بۇگىندە ەلىمىزدە ەكسپورتتى ۇلعايتۋعا ارنالعان بارلىق شارالار قولعا الىنىپ جاتىر. دامىعان مەملەكەتتەردە قولعا الىناتىن شارالار بىزدە دە جاسالۋدا. 

الايدا ناقتى ناتيجە ءالى بايقالمايدى. ەكپورتتىڭ كولەمى تومەندەپ كەلەدى، دەپ xابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

"قازاقستاندا ءوندىرىس ورىندارى تولىق جۇمىس ىستەمەيدى، ءتىپتى بوس تۇرعان كاسىپورىندار دا بار. ەكسپورتتى ارتتىرۋعا ارنالعان مەملەكەتتىك قولداۋ شارالارى بارشىلىق. ءبىز دامىعان ەلدەردە قولعا الىنعان شارالاردى اتقارىپ كەلەمىز. سونىڭ ىشىندە ەكسپورتتىق ساقتاندىرۋ، قارجىلىق قولداۋ، سان الۋان روۋد-شوۋلار، سالىقتىق جەڭىلدىكتەر جانە تاعىسىن تاعى. سوعان قاراماستان، قازاقستاننىڭ ەكسپورتى ازايىپ كەلەدى"، - دەدى ق ر تۇڭعىش پرەزيدەنتى - ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىبايەۆ بۇگىن ەكسپورتتى ارتتىرۋعا ارنالعان جيىندا.

ينستيتۋت باسشىسىنىڭ ويىنشا، قازىرگى كەزدە وتاندىق كاسىپكەرلەرگە جاڭا نارىقتارعا شىعۋ قاجەت. سەبەبى بۇرىنعى نارىقتار بىرتىندەپ جابىلىپ كەلەدى. "الىسقا بارماي-اق قويايىق، بۇگىندە ءبىزدىڭ الكوگول وندىرۋشىلەرىمىز كورشى ەلدەردە سان الۋان كەدەرگىلەرگە تاپ بولىپ جاتادى. كەدەن، سالىق جانە تاعى باسقا توسقاۋىلدار بارشىلىق. سونىڭ سالدارىنان قازاقستاننىڭ ەكسپورتى تومەندەپ كەلەدى. ال وتاندىق كاسىپكەرلەر ءداستۇرلى نارىقتارعا ۇيرەنىپ، بۇرىنعى پسيxولوگياعا بايلانىپ وتىر. سونىڭ سالدارىنان جاڭا نارىقتاردى يگەرۋگە قۇلشىنىس جوق"، - دەپ اتاپ كورسەتتى سالتىبايەۆ.

ونىڭ ايتۋىنشا، ۆەتنام، يندونەزيا، تايلاند، ءۇندىستان، بانگلادەش سياقتى وڭتۇستىك-شىعىس ازيا ەلدەرىنە شىعۋ قاجەت. ويتكەنى ول جاقتا رەسۋرستارعا دا، تاۋارلارعا دا سۇرانىس بار. "نۇرلى جول" باعدارلاماسى اياسىندا جاسالىپ جاتقان ينفراقۇرىلىمدى بارىنشا پايدالانىپ، وڭتۇستىك كاۆكازعا، تۇركيا مەن تاياۋ شىعىسقا، ودان ارى قاراي ەۋروپاعا شىعۋعا بولادى. ونسىز ەكپورتىمىزدى ەكى ەسەگە ارتتىرۋعا ارنالعان پرەزيدەنتتىڭ تاپسىرماسىن ورىنداۋ مۇمكىن ەمەس.