تۋعان جەرىمىزدىڭ تورىندە بۇگىنگى تاڭدا ءوتىپ جاتقان ەكسپو-2017 حالىقارالىق مامانداندىرىلعان كورمە ادامزاتتىڭ دامۋ تاريحىنداعى، دۇنيەجۇزىلىك وركەنيەتتىڭ ورلەۋ تاريحىنداعى ماڭىزدى وقيعا. كيەلى قازاق جەرىندە دۇنيەجۇزىلىك كورمەنىڭ ءوتۋى – «الىپ جاتقان جارتى دۇنيە الەمىن، قازاقستان دەيتىن مەنىڭ بار ەلىم» دەپ اقىن قاسىم امانجولوۆ ماقتانىش ەتكەن حالقىمىزعا ۇلكەن ابىروي. ورتالىق ازيا ەلدەرىندە، تمد كەڭىستىگىندە تۇڭعىش رەت وتكىزىلىپ جاتقان جاھاندىق جوبا قازاقستاندى الەمدىك قاۋىمداستىقتىڭ ءبىر بولشەگى رەتىندە دۇنيە جۇزىنە تاعى ءبىر رەت تانىتا تۇسەدى. الەمدىك وركەنيەت قازىناسىن تولتىراتىن ۇلتتىق قۇندىلىقتاردى جۇرتشى­لىققا پاش ەتەتىن حالىقارالىق كورمە تاۋەلسىز ەل رەتىندە ىرگەسىن بەكىتكەن قازاق­ستاننىڭ الەمدىك ساياسات ساحناسىندا قاناتىن كەڭ جايىپ كەلەتىنىن كورسەتەدى. اسقاقتاعان استاناداعى دۇنيەجۇزىلىك سالتاناتتى شارانىڭ وتۋىنە ۇلكەن ۇلەس قوسىپ جۇرگەن ەرىكتىلەردىڭ ەڭبەگى ەرەكشە ەكەنى ءسوزسىز. ايتا كەتەرلىگى، ءۇش اي بويى ىزگى شاراعا اتسالىساتىن 4500 ەرىكتىلەردىڭ اراسىندا 900 الماتىلىق ەرىكتى  بار. ماعجان اقىن سەنگەن بۇل جالىندى جاستار تۋعان ەلىنە قىزمەت ەتۋدە وزگەشە ونەگە كورسەتۋدە. ءبىز وسى ورايدا، دۇنيەجۇزىلىك تاريحي وقيعانى تاماشالاۋ ءۇشىن الەمنىڭ ءار تۇكپىرىنەن كەلگەن قوناقتارعا ءار ءتۇرلى باعىت بويىنشا قىزمەت كورسەتكەن الماتىلىق ەرىكتىلەرمەن اڭگىمەلەسكەن ەدىك.

ەراسىل قۇماريولدانوۆ،

ەۋرازيالىق تەحنولوگيا­لىق ۋنيۆەرسيتەتى

ەلەكتروەنەرگەتيكا فاكۋلتەتىنىڭ 2-كۋرس ستۋدەنتى:

بۇل كورمە الەمدەگى  مىڭ سان مادەنيەتتى استانا تورىندە توعىستىردى

– ەڭسەلى ەلوردامىزدا ءوتىپ جاتقان ەكسپو-2017 كورمەسى قازاق ەلىن كۇللى الەمگە پاش ەتتى. دۇنيە جۇزىندەگى الپاۋىت مەملەكەتتەرمەن قارىم-قاتىناسىمىزدى نىعايتۋدا بۇل كورمەنىڭ ماڭىزى زور. كورمەدەگى ءار ءتۇرلى مادەني شارالار شەتەلدىك قوناقتاردى ءتۇپ-تامىرى تەرەڭدە جاتقان ۇلتتىق ونەرىمىزدىڭ قازىنالارىمەن سۋسىنداتادى. ىشكى مازمۇنىمەن، بىرەگەي ساۋلەتىمەن كورەرمەندەردى تامساندىراتىن «نۇر الەم» سفەراسى دا، جالپى بۇگىندە الەمگە تانىلعان ايبارلى استانامىز دا  ءاربىر قازاقستاندىقتىڭ جۇرەگىندە ماقتانىش سەزىمىن لاۋلاتادى. بۇل كورمە عالامات عالامداعى مىڭ سان مادەنيەتتى استانا تورىندە توعىستىردى. ماعان گەرمانيانىڭ پاۆيلونىنداعى اقىلدى ءۇي مەن ەلەكتركولىكتەرى وتە ۇنادى. بۇل تابيعاتتى تازا ساقتاپ قالۋعا سەپتىگىن تيگىزەتىن ءتيىمدى ءتاسىل ەكەن. سونداي-اق، ەنەرگيانى قاراپايىم جۇگەرىدەن جانە ءار ءتۇرلى وسىمدىكتەردەن وندىرۋگە بولاتىنىن پاش ەتەتىن تايلاند پاۆيلونىن دا قىزىعا تاماشالادىم. ەرىكتىلەر ۇنەمى تاۋەلسىز ەلىمىزدىڭ تاريحىندا ماڭىزدى ورىن الاتىن جارقىن وقيعالاردىڭ ورتاسىندا جۇرەدى. ەرىكتى اتانعان ازامات قىزمەت بارىسىندا ومىرلىك تاجىريبە جيناقتاپ، قوعامداعى ادامدارمەن ءتىل تابىسا ءبىلۋدىڭ ءار ءتۇرلى تاسىلدەرىن مەڭگەرەدى. سوندىقتان ەرىكتىلىك ەلىمىزدىڭ ەرتەڭىن جالعايتىن، كەلەشەگى­ءمىزدىڭ كىرپىشىن قالايتىن جاستار ءۇشىن وتە ماڭىزدى ومىرلىك تاجىريبە بولىپ تابىلادى.

