتۇستىكقازاقستاندىق ستاتيستيكا مالىمەتتەرى بويىنشا، بىلتىرعى جىلمەن سالىستىرعاندا تۇرعىن ۇيلەردىڭ بەرىلۋى 40%-عا ارتتى. جارتى جىل ىشىندە 54 مىڭ «كۆادراتتان» جوعارى تۇرعىن ءۇي پايدالانۋعا بەرىلدى. سونىمەن قاتار، قۇرىلىستىڭ ورتاشا قۇنى دا ارتىپ، 1 شارشى مەتر - 80،9 مىڭ تەڭگەنى قۇرادى. 2016 جىلدىڭ قاڭتار-شىلدە ايلارىندا بۇل كورسەتكىش 54،1 مىڭ تەڭگەنى قۇراعان.

ءبىرىنشى جارتىجىلدىقتا 223 جاڭا عيماراتتىڭ قۇرىلىسى اياقتالدى، ولاردىڭ 206-سى تۇرعىن ءۇي، 17ء-سى تۇرعىن ۇيگە جاتپايتىن جايلار. ماۋسىم ايىندا ۇن-جارما ونىمدەرىن ءوندىرۋ وندىرىستەرى، ساۋدا پاۆيلوندارى، ويىن-ساۋىق ورتالىقتارى، كەڭسەلەر، اۆتوكولىكتەرگە تەحنيكالىق قىزمەت كورسەتۋ جانە جوندەۋ ستانسيالارى، سۇلۋلىق سالوندارى مەن شاشتارازدار، شاعىن ماركەتتەر پايدالانۋعا بەرىلدى.