استانا قالالىق جاستار ساياساتى ماسەلەلەرى باسقارماسىنىڭ باسشىسى اسحات ورالوۆ ءوزىنىڭ Facەbook-تەگى پاراقشاسىندا №25 باعىتتاعى اۆتوبۋستىڭ كوندۋكتورىمەن تۇسكەن سۋرەتىن جاريالادى، دەپ جازادى  Qamshy.kz اقپارات اگەنتتىگى.  سۋرەتتىڭ اۆتوبۋس ىشىندە تۇسىرىلگەنى كورىنىپ تۇر.

 «بارلىق قالالاردا جاستار پايدالاناتىن كولىك ءتۇرى اۆتوبۋس ەكەنى بەلگىلى. استانادا دا سولاي. سوندىقتان جاستار قالا اكىمىنىڭ باستاماسىن تولىق قولدايدى»،-دەپ جازدى اسحات ورالوۆ.

الايدا جەلى قولدانۋشىلارىنىڭ كوپشىلىگى اسحات ورالوۆتىڭ اتالمىش ارەكەتىن قولداسا، ەندى بىرەۋى كوزبوياۋشىلىققا بالاپ، اسەت يسەكەشيەۆتىڭ الدىندا ەسەپ بەرۋ عانا دەپ قابىلداپ وتىر.

ايتا كەتەيىك، استانا اكىمى اسەت يسەكەشيەۆ ەلوردا اكىمدىگىندە بولعان ماجىلىستەردىڭ بىرىندە قالا باسشىلارىنا قوعامدىق كولىكپەن ءجۇرۋدى تاپسىرعان بولاتىن.

 «ەلوردا باسشىلارى، قالا اكىمىنەن باستاپ، ونىڭ ورىنباسارلارى، اۋدان اكىمدەرى مەن ولاردىڭ ورىنباسارلارى، سونداي-اق باسقارما باسشىلارى، ۇيىمدار مەن مەكەمەلەردىڭ جەتەكشىلەرى كۇنىنە ەڭ قۇرىعاندا ءبىر رەت قوعامدىق كولىكپەن جۇرۋلەرى كەرەك»،-دەدى قالا باسشىسى.

ايتا كەتسەك، ماۋسىم ايىنىڭ ورتاسىندا ەكسپو-2017 كەزىندە كولىكپەن قامتاماسىز ەتۋ جانە قالاداعى جول قوزعالىسىن ۇيىمداستىرۋ ماسەلەلەرى بويىنشا وتكەن جينالىستا استانا اكىمى قالالىق اۆتوبۋستاردىڭ قىزمەت كورسەتۋىن  قاتاڭ باقىلاۋعا الۋعا ۋادە بەرگەن ەدى.