قىمبات نۇرداۋلەت،

ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى اۋدارما جانە فيلولوگيا فاكۋلتەتىنىڭ 4-كۋرس ستۋدەنتى:

شەتەلدىك قوناقتاردى ەلىمىزدىڭ تاريحىمەن تانىستىردىق

– ەكسپو-2017 حالىقارالىق مامان­داندىرىلعان كورمە – الەمدىك كەڭىستىككە شىققان تاۋەلسىز قازاق ەلىنىڭ تاريحىنداعى ەلەۋلى وقيعا. استانا قالاسىنداعى دۇنيە­جۇزىلىك كورمەدە الماتىدان اي سايىن 300 ەرىكتى، ال ءۇش ايدا 900 ەرىكتى كەلىپ قىزمەت كورسەتپەك. 2015–2017جىلدارى «ەرىكتىلەر ليگاسىنىڭ» جەتەكشىسى ازيز كاجدەنبەك پەن اتقارۋشى ديرەكتور مەيرام بايگۋ­جەكوۆ كاستينگ وتكىزىپ، ەكسپو-2017 كورمەسىندە قىزمەت كورسەتەتىن ەرىكتىلەردى ىرىكتەۋ جۇمىستارىن جۇرگىزدى. بۇل الەمدىك كورمەدە مەن ماۋسىم ايىندا ەرىكتىلىك باعىتىنداعى تيم ليدەر (Team leader) قىزمەتىن اتقاردىم. الماتىدا وتكەن دۇنيەجۇزىلىك قىسقى ۋنيۆەرسياداداعى كوورديناتورلار سەكىلدى، بۇل كورمەدە دە ەرىكتىلەردىڭ جاعدايىن جاسايتىن، ولاردىڭ قىزمەتتەرىن ءبولىپ بەرىپ، توپتى ۇيىمداستىرىپ تۇراتىن سۋپەرۆايزەرلەر بار. ولارعا بەرىلگەن بەلگىلى ءبىر اۋماقتىڭ جارتىسىن سۋپەرۆايزەرلەر باسقارسا، ال تەڭ جارتىسىن باسقارۋ مىندەتى تيم ليدەرلەرگە جۇكتەلەدى. بۇل حالىقارالىق شارا بارىسىندا وتاندىق تەلەارنالار شەتەلدىك قوناقتاردان سۇحبات العان ساتتەردە اعىلشىن تىلىندە اۋدارما جاعىنان كومەك كورسەتتىم. الەمدىك كورمەدە ءبىز بارىنشا شەتەلدىك قوناقتاردى ەگەمەن ەلىمىزدىڭ تاعىلىمدى تاريحىمەن تانىستىرۋعا تىرىستىق. مۇحيتتىڭ ارعى جاعىنان كورمەنى كورۋگە كەلگەن مەيمانداردى حالقىمىزدىڭ قانىنا سىڭگەن قوناقجاي قاسيەتى ەرەكشە تاڭعالدىردى. بۇل جاھاندىق جوبادا اعىلشىن تىلىنەن اۋدارماشى رەتىندە شەتەلدىك ازاماتتارمەن ارالاسۋىم بولاشاق ماماندىعىم بويىنشا تاجىريبە جيناقتاۋىما سەپتىگىن تيگىزدى.

