ەلباسى جولداۋىندا "التىنشى. ۋربانيزاسيا ۇدەرىسى قۇرىلىس سەكتورىن دامىتۋ قاجەتتىگىن العا تارتىپ وتىر. ول وتاندىق ەكونوميكانىڭ تولىققاندى درايۆەرىنە اينالۋعا ءتيىس.  

جول، تۇرعىن ءۇي جانە باسقا دا ينفراقۇرىلىم قۇرىلىسىنا ينۆەستيسيا سالا وتىرىپ، ءبىز قالالارىمىزدىڭ ۇزاق جىلدارعا دەيىن سىرتقى جانە تەحنولوگيالىق كەلبەتىن ايقىندايتىنىمىزدى ۇمىتپاعانىمىز ءجون. سوندىقتان قۇرىلىسقا دا، قۇرىلىس ماتەريالدارىن ءوندىرۋ سالاسىنا دا جاڭا تەحنولوگيالاردى ەنگىزۋ كەرەك. ول ءۇشىن بىزدە ءقازىر جاقسى مۇمكىندىكتەر بار.

مەنىڭ تاپسىرمام بويىنشا بيىل «نۇرلى جەر» تۇرعىن ءۇي باعدارلاماسى ىسكە اسىرىلا باستايدى. ول اسا ماڭىزدى مىندەتتى ورىنداۋعا – الداعى 15 جىلدا 1،5 ميلليون وتباسىن تۇرعىن ۇيمەن قامتاماسىز ەتۋگە باعىتتالعان."، - دەپ اتاپ وتىلگەن بولاتىن.

قاراعاندى وبلىسىنا جۇمىس ساپارى اياسىندا ق ر پرەمەر-مينيسترى باقىتجان ساعىنتايەۆ ەلىمىزدىڭ مونوقالالارىن دامىتۋ جونىندە جۇمىس كەڭەسىن وتكىزدى، دەپ جازادى Qamshy.kz اقپارات اگەنتتىگى پرەمەر-مينيستردىڭ باسپا ءسوز قىزمەتىنە سىلتەمە جاساپ.

ءىس-شاراعا ورتالىق جانە جەرگىلىكتى مەملەكەتتىك ورگانداردىڭ وكىلدەرى، مونوقالالاردىڭ اكىمدەرى جانە ءوڭىردىڭ ونەركاسىپتىك كاسىپورىندارىنىڭ باسشىلارى قاتىستى.

كەزدەسۋگە قاتىسۋشىلار وڭىرلەردى دامىتۋدىڭ 2020 جىلعا دەيىنگى باعدارلاماسى اياسىنداعى مونوقالالاردى دامىتۋ بارىسىن، «زاكىرلى» ينۆەستيسيالىق جوبالاردى ىسكە اسىرۋ بارىسىن، توقتاپ قالعان جانە تولىق جۇكتەلمەگەن جوبالار ماسەلەلەرىن، سونداي-اق شاعىن جانە ورتا بيزنەستى دامىتۋدىڭ تۇيىتكىلدى ماسەلەلەرىن تالقىلادى.

وسى تاقىرىپتار بويىنشا ق ر ۇلتتىق ەكونوميكا ءمينيسترى تيمۋر سۇلەيمەنوۆ پەن ق ر ينۆەستيسيالار جانە دامۋ ءمينيسترى جەڭىس قاسىمبەك بايانداما جاسادى. بۇدان وزگە،ءوز قالالارىنداعى جاعداي بويىنشا تەمىرتاۋ ق. اكىمى عالىم ءاشىموۆ، كەنتاۋ ق. اكىمى ءابدىباقىت ماقۇلبايەۆ جانە ستەپنوگور ق. اكىمى ءانۋار كۇمپەكەيەۆ تولىق بايانداما جاسادى.

جەكەمەنشىك سەكتوردىڭ پوزيسياسى جايلى «Talas Investment Company» ج ش س باس ديرەكتورى باقتيار الداشوۆ، «Bapy Mining» ج ش س ديرەكتورى باقىت شالبايەۆ، «سسگپو» اق ۆيسە-پرەزيدەنتى ەرلان الكەنوۆ، «SES Saran» ج ش س باس ينۆەستورى يان زوننەنشاين، «ERG» قاداعالاۋ كەڭەسىنىڭ ءتوراعاسى الديار قازتايەۆ ايتىپ ءوتتى. 

كەڭەستى قورىتىندىلاي كەلە، ق ر پرەمەر-مينيسترى باقىتجان ساعىنتايەۆ ەلىمىزدىڭ ءىرى ونەركاسىپتىك كاسىپورىندارىنىڭ باسىم بولىگى مونوقالالاردا ورنالاسقانىن جانە جۇيە قۇراۋشى بولىپ تابىلاتىنىن اتاپ ءوتتى. سوندىقتان، ەلىمىزدىڭ پرەزيدەنتى ن. نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ىسكە اسىرۋ اياسىندا جۇرگىزىلىپ جاتقان وسىنداي زاۋىتتاردى تەحنولوگيالىق جاڭعىرتۋ وسى ەلدى مەكەندەردىڭ تۇرعىندارى ءۇشىن اسا ماڭىزدى.

سونىمەن قاتار، مونوقالالاردىڭ بولاشاعى حالىقتىڭ بەلسەندى بولىگىنە، اتاپ ايتقاندا، تۋريزم جانە اۋىل شارۋاشىلىعى سياقتى سالالاردى دامىتۋعا قاراجات سالا الاتىن كاسىپكەرلەرگە بايلانىستى ەكەندىگى اتاپ ءوتىلدى.  

ق ر پرەمەر-مينيسترى باقىتجان ساعىنتايەۆ مەملەكەتتىك ورگاندارعا كەڭەستە ايتىلعان ۇسىنىستاردى مونوقالالاردىڭ ينۆەستيسيالىق تارتىمدىلىعىن ارتتىرۋ ماقساتىندا ولاردى دامىتۋدىڭ ارەكەتتەگى باعدارلاماسىنا وزگەرىستەر ازىرلەۋ كەزىندە ەسكەرۋدى تاپسىردى.