اقمولا وبلىسىندا وسىعان دەيىن ءىز-تۇزسىز جوعالىپ كەتكەن 123 ادامنىڭ 60-ى تابىلدى. ال ولاردىڭ بەسەۋى كامەلەتكە تولماعان جەتكىنشەك دەپ حابارلايدى Qamshy.kz اقپارات اگەنتتىگى 24.kz-كە سىلتەمە بەرىپ.

بۇل – ايماق پوليسەيلەرىنىڭ بيىل جىل باسىنان بەرى جۇرگىزگەن ىزدەۋ جۇمىستارىنىڭ ناتيجەسى. سوڭعى وقيعا جاقىندا عانا تىركەلدى. استراحان اۋدانىنىڭ 67 جاستاعى تۇرعىنى بالىق اۋلاۋعا كەتكەننەن ۇيىنە ورالماعان. تۋىستارى ءوز كۇشىمەن 2 كۇن بويى ىزدەپ، تاپپاعان سوڭ ىشكى ىستەر ورگاندارىنا حابار بەرىپتى. ارادا تاعى 3 كۇن وتكەن سوڭ زەينەتكەر ايدالادان ءدىن امان تابىلعان. قۇزىرلى ورگان ماماندارىنىڭ ايتۋىنشا، وڭىردە ادامداردىڭ جوعالىپ كەتۋ دەرەگى ازايماي تۇر. بىرەۋ مال جايىپ ءجۇرىپ اداسىپ كەتسە، ەندى ءبىرى كۇن رايىنىڭ قۇبىلۋىنا بايلانىستى جولىنان جاڭىلىپ كەتەتىن كورىنەدى. ال كەيبىرى ۇيدەن شىققان بويدا بەلگىسىز سەبەپتەرمەن ءىزىم-عايىم جوق بولادى.