دارحان قۇرمانبايەۆ،

ت.رىسقۇلوۆ اتىنداعى قازاق ەكونوميكالىق ۋنيۆەرسيتەتى قارجى فاكۋلتەتىنىڭ 2-كۋرس ستۋدەنتى:

ەرىكتىلىك – ءومىر مەكتەبى

– بۇگىنگى تاڭدا دۇنيە ءجۇزىنىڭ قىزىعۋشىلىعىن تۋدىرعان ەكسپو-2017 كورمەسىن كورۋ ءۇشىن الەمنىڭ ءار تۇكپىرىنەن استاناعا اسىققان ادامداردىڭ سانى كۇن سايىن كوبەيىپ كەلەتىنى ءبىز ءۇشىن ۇلكەن قۋانىش، ءارى زور ماقتانىش. كۇللى الەمنىڭ نازارىن اۋدارعان بۇل كورمەدەن ەستەن كەتپەس ەرەكشە اسەر العان كورەرمەندەردىڭ جادىراعان جۇزدەرى جۇرەگىڭىزدى جىلىتادى. ەلىمىزدە ءوتىپ جاتقان بۇل اۋقىمدى شارادا ءبىز بارىنشا كورەرمەن ۋاقىتىن ءتيىمدى پايدالانۋعا كومەكتەسۋگە تىرىستىق. مىسالى،  كەيبىر پاۆيلونداردىڭ الدىندا كەزەكتە تۇرعان كورەرمەننىڭ قاتارى قالىڭ بولسا، كەيبىرىندە ادام سانى ايتارلىقتاي از بولۋى مۇمكىن. كورمەگە كەلگەن قوناقتار كەزەكتە تۇرىپ، التىن ۋاقىتىن بوسقا جوعالتىپ الماۋى ءۇشىن ءبىز ولارعا ادام از پاۆيلون­داردى تاماشالاۋعا كەڭەس بەرىپ، كورەرمەن كەزەگىن رەتتەپ وتىردىق. حالىقارالىق كورمەدە تيم ليدەر رەتىندە قىزمەت اتقارعان ماعان ەرىكتىلەردىڭ ەڭبەگىنە بايلانىستى جاۋاپكەرشىلىك جۇكتەلدى. تيم ليدەرلەر كورمەدە كورەر­مەندەرگە قىزمەت كورسەتەتىن ەرىكتىلەردىڭ ءبىر جاعادان  باس،  ءبىر  جەڭنەن  قول شىعارىپ، قىزمەت ەتۋىنە بارىنشا جاعداي جاسايدى. كورمە بارىسىندا ەرىكتىلەر بەلگىلەنگەن جەردە اۋىسىممەن كەزەكتەسىپ قىزمەت كورسەتەدى. ءبىر اۋىسىم ۋاقىتى 8 ساعاتقا جالعاسادى. ايتا كەتەرلىگى، گۇلزارلاردا 8 ساعات بويى جازداعى اپتاپ ىستىقتا كۇننىڭ استىندا تۇرۋ وڭاي شارۋا ەمەس. سوندىقتان، گۇلزاردا تۇرعان ەرىكتىنى ەكى ساعاتتان كەيىن پاۆيلوندارعا اۋىستىرىپ وتىردىق. ەرىكتىلىك جولى جاقسىلىققا جەتەلەپ، جاستاردىڭ جۇرەگىندە مەيىرىمىن مولايتادى، تۋعان ەلىنە، تۋعان جەرىنە دەگەن سۇيىسپەنشىلىگىن وياتادى. ويلاپ قاراسام، الماتىداعى «ەرىكتىلەر ليگاسىندا»، 28-دۇنيەجۇزىلىك قىسقى ۋنيۆەرسيادادا جانە ەكسپو-2017 كورمەسىندە ەرىكتىلەر قاتارىندا قىزمەت ەتۋىم، ناعىز ونەگەلى ءومىر مەكتەبى ءتارىزدى مەنى ومىردە كوپ نارسەگە ۇيرەتتى.

ايگەرىم ءبازىلجان،

حالىقارالىق بيزنەس ۋنيۆەرسيتەتى قارجى فاكۋلتەتىنىڭ

2-كۋرس ستۋدەنتى:

