«رەسەيلىك فاشيزمگە جول جوق» - ءدال وسىنداي مازمۇنمەن جەكسەنبى كۇنى ءتبيليسيدىڭ ورتالىعىنداعى اگماشەنەبەلي داڭعىلىندا جۇزدەگەن ادام شەرۋگە شىقتى. شەرۋدى ۇيىمداستىرعان «ەركىندىك قوزعالىسى – ەۋروپالىق گرۋزيا» پارتياسى بولدى، دەپ جازادى Qamshy.kz اقپارات اگەنتتىگى.
«ەۋروپالىق گرۋزيا» شەرۋى وتكەن ورىن تۋريستەر ءۇشىن تانىمال داڭعىل سانالادى. 14 شىلدە كۇنى ءدال سول كوشەدە كوشى-قون ساياساتى مەن گرۋزياداعى زاڭسىز يمميگرانتتاردى قۋدالاۋ ماقساتىندا «گرۋزيندەر مارشى» وتكەن.
«ەۋروپالىق گرۋزيا» وكىلدەرىنىڭ ايتۋىنشا، ولاردىڭ شەرۋى اتالمىش مارشقا جاۋاپ رەتىندە جاسالدى. «گرۋزيا – فاشيزم مەن كسەنوفوبياعا ورىن جوق تولەرانتتى مەملەكەت» دەيدى شەرۋ وكىلدەرى.
«بۇل شەرۋگە ءبىز بىرنەشە كۇن بۇرىن گرۋزيالىق قۇندىلىققا جات پوزيسيانى ۇستانعان توپقا جاۋاپ رەتىندە شىقتىق. فاشيزمگە جول جوق. بۇل اكسيا سولارعا قارسى، سونداي-اق الگىندەي توپتاردىڭ قۇرىلۋىنا مۇمكىندىك بەرەتىن بيلىككە قارسى ۇيىمداستىرىلعان»، - دەدى پارتيا باسشىلارىنىڭ ءبىرى سەرگي كاپاندزە بي-بي-سي تىلشىسىنە بەرگەن سۇحباتىندا.
شەرۋ قۇقىققورعاۋ ورگاندارىنىڭ باقىلاۋىندا بولدى. شەرۋشىلەر «ەۋروپالىق گرۋزيا» باسشىلارىنا شەرۋ وتكىزۋگە قارسى بولعان توپتىڭ الدىنا كەلگەندە، جاعداي ۋشىعا ءتۇستى.
قارسى توپتىڭ مالىمدەۋىنشە، «ەۋروپالىق گرۋزيا» باسشىلارىنىڭ ءتبيليسيدىڭ ورتالىعىندا شەرۋ وتكىزۋگە مورلدىق قۇقىقتارى جوق. سەبەبى ولار بۇرىنعى ۇكىمەت جانىنداعى ادام قۇقىقتارىن بۇزعان.
شەرۋ باستالماس بۇرىن «گرۋزيندەر مارشى» توبىنىڭ ۇيىمداستىرۋشىلارى الدىن الماق بولىپ، قاتىسۋشىلاردى كەرى شەگىندىرۋگە تىرىسىپ باققان. الايدا، بۇل ارەكەتتەرى ناتيجەسىز بولدى.
پوليسەي قىزمەتكەرلەرى ولاردى توقتاتپاق بولىپ، قورشاۋعا كوشكەن. شەرۋشىلەر توقتاعان جوق: پوليسەيلەر ارقىلى بوتەلكەلەر، جۇمىرتقالار جانە قىزاناقتار تولاستاماي ۇشىپ جاتتى.
پوليسەي قىزمەتكەرلەرىنىڭ مالىمەتىنشە، بىرنەشە ادام جەڭىل جاراقات العان. سوعان قاراماستان، «ەۋروپالىق گرۋزيا» شەرۋى جالعاسىن تاۋىپ، «ماردجانيشۆيلي» مەترو بەكەتىندە ءبىراق اياقتالعان.