استانادا ەرىكتىلەرگە بارلىق جاعداي جاسالعان

– ەكسپو-2017 كورمەسىندە ەرىكتىلەردىڭ قاتارىنا قوسىلۋىما الماتىداعى 28-دۇنيەجۇزىلىك قىسقى ۋنيۆەرسيادادا جيناقتاعان تاجىريبەم ىقپال ەتتى. جاستاردىڭ جاھاندىق جارىسىنان كەيىن ەرىكتىلىككە قىزىعۋشىلىعىم بۇرىنعىدان دا ارتا ءتۇستى. سەبەبى، ەرىكتىلىك قىزمەتى بولاشاقتىڭ كىرپىشىن قالايتىن جاستاردىڭ قوعام ومىرىنە بەلسەندى ارالاسۋىنا، ومىرلىك تاجىريبە جيناقتاۋىنا ۇلكەن جول اشادى. ەرىكتىلىك جاستاردىڭ قاناتىن قاتايتىپ، ولارعا ءوز جۇمىسىنا جاۋاپكەرشىلىكپەن قاراۋدى، ادامدارمەن ءتىل تابىسۋدى، كومەك كورسەتۋدى، قيىندىقتارمەن كۇرەسۋدى ۇيرەتەدى. ءبىز  ەرىكتىلەرگە بارلىق جاعداي جاسالعان ل.گۋميليەۆ  اتىنداعى  ەۋرازيا  ۇلتتىق ۋنيۆەرسيتەتىنىڭ جاتاقحاناسىندا الماتىلىق التى قىز بولىپ تۇردىق. ەكسپو-2017 كورمەسىندە ەكى اۋىسىم بويىنشا ەڭبەك ەتتىك. ءبىرىنشى اۋىسىم تاڭعى ساعات 9:00-دان كەشكى ساعات 16:00-گە دەيىن بولسا، ال ەكىنشى اۋىسىم كەشكى 16:00-دەن تۇنگى ساعات 24:00-گە دەيىن جالعاستى. ارايلى استانا اجارىمەن ادامدى قاناتتاندىرادى ءارى شابىتتاندىرادى. اينالاعا اق نۇرىن شاشقان ارۋ قالادا ۋاقىتتىڭ قالاي وتكەنىن كوبىنەسە بايقاماي قالاتىنبىز. ادامدارمەن ارالاسقان سايىن جانىمىز جادىراپ، اينالاداعى كەرەمەت كورىنىستەن كوڭىلىمىز كوككە ورلەدى. ءبىز ەلوردامىزعا كەلگەن قوناقتار مەن شەتەلدىك تۋريستەردى قۋانا قارسى الىپ، ولاردىڭ استانا قالاسىنداعى ساياحاتىنىڭ قىزىقتى وتۋىنە اتسالىستىق.

ەركىن ءماجيتوۆ،

ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى حالىقارالىق قاتىناستار فاكۋلتەتىنىڭ 3-كۋرس ستۋدەنتى:

جاستاردىڭ كوڭىل كوكجيەگىن كەڭەيتەتىن كورمە

– كۇللى الەم كۇن ساناپ كۇتكەن وسىناۋ تاريحي وقيعانىڭ ورتاسىندا بولىپ، ونى ءوز كوزىممەن كورگەنىمە باقىتتىمىن. «مىڭ رەت ەستىگەننەن، ءبىر رەت كورگەن ارتىق» دەگەندەي، استانا تورىندەگى بۇل دۇركىرەگەن دۋماندى ءاربىر قازاقستاندىق ءوز كوزىمەن كورسە، كوڭىلى قۋانىشقا تولاتىن ەدى. اسىرەسە، بولاشاققا قادام باسقان جاستار تۋعان جەر توپىراعىندا ءوتىپ جاتقان ەكسپو-2017 كورمەسىن كورۋگە اسىققاندارى ابزال. سەبەبى، جاستار – تۋعان جەردىڭ تىرەگى. بۇل حالىقارالىق كورمەدە ءاربىر جاس كوڭىل كوكجيەگىن كەڭەيتىپ، رۋحاني قورجىنىن بايىتىپ، ءوزىنىڭ بولاشاق ماماندىعىنا بايلانىستى مول ماڭىزدى اقپارات الاتىنى اقيقات. ءبىلىم – ومىردەگى رۋحاني قىمبات قازىنا. بۇل الەمدىك كورمە جاستاردى ءبىلىمنىڭ بيىگىنە ۇمتىلدىرادى، عىلىم-بىلىمگە دەگەن سۇيىسپەنشىلىگىن ارتتىرادى. سەبەبى، ءبىلىم عانا ادامدى ءومىردىڭ بيىك  شىڭىنا قانات قاقتىرادى. «بار ىزگىلىك تەك بىلىمنەن الىنار، بىلىممەنەن اسپانعا جول سالىنار» دەپ ءجۇسىپ بالاساعۇن وتە ادەمى ايتقان! مەن بالا كەزىمنەن الەمدىك ارەنالاردا ءانۇرانىمىزدى اۋەلەتىپ، ەگەمەن ەلىمىزدىڭ كوك تۋىن جەلبىرەتۋدى ارماندايمىن. جارقىن بولاشاقتا مەملەكەتىمىزدىڭ مەرەيىن تاسىتۋعا ءوز ۇلەسىمدى قوسىپ، دۇنيەجۇزىلىك ەكسپو كورمەلەرىندە ەلىمىزدىڭ ابىرويىن اسقاقتاتاتىن پايدالى دۇنيەلەر ويلاپ تاپسام دەپ ىشتەي نيەتتەنىپ، ۇزدىكسىز ىزدەنىپ ءجۇرمىن.

دايىنداعان – بالنۇر احمەت.